កាលពីចុងសប្ដាហ៍ទី១ នៃខែតុលា ខេត្តព្រះសីហនុទទួលបានទេសចរជាតិ និងអន្តរជាតិប្រមាណ ១១ម៉ឺននាក់ ខណៈថ្ងៃចុងសប្ដាហ៍ទី២វិញ ឡើងដល់ជាង១២ម៉ឺននាក់។ ទិន្នន័យភ្ញៀវទេសចរនេះ លោក ឡុង ឌីម៉ង់ អភិបាលរងខេត្តព្រះសីហនុ ធ្លាប់ប្រាប់សារព័ត៌មាន ThmeyThmey25 ថា មានតែពិធីបុណ្យជាតិធំៗប៉ុណ្ណោះ ដែលមានរបាយទេសចរច្រើនដូច្នេះ។ 


 អាជ្ញាធរខេត្តព្រះសីហនុ ចុះដាក់ធុងសំរាមស្ងួត នៅបណ្ដោយឆ្នេរអូរឈើទាល២។ រូបភាពពីទំព័រហ្វេសប៊ុក រដ្ឋបាលខេត្តព្រះសីហនុ។ 

ស្របពេលកំណើនចំនួនទេសចរនេះ សណ្ដាប់ធ្នាប់ ពិសេសសន្តិសុខ អនាម័យបរិស្ថាន​ ជារឿងដែលត្រូវយកចិត្តទុកដាក់។ ជុំវិញការរក្សាសន្តិសុខ សណ្ដាប់ធ្នាប់នេះ លោក ឡុង ឌីម៉ង់ បានអះអាងដូច្នេះ៖ «ជាក់ស្ដែងឯកឧត្ដមអភិបាលខេត្ត បានឱ្យគណៈបញ្ជាការក្រុង ស្រុកទាំងអស់ ឱ្យបង្កើនការថែរក្សាសន្តិសុខ សណ្ដាប់ធ្នាប់សាធារណៈ ឱ្យបានគត់មត់ ធ្វើយ៉ាងម៉េចឱ្យទេសចរកម្សាន្តសប្បាយ ដោយគ្មានការភ័យខ្លាច ពីចោរកម្មផ្សេងៗ»។ 
 

ជាមួយគ្នានេះ ការរក្សាសណ្ដាប់ធ្នាប់ សន្តិសុខសាធារណៈនេះ អភិបាលរងខេត្តរូបនេះបញ្ជាក់ទៀតថា អាជ្ញាធរក៏បង្កើនការយកចិត្តដាក់ លើបញ្ហាអនាម័យបរិស្ថាននេះផងដែរ​។ ក្រៅពីយកចិត្តទុកដាក់លើចំណុចខាងលើនេះ អាជ្ញាធរ និងមន្ទីរពាក់ព័ន្ធ ក៏ពង្រឹងលើគុណភាពសេវាកម្ម។ 
  

លោក ឡុង ឌីម៉ង់ រៀបរាប់ពីការពង្រឹងគុណភាពសេវាកម្មទេសចរណ៍បែបនេះ៖ « ការគិតគូរក្នុងការបន្ថែមនូវគុណភាពសេវារបស់យើង ជាពិសេសមន្ទីរទេសចរណ៍ បានណែនាំដល់បណ្ដាភោជនីយដ្ឋាន ដែលជាអាជីវករ (ដើម្បី) បម្រើសេវាឱ្យកាន់តែមានលក្ខណៈល្អប្រសើរ ហើយនឹងមិនឱ្យមានការដំឡើងថ្លៃ»។ 
 

គួរជម្រាបផងដែរថា នៅសប្ដាហ៍ទី២ (ថ្ងៃទី១០ ដល់ទី១៦) ខែតុលានេះ ភ្ញៀវទេសចរដើរកម្សាន្តនៅទូទាំងប្រទេសមានចំនួនជិត១លាននាក់ ក្នុងនោះទេសចរជាតិចំនួន ៩១៤ ៥៤៣នាក់ និង ភ្ញៀវបរទេសផ្ទៃក្នុងមាន ៩៣៨ ៩២៨នាក់។ ដោយឡែកខេត្តព្រះសីហនុទទួលបានទេសចរណ៍ច្រើនលំដាប់ទី២ គឺចំនួន ១៣៩ ៥៩២នាក់៕