ក្រោយមកនៅថ្ងៃទី១៥ ខែតុលា ស្នងការដ្ឋាននគរបាលរាជធានីភ្នំពេញក៏បានហៅមន្រ្តីចរាចរណ៍រូបនោះមកសួរនាំ ហើយទទួលវិន័យកងកម្លាំង និងបញ្ជូនទៅអប់រំណែនាំធ្វើកិច្ចសន្យាបញ្ឈរជើង (ផ្អាកការងារ) រយៈពេល៣ខែ។


 

លោក ស ថេត ស្នងការនគរបាលរាជធានីភ្នំពេញ បានបញ្ជាក់ថា មន្រ្តីដែលប្រព្រឹត្តខុសមិនគប្បីណាមួយ  នឹងត្រូវទទួលខុសត្រូវទៅតាមកំហុសរបស់ខ្លួន។ជាក់ស្ដែងដូចករណីលោក ពុត ធារី បានធ្វើកិច្ចសន្យាបញ្ឈរជើងរយៈពេល៣ខែដោយសារប្រើប្រាស់សម្ដី និងកាយវិការមិនសមរម្យជាមួយពលរដ្ឋល្មើសច្បាប់។
 

លោក ស ថេត ប្រាប់សារព័ត៌មានថ្មីៗតាមទូរសព្ទដូច្នេះថា៖«មន្រ្តីដែលធ្វើមិនគប្បីនឹងត្រូវវិន័យកងកម្លាំងតាមកំហុស ទាំងមន្រ្តីចរាចរណ៍ ឬមន្រ្តីនគរបាលក៏ដោយ។
 

ហើយកន្លងមន្រ្តីនគរបាលទាំងអស់ យើងធ្លាប់បានណែនាំពីវិន័យកងកម្លាំងហើយអស់ហើយ»។ លោក បន្តថា ទាំងមន្រ្តីចរាចរណ៍ នគរបាល ត្រូវប្រើប្រាស់សម្ដីសុភាពសមរម្យទៅកាន់ពលរដ្ឋ ទោះក្នុងកាលៈទេសៈណាក៏ដោយ។
 

ទន្ទឹមនឹងនេះ លោក ស ថេតក៏អំពាវនាវដល់ពលរដ្ឋទាំងអស់ចូលរួមគោរពច្បាប់ចរាចរណ៍យោគយល់អធ្យាស្រ័យគ្នាពេលធ្វើដំណើរ ហើយក៏ត្រូវប្រើប្រាស់សម្ដីសុភាពនិងសមរម្យទៅកាន់មន្រ្តីចរាចរណ៍ និងនគរបាលផងដែរ៕