បន្ទាប់ពីប្រតិបត្តិការយោធាពិសេសចាប់តាំងពីខែកុម្ភៈកន្លងមក ប្រធានាធិបតីរុស្ស៊ី លោក វ្ល៉ាឌីមៀ ពូទីន នៅថ្ងៃទី៣០ ខែកញ្ញា បានចុះហត្ថលេខាជាផ្លូវការលើសន្ធិសញ្ញាដាក់បញ្ចូលដែនដីអ៊ុយក្រែនចំនួន ៤ ដូចជា ​តំបន់ Donetsk, តំបន់ Kherson, តំបន់ Luhansk និង​តំបន់ Zaporizhzhia ជាផ្នែកមួយរបស់រុស្ស៊ី។ 

 

«ប្រជាជនរស់នៅ តំបន់ Donetsk, តំបន់ Kherson, តំបន់ Luhansk និងតំបន់ Zaporizhzhia បានក្លាយជាជនរួមជាតិរបស់យើងរៀងរហូត»។ លោកពូទីន បានប្រកាសបែបនេះ នៅចំពោះមុខក្រុមមន្រ្តីដែលបង្ហាញវត្តមាននៅវិមានក្រេមឡាំង ក្នុងថ្ងៃទី៣០ ខែកញ្ញា។ 

 

ក្នុងពិធីដ៏សំខាន់មួយនេះ លោកពូទីន បានចាត់ទុកការដាក់បញ្ចូលដែនដីចំនួន ៤ របស់អ៊ុយក្រែននេះ ជាឆន្ទៈរបស់ប្រជាជន ខណៈអ៊ុយក្រែន និងប្រទេសលោកខាងលិច បានរិះគន់ថា ជាសកម្មភាពខុសច្បាប់អន្តរជាតិ។ បន្ថែមពីនេះ លោកពូទីន បានប្រកាសការពារដែនដីដែលខ្លួនគ្រប់គ្រងទាំងនោះ ដោយគ្រប់មធ្យោបាយទាំងអស់ រួមទាំងអាវុធនុយក្លេអ៊ែរផង។ 

 

ទន្ទឹមនេះ ប្រធានាធិបតីរុស្ស៊ី ក៏បានជំរុញរដ្ឋាភិបាលក្រុងកៀវបញ្ឈប់សកម្មភាពបង្កសត្រូវ ហើយចូលចរចាផងដែរ។ 

 

ការដាក់បញ្ចូលតំបន់ចំនួន ៤នៅអ៊ុយក្រែន ដែលស្មើប្រហែលនឹង១៥ភាគរយនៃទឹកដីអ៊ុយក្រែនទាំងអស់ មិនត្រូវបានគាំទ្រពីអន្តរជាតិនោះទេ។ អគ្គលេខាធិការអង្គការសហប្រជាជាតិ បានចាត់ទុកទង្វើរបស់រុស្ស៊ី ខុសនឹងធម្មនុញ្ញអង្គការសហប្រជាជាតិ។ បើគិតចាប់ពីឆ្នាំ ២០១៤ ដែលគ្រប់គ្រងតំបន់គ្រីមេ រុស្ស៊ីបានកាន់កាប់ដែនដីអ៊ុយក្រែនប្រមាណ ២២ភាគរយ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។ 

 

គួររំឮកថា ពិធីចុះហត្ថលេខាខាងលើ ធ្វើឡើងក្រោយមានការធ្វើប្រជាមតិនៅតំបន់ទាំង ៤ ដែលបានបញ្ចប់នៅថ្ងៃទី២៧ ខែកញ្ញា កន្លងទៅ។ ជាលទ្ធផលសរុប ការធ្វើប្រជាមតិនេះ បង្ហាញថា ប្រជាជនច្រើនជាង៩៩ភាគរយគាំទ្រចូលរុស្សី៕