លោក ង្វៀន ភូជុង នឹងក្លាយជាមេដឹកនាំបក្សកុម្មុយនីស្តវៀតណាមដំបូងគេដែលនឹងទៅទស្សនកិច្ចនៅចិន បន្ទាប់ពីបក្សកុម្មុយនីស្តចិនបញ្ចប់សមាជបក្សលើកទី២០។ នៅបញ្ចប់សមាជបក្សថ្ងៃទី២៣ ខែតុលា បក្សកុម្មុយនីស្តចិន រើសក្បាលម៉ាស៊ីនដឹកនាំថ្មី ខណៈលោក ស៊ី ជិនភីងដែលជាប្រធានាធិបតីចិនផង បន្តតំណែងជាអគ្គលេខាបក្សសម្រាប់អាណត្តិទីបី។

 

មេដឹកនាំបក្សកុម្មុយនីស្តវៀតណាមស្ថិតក្នុងចំណោមរដ្ឋកុម្មុយនីស្តដទៃទៀតដែលបានផ្ញើសារអបអរសាទរមេដឹកនាំចិននៅថ្ងៃទី ២៣ ខែតុលា។ លោក ង្វៀន ភូជុង បង្ហាញការកោតសរសើរជាខ្លាំងចំពោះការរួមចំណែករបស់លោក ស៊ី ក្នុងការពង្រឹងទំនាក់ទំនងរវាងវៀតណាម និងចិន ក៏ដូចជាបញ្ជាក់ពីគោលបំណងចង់ឱ្យទំនាក់ទំនងប្រទេសទាំងពីរឈានដល់កម្រិតមួយថ្មីដែលបំពេញនូវផលប្រយោជន៍ភាគីទាំងពីរដើម្បីសន្តិភាព ស្ថិរភាព កិច្ចសហប្រតិបត្តិការ ព្រមទាំងការអភិវឌ្ឍទាំងតំបន់ និងពិភពលោក។ 

 

ដូចលោក ស៊ី ដែរ លោក ភូជុង កាន់តំណងកំពូលនេះសម្រាប់អាណត្តិទីបីហើយដែលលើសពីកាលកំណត់មានត្រឹម២អាណត្តិប៉ុណ្ណោះ។ ការលើកលែង​ឱ្យបន្តអាណត្តិចំពោះមេដឹកនាំបក្សទាំងវៀតណាម និងចិននេះធ្វើឱ្យបុគ្គលទាំងពីរកាន់តែមានឥទ្ធិពលក្នុងបក្សដែលដើមឡើយការជ្រើសរើសប្រធានបក្សថ្មីផ្អែកលើការយល់ព្រមជាឯកច្ឆន្ទពីសមាជិកការិយាល័យនយោបាយ និងមជ្ឈិមបក្សជាដើម។

 

បើទោះបក្សកុម្មុយនីស្តចិន និងវៀតណាមរក្សាភាពជិតស្និទ្ធ ប្រទេសទាំងពីរក៏មិនសូវទុកចិត្តគ្នាប៉ុន្មានដែរ ក៏ដូចជាជម្លោះដែនទឹកនៅសមុទ្រចិនខាងត្បូងជាដើម។

 

ក្រៅពីទំនាក់ទំនងការទូត វៀតណាមគឺជាដៃគូពាណិជ្ជកម្មដ៏ធំបំផុតរបស់ចិននៅអាស៊ាន និងធំបំផុតទី៦លើសកលលោក។ បើតាមអគ្គនាយកដ្ឋានគយវៀតណាម ពាណិជ្ជកម្មរវាងប្រទេសទាំងពីរឈានដល់ជាង ១៦៥ ពាន់លានដុល្លារក្នុងឆ្នាំ២០២១ ដែលកើនជិត ២៥ ភាគរយបើធៀបនឹងឆ្នាំ២០២០៕