អង្គការ Freedom House របស់សហរដ្ឋអាម៉េរិក បានចេញផ្សាយរបាយការណ៍ឆ្នាំ២០២២ របស់ខ្លួន ស្តីពីសេរីភាពនៅបណ្តាប្រទេស/ដែនដី នានាលើពិភពលោក។ ចំពោះតារាងសេរីភាពសកល កម្ពុជាស្ថិតក្នុងចំណោមប្រទេសដែលគ្មានសេរីភាព និងមានសេរីភាពខ្លះពាក់ព័ន្ធនឹងសេរីភាពអ៊ីនធ័រណិត។
សម្រាប់សេរីភាពសកល (Global Freedom) របាយការណ៍ Freedom House ផ្តោតលើសិទ្ធិនយោបាយ និងសេរីភាពជនស៊ីវិលនៅបណ្តាប្រទេស និងដែនដី ចំនួន២១០។ កម្ពុជាទទួលបានពិន្ទុ ២៤លើ១០០ ដែលជាចំណាត់ថ្នាក់ «គ្មានសេរីភាព» (Not Free)។
របាយការណ៍បានបង្ហាញថា ស៊ីរី តំបន់ទីបេ និងស៊ូដង់ខាងត្បូង មានការរឹតត្បិតសេរីភាពខ្លាំងជាងគេ។ មីយ៉ាន់ម៉ា មានចំណាត់ថ្នាក់លេខ៩ដែលមានលក្ខណៈយ៉ាប់យ៉ឺនស្មើចិន។ រីឯបណ្តាប្រទេសអាស៊ីអាគ្នេយ៍ផ្សេងទៀតដែលស្ថិតក្នុងចំណាត់ថ្នាក់ Not Free ផងដែរនោះ រួមមាន ឡាវ វៀតណាម ព្រុយណេ និងថៃ។
សម្រាប់សេរីភាពសកលនេះដែរ សិង្ហបុរី ម៉ាឡេស៊ី ហ្វីលីពីន និងឥណ្ឌូណេស៊ី ស្ថិតក្នុងចំណាត់ថ្នាក់ប្រទេសដែលមានសេរីភាពខ្លះ (Partly Free)។ រីឯសហរដ្ឋអាម៉េរិក បណ្តាប្រទេសជាច្រើននៅអឺរ៉ុប រួមទាំងតៃវ៉ាន់ ជាប្រទេស/ដែនដីដែលមានសេរីភាព ស្របពេលដែល ស៊ុយអែត ន័រវេស និងហ្វាំងឡង់ មានពិន្ទុល្អខ្ពស់ជាងគេ។
ងាកទៅសេរីភាពអ៊ីនធ័រណិត (Freedom on the Net) ឯណោះវិញ កម្ពុជាទទួលបាន៤៣ពិន្ទុលើ១០០ ដែលបង្ហាញថា មានសេរីភាពផ្នែកខ្លះ ឬសេរីភាពមិនពេញលេញ (Partly Free)។ នៅផ្នែកនេះ អង្គការអាម៉េរិក ផ្តោតលើចំណុច៣សំខាន់គឺឧបសគ្គចូលប្រើប្រាស់ (Obstacles to Access), ការកំណត់មាតិកា (Limits on Content) និងការរំលោភសិទ្ធិអ្នកប្រើប្រាស់ (Violations of User Rights) នៅបណ្តាប្រទេសចំនួន៧០។
ចិន ត្រូវបានវាយតម្លៃថា គ្មានសេរីភាពជាងគេលើការប្រើប្រាស់អ៊ីនធ័រណិត ហើយមីយ៉ាន់ម៉ា ស្ថិតនៅលេខបន្ទាប់។ វៀតណាម និងថៃ ក៏ស្ថិតក្នុងចំណោមប្រទេស គ្មានសេរីភាព (Not Free) ផងដែរ ខណៈឥណ្ឌូណេស៊ី សិង្ហបុរី ម៉ាឡេស៊ី និងហ្វីលីពីន ស្ថិតក្នុងចំណាត់ថ្នាក់ Partly Free ដូចកម្ពុជា។
អ៊ីស្លង់ អេស្តូនី កូស្តារីកា និងកាណាដា ជាប្រទេសដែលមានសេរីភាពអ៊ីនធ័រណិតជាងគេ។ សហរដ្ឋអាម៉េរិក ប្រទេសជាច្រើននៅអឺរ៉ុប កោះតៃវ៉ាន់ ក៏មានស្ថានភាពល្អផងដែរ។
ជាមួយគ្នានេះ Freedom House បានវាស់ស្ទង់ពីកម្រិតប្រជាធិបតេយ្យ (Democracy Scores) នៅប្រទេសចំនួន២៩ពីអឺរ៉ុបកណ្តាល ទៅអាស៊ីកណ្តាល។ របាយការណ៍បង្ហាញថា តួកមីនីស្ថានគ្មានពិន្ទុរាប់ឡើយ ខណៈអាស៊ែបៃហ្សង់, តាជីគីស្ថាន, បេឡារុស, អ៊ូសបេគីស្ថាន រុស្ស៊ី កាហ្សាក់ស្ថាន និងគៀរហ្ស៊ីសស្ថាន ស្ថិតក្នុងចំណាត់ថ្នាក់មិនល្អដូចគ្នា។
អេស្តីនី ឡេតូនី ស្លូវេនី លីទុយអាស៊ី សាធារណរដ្ឋឆេក ស្លូវ៉ាគី ប៉ូឡូញ ប៊ុលហ្គារី រូម៉ានី និងក្រូអាស៊ី ស្ថិតក្នុងចំណោមប្រទេសដែលមានប្រជាធិបតេយ្យខ្ពស់ ខណៈអ៊ុយក្រែន កូសូវ៉ូ ហុងគ្រី ស្ថិតក្នុងចំណោមប្រទេសដែលមានរបបកូនកាត់៕