លោក អ៊ុ សុភា ប្រធានសហគមន៍កសិកម្មសាមគ្គីតំបែរ បានប្រាប់សារព័ត៌មានThmeyThmey25 ឱ្យដឹងថា ស្វាយ ដែលនាំចេញជាប្រភេទស្វាយកែវរមៀត ឬស្វាយទីផ្សារ។ ចំពោះលក្ខខណ្ឌនាំចេញ ភាគីចិនតៃវ៉ាន់ មិនទាមទារច្រើនឡើយ ដោយតម្រូវឱ្យស្វាយនាំចេញជាស្វាយលេខ១ និង លេខ២ ដែលបានបាញ់សម្លាប់សត្វល្អិតត្រឹមត្រូវ។ 


   ចិនបានចុះទៅចម្ការសហគមន៍កសិកម្មសាមគ្គីតំបែរ ក្នុងខេត្តត្បូងឃ្មុំ។​ រូបភាព៖ ហ្វេសប៊ុនផេក សហគមន៍កសិកម្មសាមគ្គីតំបែរ

 

ការនាំចេញនេះ មានតម្លៃ១២០០រៀល ក្នុង១គីឡូក្រាម។ លោក សុភា យល់ថា តម្លៃស្វាយ ដែលទទួលបាននៅមិនទាន់ខ្ពស់ដូចតម្រូវការទីផ្សារឡើយ ដ្បិតការនាំចេញស្វាយនៅខែវិច្ឆិកា និងខែធ្នូ ជាធម្មតាមានតម្លៃ ១៥០០រៀល ឬ ២ពាន់រៀល។ 
 

«តម្លៃស្វាយ គឺមិនទាន់សមរម្យទេ ចំពោះស្វាយក្នុងខែ១១ ខែ១២នេះ ប៉ុន្តែយើងត្រូវតែធ្វើ។ វាគ្រាន់បើជាង១គីឡូក្រាម ២០០រៀល ឬ៣០០រៀល។ អ៊ីចឹងតម្លៃប៉ុណ្ណឹងវាមិនទាន់សមរម្យទេ តែយើងអាចទទួលយកបាន»។ នេះជាការលើកឡើងរបស់លោក អ៊ុ សុភា ប្រធានសហគមន៍កសិកម្មសាមគ្គីតំបែរ។ 
 

យ៉ាងណាមិញ លោកក៏រីករាយចំពោះតម្លៃដែលទទួលបាន ព្រោះទីផ្សារស្វាយនៅកម្ពុជាមិនទាន់មានលំនឹងឡើយ។ មិនតែប៉ុណ្ណោះ លោកក៏ចង់បានកុងត្រានៅឆ្នាំបន្តទៀត បើសិនតម្លៃស្វាយអាចថេរក្នុងតម្លៃ ១២០០រៀននេះ។ 
 

គួរបញ្ជាក់ផងដែរថា បច្ចុប្បន្ន សហគមន៍កសិកម្មសាមគ្គីតំបែរ មានផ្ទៃដីដាំដុះស្វាយសម្រាប់ផ្គត់ផ្គង់ទៅទីផ្សារក្រៅស្រុក ១៣៨ហិកតា ក្នុងស្រុកតំបែរ ខេត្តត្បូងឃ្មុំ។ ក្រៅពីការនាំចេញទៅទីផ្សារតៃវ៉ាន់ សហគមន៍កសិកម្មសាមគ្គីតំបែរ ក៏ធ្លាប់នាំចេញស្វាយទៅកាន់ទីផ្សារប្រទេសថៃ និងវៀតណាមផងដែរ៕