កន្លងមក ធនាគារពិភពលោគ្រោងផ្ដល់ជំនួយឱ្យអ៊ុយក្រែនសម្រាប់កសាងប្រទេស និងបំពេញតម្រូវការចាំបាច់បន្ទាន់ផ្សេងៗចំនួន១៣ពាន់លានដុល្លារ ដែលបានតាមការប្រមូលពីបណ្ដាប្រទេសនានា។ មកទល់ពេលនេះ លុយជំនួយដែលបានដល់ដៃអ៊ុយក្រែនសរុបមាន១១ពាន់លានរួចទៅហើយ។ គម្រោងប្រមូលជំនួយមនុស្សធម៌ធ្វើឡើងដើម្បីជួយអ៊ុយក្រែនដោះស្រាយការចំណាយសាធារណៈបន្ទាន់ក្នុងសង្គមដូចជាវិស័យសុខាភិបាល ការអប់រំ និងការការពារសង្គម។ 
 

ធនាគារពិភពលោក នៅថ្ងៃ២៤ ខែតុលា បានប្រកាសជាថ្មីថាខ្លួនបានផ្ដល់ជំនួយបន្ថែមជាង ៥០០លានដុល្លារទៅឱ្យអ៊ុយក្រែន។ ការផ្ដល់ជំនួយនេះធ្វើឡើងមុនថ្ងៃសន្និសីទទីក្រុងបែរឡាំងមួយថ្ងៃ ដែលមេដឹកនាំតាមបណ្ដាប្រទេស និងក្រុមអ្នកជំនាញផ្នែកអភិវឌ្ឍន៍ ជួបជុំពិភាក្សាអំពីវិធីកសាងអ៊ុយក្រែនឡើងវិញបន្ទាប់ពីការលុកលុយរបស់រុស្ស៊ី។ 
 

ប្រធានធនាគារពិភពលោក លោក David Malpass លើកឡើងថា ការឈ្លានពានរបស់រុស្ស៊ីនៅតែបន្តបង្កឱ្យមានការបំផ្លិចបំផ្លាញយ៉ាងច្រើនលើហេដ្ឋារចនាសម្ព័ន្ធរបស់អ៊ុយក្រែន រួមទាំងបណ្តាញទឹក អនាម័យ និងបណ្តាញអគ្គិសនី ខណៈដែលរដូវរងាកំពុងខិតជិតមកដល់ផង កាន់តែធ្វើឱ្យមានគ្រោះថ្នាក់ដល់ប្រជាជនអ៊ុយក្រែនបន្ថែមទៀត។ 
 

«កញ្ចប់លុយជំនួយថ្មីដែលបញ្ចេញនៅថ្ងៃនេះនឹងត្រូវប្រើដើម្បីរក្សាសេវាសំខាន់ៗរបស់រដ្ឋាភិបាល។ យើង​ឈរយ៉ាង​រឹងមាំ​​គាំទ្រ​ប្រជាជន​អ៊ុយក្រែន ស្របពេល​ពួកគេ​ប្រឈម​មុខ​នឹង​វិបត្តិ​ដែល​គ្មាន​អ្វីប្រៀបបាន​នេះ»។ លោក Malpass ថ្លែងបែបនេះនៅក្នុងសេចក្តីថ្លែងការណ៍មួយ។
 

ធនាគារពិភពលោក រួមទាំងរដ្ឋាភិបាលអ៊ុយក្រែន និងគណៈកម្មាធិការអឺរ៉ុបបានលើកឡើងក្នុងរបាយការណ៍មួយដែលបានចេញផ្សាយកាលពីខែកញ្ញាថា ការឈ្លានពានរបស់រុស្ស៊ីបានបណ្តាលឱ្យខូចខាតទ្រព្យសម្បត្តិជាតិអ៊ុយក្រែនមានតម្លៃស្មើនឹង៩៧ពាន់លានដុល្លារ ហើយការកសាងឡើងវិញនឹងអាចចំណាយប្រាក់ជិត៣៥០ពាន់លានដុល្លារឯណោះ៕