ប្រធានទីស្នាក់ការត្រួតពិនិត្យច្រកទ្វារអន្តរជាតិដូងស្រុកកំរៀងរូបនេះ បានបញ្ជាក់ថា ភ្លៀងធ្លាក់ជាប់ៗគ្នាជាច្រើនថ្ងៃ បណ្ដាឱ្យទឹកហូរមកពីតាមច្រលងភ្នំមួយចំនួន នៅតំបន់ផ្នែកខាងលើ បង្កបានជាទឹកជំនន់ហូរកាត់លើស្ពាន។
 

លោកបន្តថា៖ « ម្សិលមិញទឹកហូរកាត់លើស្ពានបេតុង តែឥឡូវស្រកវិញធម្មតាហើយ។ ចំពោះទឹកអូរដែលហក់ឡើងនេះ មានតែរយៈពេល ១ថ្ងៃស្រកទៅវិញហើយ! ជារៀងរាល់ឆ្នាំទឹកមានតែប៉ុណ្ណឹងឯងទឹកអូរហ្នឹង មិនមានការលិចលង់យូរទេ»។
 

ចំពោះផ្លូវបេតុងដែលទឹកហូរកាត់ពីលើ គឺរថយន្តដឹកទំនិញធុនធំអាចធ្វើចរាចរណ៍បាន តែរថយន្តតូចៗមិនអាចធ្វើដំណើរបាននោះទេ។ នេះបើតាមលោក ទិព្វមុនី។

ទឹកដែលហូរនៅលើស្ពានបេតុងច្រកអន្តរជាតិឡែម មិនមានផលប៉ះពាល់ដល់ប្រជាពលរដ្ឋ សត្វពាហណៈ និងដំណាំស្រូវអ្វីនោះទេ។ លោក ទិព្វមុនី បញ្ជាក់បែបនេះ រួចបន្តថា ភ្លៀងជាប់ៗគ្នាប៉ុន្មានថ្ងៃនេះ ធ្វើឱ្យកម្រិតទឹកឡើងប្រៀបនឹងមាត់អូរ ។ 
 

លោក សឿម ប៊ុនរិទ្ធ អភិបាលរងខេត្តបាត់ដំបងបានបញ្ជាក់ថា សុ្រកបាណន់ ស្រុកកំរៀង ស្រុកភ្នំព្រឹក ស្រុកសំពៅលូន និងស្រុកបវេល បានរងជំនន់ទឹកភ្លៀង ប៉ុន្តែមិនមានផលប៉ះពាល់អ្វីធ្ងន់ធ្ងរនោះទេ ព្រោះជំនន់ទឹកភ្លៀង បានស្រកចុះវិញហើយ។ 
 

លោកបញ្ជាក់យ៉ាងដូច្នេះ៖«ទឹកទាំងនោះ ជាជំនន់ទឹកភ្លៀងក្នុងស្រុក ទឹកហូរតាមអូរព្រំដែន និងទឹកស្ទឹងខាងទឹកដីថៃ នៅដែលពេលភ្លៀងជន់មកវាហូរតាមហ្នឹង»៕