អ្នកនយោបាយជើងចាស់លោកស្រី Sun Chunlan ដែលកាន់តំណែងជាឧបនាយករដ្ឋមន្ត្រីមើលការខុសត្រូវលើគោលនយោបាយសុខភាព បានអវត្តមានពីបញ្ជីគណៈមជ្ឈិម​។ ការអវត្តមាននេះ មានន័យថថា លោកស្រីត្រូវចូលនិវត្តន៍។ លោកស្រី Sun Chunlan​ ដែលមានវ័យ៧២ឆ្នាំ ជាស្ត្រីតែម្នាក់គត់នៅក្នុងការិយាល័យនយោបាយដែលជាស្ថាប័នធ្វើសេចក្តីសម្រេចចិត្តរបស់បក្ស។

ជារឿយៗបន្ទាប់ពីត្រូវបានបញ្ជូនទៅត្រួតពិនិត្យទីក្រុងនានារបស់ចិនក្នុងការទប់ទល់នឹងការរីករាលដាលនៃជំងឺកូវីដ-១៩ លោកស្រី Sun ដែលជាអតីតលេខាបក្សនៃខេត្ត Fujian និងក្រុង Tianjin បានក្លាយជានិមិត្តរូបនៃការអនុវត្តគោលនយោបាយកូវីដ-១៩ របស់ចិន ហើយទទួលបានរហស្សនាមថា ស្ត្រីដែករបស់ចិនផងដែរ។
 

ជា​គណបក្សនយោបាយដ៏ធំបំផុតលើពិភពលោកដែលមានសមាជិកសកម្មជាង ៩៦ លាននាក់ ក្នុងបក្សកុម្មុយនិស្តចិនស្ត្រីមិនដែលកាន់អំណាចច្រើនទេ។ ស្រ្តីមានចំនួនតែ៥ភាគរយបុណ្ណោះនៃគណៈមជ្ឈិមបក្សថ្មីដែលមានសមាជិក២០៥រូប ខណៈដែលគណៈអចិន្ត្រៃយ៍ដែលមានសមាជិក៧រូបដែលក្តាប់អំណាចកំពូលរបស់ប្រទេសជាបុរសទាំងអស់។ 
 

ការិយាល័យនយោបាយដែលជាស្ថាប័នធ្វើសេចក្តីសម្រេចប្រតិបត្តិរបស់គណបក្សចិននេះបានទទួលយកស្ត្រីតែ៦នាក់ប៉ុណ្ណោះ ចាប់តាំងពីឆ្នាំ១៩៤៨ មក ហើយមានតែ៣នាក់ប៉ុណ្ណោះក្នុងចំណោមនោះ បានក្លាយជាឧបនាយករដ្ឋមន្ត្រីហើយគ្មានស្ត្រីណាម្នាក់បានចូលក្នុងគណៈអចិន្ត្រៃយ៍ឡើយ​៕