អង្គការ WWF ប្រចាំកម្ពុជា បានបញ្ជាក់ថា ការផ្ទុះឡើងនៃជំងឺឆ្លង ដូចជា ជំងឺផ្លូវដង្ហើម SARS, ជំងឺផ្លូវដង្ហើមមជ្ឈិមបូព៌ា MERS, ជំងឺផ្តាសាយជ្រូក H1N1, ជំងឺគ្រុនផ្តាសាយបក្សី H5N1 ជាដើម សុទ្ធតែជាជំងឺឆ្លងពីសត្វទៅមនុស្ស។ នៅពេលបរិភោគម្ហូបសាច់សត្វព្រៃមួយចាន ក្រៅពីការប្រឈមនឹងហានិភ័យសុខភាពចំពោះខ្លួនឯង  អ្នកបរិភោគ ក៏អាចបង្កហានិភ័យដល់អ្នកដទៃផងដែរ។ ការបរបាញ់ ការដឹកជញ្ជូន ការជួញដូរ និង ការកែច្នៃ សុទ្ធសឹងតែជាកត្តាបង្កឱកាសសម្រាប់ការប៉ះពាល់សត្វព្រៃដោយផ្ទាល់ និងអាចចម្លងមេរោគទៅមនុស្ស។ 

 

ដោយមើលឃើញពីផលប៉ះពាល់សុខភាព និងការដាក់អន្ទាក់សត្វព្រៃ ដើម្បីលក់ដូរលើទីផ្សារមានចំនួនច្រើននៅកម្ពុជា ក្រសួងបរិស្ថាន និង អង្គការWWF និងដៃគូរសំខាន់ៗ បានសហការរៀបចំយុទ្ធនាការបញ្ឈប់ការជួញដូរសត្វព្រៃឡើងក្នុងគោលបំណង ការពារធនធានសត្វព្រៃកម្ពុជាឲ្យបានគង់វង្ស និង រួមចំណែកដល់កិច្ចគាំពារសុខភាពសាធារណៈ។ 

 

ការលក់ដូរសាច់សត្វព្រៃមានវត្តមានច្រើននៅក្នុងខេត្តមណ្ឌលគិរី និងរតនគិរី។ ក្នុងពិធីផ្សព្វផ្សាយយុទ្ធនាការអន្ទាក់សូន្យក្នុងខេត្តមណ្ឌលគិរី លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន បានលើកឡើងថា រដ្ឋបាលខេត្តមណ្ឌលគិរី បង្រា្កបបានសាច់សត្វព្រៃចំនួន ១  ៣៥៣គីឡូក្រាម។ ត្រឹម៦ខែ ឆ្នាំ២០២២ ខេត្តមណ្ឌលគិរី បង្រ្កាបបានសាច់សត្វព្រៃចំនួន ២៣៥គីឡូក្រាម។

 

លោក នេត្រ ភក្រ្តា បានថ្លែងដូច្នេះ៖ «អ្វីដែលយើងចង់ឃើញ មិនមែនឃើញអំពីសត្វដែលត្រូវបានប្រលះ សាច់យកមកលក់នៅលើទីផ្សារ ឬក៏ជាគ្រឿងសំណាកដែលដាក់លក់នៅលើទីផ្សារទេ។ អ្វីដែលសំខាន់ ភាពជោគជ័យរបស់យើង គឺការទប់ស្កាត់បាន និងការថែរក្សាសត្វព្រៃដែលរស់រានមានជីវិត នៅក្នុងតំបន់ការពារធម្មជាតិ»។ 

 

បើតាមអង្គការ WWF ចាប់ពីឆ្នាំ២០២១ ក្នុងរយៈពេល១៨ខែចុងក្រោយនេះ  ក្រុមអនុវត្តច្បាប់នៅក្នុងខេត្តមណ្ឌលគិរី រឹបអូសបានសាច់សត្វព្រៃសរុបចំនួន ១, ៣៥២គីឡូក្រាម ខណៈសាច់សត្វព្រៃទាំងនោះបានស្ថិតនៅក្នុងទីផ្សារការជួញដូរ។ ក្នុងនោះ ភាគច្រើនជាសាច់សត្វឈ្លូស ជ្រូកព្រៃ និងត្រកួត។ 

 

ការសិក្សាមួយរបស់ក្រសួងបរិស្ថាន និងអង្គការ WWFកម្ពុជា បានបង្ហាញថា ក្នុងចន្លោះឆ្នាំ២០១០ ដល់ ឆ្នាំ២០២២ ចំនួនសត្វព្រៃប្រភេទក្រចកជើងចំពាម បានថយចុះគួរឲ្យកត់សម្គាល់ នៅតំបន់ទេសភាពភាគខាងកើតក្នុងប្រទេសកម្ពុជា។ ក្នុងនោះ សត្វទន្សោងថយចុះ៨៩% ឈ្លូសថយចុះ៦៥% និងជ្រូកព្រៃថយចុះ១៥%៕