អគ្គលេខាធិការអាស៊ាន ត្រូវតែជាជាតិសាសន៍របស់រដ្ឋមួយក្នុងចំណោមរដ្ឋសមាជិកអាស៊ានទាំង១០ ហើយការតែងតាំងត្រូវធ្វើឡើងក្នុងអំឡុងកិច្ចប្រជុំកំពូលអាស៊ាន ដោយផ្អែកលើលំដាប់អក្សរក្រមនៃប្រទេសសមាជិក។ 

 

មាត្រា១១ នៃធម្មនុញ្ញអាស៊ាន ចែងពីលក្ខណៈវិនិច្ឆ័យនៃអគ្គលេខាធិការអាស៊ាន ដោយគិតលើសុចរិតភាព សមត្ថភាព បទពិសោធវិជ្ជាជីវៈ និងសមភាពយេនឌ័រ។ កិច្ចការប្រចាំថ្ងៃរបស់អគ្គលេខាធិការអាស៊ានត្រូវបានជួយដោយអគ្គលេខាធិការរងចំនួនបួននាក់ ដែលជួយការងារតាមសសរស្ដម្ភរបស់អាស៊ាន។ អគ្គលេខាធិការរងទាំងបួនត្រូវមានសញ្ជាតិខុសគ្នាពីអគ្គលេខាធិការ និងមកពីរដ្ឋសមាជិកអាស៊ានចំនួនបួនផ្សេងៗគ្នា។

 

តាមធម្មនុញ្ញអាស៊ាន តួនាទីរបស់អគ្គលេខាធិការអាស៊ានមានដូចជាអនុវត្តភារកិច្ច និងទំនួលខុសត្រូវរបស់ការិយាល័យជាន់ខ្ពស់នេះ ស្របតាមបទប្បញ្ញត្តិនៃធម្មនុញ្ញ និងច្បាប់ផ្សេងៗរបស់អាស៊ាន និងការអនុវត្តផ្សេងទៀតដែលបានបង្កើតឡើងដោយអាស៊ាន, សម្របសម្រួល និងតាមដានដំណើរការក្នុងការអនុវត្ត ការសម្រេចចិត្ត និងកិច្ចព្រមព្រាងផ្សេងៗ និងបញ្ជូនរបាយការណ៍ប្រចាំឆ្នាំទៅក្នុងកិច្ចប្រជុំកំពូលអាស៊ាន។

 

លើសពីនោះ អគ្គលេខាធិការអាស៊ាន ក៏ចូលរួមក្នុងកិច្ចប្រជុំដូចជា កិច្ចប្រជុំកំពូលអាស៊ាន ក្រុមប្រឹក្សាសហគមន៍អាស៊ាន ក្រុមប្រឹក្សាសម្របសម្រួលអាស៊ាន និងគណៈរដ្ឋមន្ត្រីតាមវិស័យអាស៊ាន និងកិច្ចប្រជុំពាក់ព័ន្ធផ្សេងទៀតរបស់អាស៊ាន, បង្ហាញទស្សនៈរបស់អាស៊ាន និងចូលរួមក្នុងកិច្ចប្រជុំជាមួយភាគីខាងក្រៅ ដោយអនុលោមតាមគោលការណ៍ណែនាំដែលបានអនុម័ត និងអាណត្តិដែលផ្តល់ឱ្យអគ្គលេខាធិការ និងផ្តល់ការណែនាំក្នុងការតែងតាំង និងបញ្ចប់តំណែងអគ្គលេខាធិការរងទៅកាន់ក្រុមប្រឹក្សាសម្របសម្រួលអាស៊ានសម្រាប់អនុម័តបន្ត។ 

 

អគ្គលេខាធិការអាស៊ានដំបូង គឺលោក Hartono Dharsono ដែលជាជនជាតិឥណ្ឌូនេស៊ី នៅថ្ងៃទី៧ ខែមិថុនា ឆ្នាំ១៩៧៦។ ចំណែក អគ្គលេខាធិការអាស៊ានបច្ចុប្បន្ន គឺលោក លឹម ចុកហ៊ុយ ដែលជាជនជាតិព្រុយណេ។ រីឯ កម្ពុជាបានតែងតាំងលោក កៅ គឹមហួន ជាអគ្គលេខាធិការអាស៊ានបន្ទាប់ ចាប់ពីឆ្នាំ២០២៣៕