ជាតិ
សេដ្ឋកិច្ច
សម្តេច ហ៊ុន សែន បារម្ភកម្ពុជាមិនអាចក្លាយជាប្រទេសចំណូលមធ្យមកម្រិតខ្ពស់នៅឆ្នាំ២០៣០!
សម្តេចនាយករដ្ឋមន្ត្រី ហ៊ុន សែន ថ្លែងបើកសន្និសីទ«ចក្ខុវិស័យប្រទេសកម្ពុជា ឆ្នាំ២០២២» នៅសណ្ឋាគារសុខាភ្នំពេញ នាព្រឹកថ្ងៃទី៦ តុលា ២០២២។
×![]()
សម្តេចនាយករដ្ឋមន្ត្រី ហ៊ុន សែន បារម្ភពីការអភិវឌ្ឍដោយចីរភាពរបស់កម្ពុជា ក្នុងទិសដៅក្លាយជាប្រទេសចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសចំណូលខ្ពស់នៅឆ្នាំ២០៥០។ ការព្រួយបារម្ភរបស់សម្តេចនេះ ដោយសារ បច្ចុប្បន្នកម្ពុជាកំពុងរងសម្ពាធពីវិបត្តិកូវីដ-១៩ ខណៈវិបត្តិសង្រ្គាមនៅប្រទេសអ៊ុយក្រែន និងទណ្ឌកម្មសេដ្ឋកិច្ចរបស់ពិភពលោកលើប្រទេសរុស្ស៊ី កំពុងគំរាមកំហែងសកល។ 
គោលដៅអភិវឌ្ឍន៍ប្រកបដោយចីរភាព(SDGs)របស់អង្គការសហប្រជាជាតិ គឺមិនមែនជាគោលដៅដាច់ដោយឡែករបស់កម្ពុជានោះទេ។ នេះជាការលើកឡើងរបស់សម្តេច ហ៊ុន សែន ដោយជំរុញឱ្យគ្រប់ភាគីពាក់ព័ន្ធទាំងអស់ ត្រូវសិក្សា និងព្យាករទុក អំពីលទ្ធភាពនៃការសម្រេចចក្ខុវិស័យរបស់កម្ពុជា ក្នុងការប្រែក្លាយឱ្យទៅជាប្រទេសចំណូលមធ្យមកម្រិតខ្ពស់ បានឬមិនបាន នៅត្រឹមឆ្នាំ២០៣០។
សម្តេច បន្តរៀបរាប់ថា មុនឆ្នាំ២០២០ ស្ថានភាពសេដ្ឋកិច្ចកម្ពុជាគឺល្អប្រសើរ ដោយរក្សាបានកំណើនសេដ្ឋកិច្ចលើសពី៧ភាគរយក្នុងមួយឆ្នាំ។ ក៏ប៉ុន្តែ ការផ្ទុះឡើងនូវវិបត្តិកូវីដ-១៩, សង្រា្គមនៅអ៊ុយក្រែនដែលធ្វើឱ្យពិភពលោកជួបវិបត្តិប្រេងឥន្ទនៈ វិបត្តិស្បៀង និងបញ្ហាប្រែប្រួលអាកាសធាតុប្រកបដោយមហន្តរាយនេះ គឺវាបានវាយប្រហារខ្លាំងមកលើសេដ្ឋកិច្ចកម្ពុជា មកទល់សព្វថ្ងៃនេះ។
«តើយើងសម្រេចបានឬអត់[នូវគោលដៅក្លាយជាប្រទេសចំណូលមធ្យមកម្រិតខ្ពស់នៅឆ្នាំ២០៣០] ហើយបើមិនសម្រេចបានទេ! ការបម្រុងទុករបស់យើងគឺមានអ្វីខ្លះ»។ ប្រមុខរាជរដ្ឋាភិបាល បានថ្លែងបែបនេះ នៅចំពោះមន្ត្រីថ្នាក់ជាតិ និងថ្នាក់ក្រោមជាតិ តំណាងទូតនានាប្រចាំកម្ពុជា ទីភ្នាក់ងារអង្គការសហប្រជាជាតិ វិស័យឯកជន ដៃគូអភិវឌ្ឍន៍ អ្នកសិក្សាស្រាវជ្រាវ និងអង្គការមិនមែនរដ្ឋាភិបាលជាតិ-អន្តរជាតិនៅកម្ពុជា ប្រមាណ៤០០នាក់ ក្នុងពិធីបើកសន្និសីទ«ចក្ខុវិស័យប្រទេសកម្ពុជា ឆ្នាំ២០២២» នៅសណ្ឋាគារសុខាភ្នំពេញ នាព្រឹកថ្ងៃទី៦តុលា។
ជុំវិញនៃការអនុវត្តគោលដៅក្នុងការប្រែកម្ពុជាឱ្យក្លាយប្រទេសចំណូលមធ្យមកម្រិតខ្ពស់ នៅឆ្នាំ២០៣០ និងប្រទេសចំណូលខ្ពស់នៅឆ្នាំ២០៥០នេះ សម្តេច ទាមទារឱ្យគ្រប់ភាគីពាក់ព័ន្ធឱ្យពិភាក្សា និងសិក្សា ក្នុងឋានៈជារាជរដ្ឋាភិបាលដែលយកការគិតគូរជាមុន ដើម្បីឆ្លើយតបទៅនឹងសភាពការណ៍ដែលអាចកើតមាន។ សម្តេចបានបន្ថែមថា៖«[ការឆ្លើយតបនោះ]រាប់ទាំងសភាពការណ៍ ដែលវាមិនទាន់ច្បាស់លាស់ ផងដែរ។ តើ[ពិភពលោក]អាចកើតមានសង្រ្គាមនុយក្លែអ៊ែរ ឬទេ? បើមានការព្រមានជាប្រចាំថ្ងៃយ៉ាងដូច្នេះ!»។
ក្នុងពេលដែលកម្ពុជារងវិបត្តិជំងឺកូវីដ-១៩ បន្ទាត់ភាពក្រីក្រក្នុងប្រទេសកម្ពុជា បានកើនឡើងដល់ប្រមាណ១៨ភាគរយ។ នេះបើយោងតាមសេចក្តីប្រកាសព័ត៌មានរបស់ក្រសួងផែនការ ចុះថ្ងៃទី១៧ វិច្ឆិកា ឆ្នាំ២០២១។
ខ្សែបន្ទាត់ភាពក្រីក្រថ្មី និងអត្រាភាពក្រីក្រនៅកម្ពុជាឆ្នាំ ២០១៩-២០២០» បានបង្ហាញឱ្យដឹងថា ការកំណត់ខ្សែបន្ទាត់ភាពក្រីក្រថ្មីនេះ ប្រើប្រាស់ទិន្នន័យពីការអង្កេតសេដ្ឋកិច្ចកម្ពុជាឆ្នាំ២០១៩-២០២០។ ខ្សែបន្ទាត់ភាពក្រីក្រថ្នាក់ជាតិសម្រាប់កម្ពុជាមានចំនួន ១០ ៩៥១រៀលក្នុងមនុស្សម្នាក់ក្នុងមួយថ្ងៃ ដែលដូចគ្នានឹងការកំណត់បន្ទាត់ភាពក្រីក្រនៅរាជធានីភ្នំពេញ ខណៈ នៅតំបន់ទីប្រជុំជនមានចំនួន ៩ ៥៧១រៀល និង នៅតំបន់ជនបទ មានចំនួន៨ ៩០៨ រៀល សម្រាប់មនុស្សម្នាក់ ក្នុងមួយថ្ងៃ។
ក្រសួងផែនការបានបញ្ជាក់ថា នៅក្រោមខ្សែបន្ទាត់ភាពក្រីក្រថ្មីនេះ មានជិត១៨ភាគរយនៃចំនួនប្រជាជនកម្ពុជាសរុប១៦លាននាក់ ត្រូវបានកំណត់ថាជាអ្នកក្រីក្រ។ អត្រាភាពក្រីក្រប្រែប្រួលគួរឱ្យកត់សម្គាល់ទៅតាមតំបន់។ បើតាមទិន្នន័យរបស់ក្រសួងផែនការ ចាប់តាំងពីឆ្នាំ២០១៤ អត្រាភាពក្រីក្រមានចំនួន១៣,៥ភាគរយ ដែលជាអត្រាភាពក្រីក្រចុងក្រោយមុនមានវិបត្តិកូវីដ-១៩៕
© រក្សាសិទ្ធិដោយ thmeythmey.com
