Miss Grand៖ កម្ពុជាជាប់ Top 10, ថៃលេខ២, ឥណ្ឌូណេស៊ីលេខ៣ និងវៀតណាមឈ្នះពាន២

ជាតិ

Miss Grand៖ កម្ពុជាជាប់ Top 10, ថៃលេខ២, ឥណ្ឌូណេស៊ីលេខ៣ និងវៀតណាមឈ្នះពាន២

26, Oct 2022 , 12:29 pm

រូបភាព

ដោយ: រួបរួម

បវរកញ្ញាកម្ពុជា ពេជ្រ វត្តីសារ៉ាវឌ្ឍី ជាប់ក្នុងចំណោមបេក្ខនារីកំពូលទាំង១០ ឬជើងឯករងទី៥ស្ទួន នៃព្រឹត្តិការណ៍ប្រកួតប្រជែងបវរកញ្ញា Miss Grand International ឆ្នាំ២០២២ ដែលរៀបចំនៅក្រុង Bogor Regency ខេត្ត West Java ប្រទេសឥណ្ឌូណេស៊ី។ នេះជាការសម្រេចបានពីរឆ្នាំជាប់គ្នាក្នុងតារាង Top 10 សម្រាប់បវរកញ្ញាតំណាងកម្ពុជា បន្ទាប់ពីបវរកញ្ញា ប៉ូគឹមថេង សុតធីតា សម្រេចបានកាលពី Miss Grand International កាលពីឆ្នាំ២០២១។

អាយុ២៣ឆ្នាំ មកពីខេត្តព្រះសីហនុ កញ្ញា ពេជ្រ វត្តីសារ៉ាវឌ្ឍី ដែលជាអ្នកបង្ហាញម៉ូត និងជាតារាសម្តែងមួយរូប បានក្លាយជាបេក្ខនារីតំណាងកម្ពុជាសម្រាប់ព្រឹត្តិការណ៍ Miss Grand International 2022 ក្រោយនាងបានគ្រងមកុដថ្នាក់ជាតិ (Miss Grand Cambodia 2022)។

ពេជ្រ វត្តីសារ៉ាវឌ្ឍី ស្ថិតក្នុងចំណោមបេក្ខនារី៦៨រូបពីបណ្តាប្រទេសនានាដែលប្រកួតប្រជែងមកុដ Miss Grand International 2022 នៅឥណ្ឌូណេស៊ី។ ក្រៅពីជាប់ក្នុងចំណោម Top 10 (ឬ 5th runners-up) សម្រាប់ព្រឹត្តិការណ៍ទាំងមូល បវរកញ្ញាតំណាងកម្ពុជារូបនេះ បានជាប់ Top 10 លើការប្រកួតប្រជែងផ្នែកសម្លៀកបំពាក់ងូតទឹក (Best in Swimsuit) និង Top 20 លើវិញ្ញាសាសម្លៀកបំពាក់ប្រពៃណី (Best National Costumes)។

ម្ចាស់មកុដ Miss Grand International 2022 បានទៅលើបវរកញ្ញាប្រេស៊ីល Isabella Menin ដែលត្រូវបន្តតំណែងពីបវរកញ្ញាវៀតណាម Nguyen Thuc Thu Tien។ បរវកញ្ញាថៃ Engfa Waraha ជាប់បវរកញ្ញាឯករងទី១ បវរកញ្ញាម្ចាស់ផ្ទះឥណ្ឌូណេស៊ី Andina Julie រងទី២ បវរកញ្ញាវេណេស៊ុយអេឡា Luseth Materan រងទី៣ និងបវរកញ្ញាឆេក Mariana Beckova រងទី៤។

បវរកញ្ញា៤រូបទៀត ដែលស្ថិតក្នុង Top 10 ឬរងទី៥ស្ទួន ជាមួយបវរកញ្ញា ពេជ្រ វត្តីសារ៉ាវឌ្ឍី រួមមានបវរកញ្ញាកូឡុំប៊ី Priscilla Londono, បវរកញ្ញាម៉ូរីស Yuvna Rinishta, បវរកញ្ញាព័រតូរីកូ Oxana Rivera និងបវរកញ្ញាអេស្ប៉ាញ Hirisley Jimenez។ បវរកញ្ញាហ្វីលីពីន Roberta Tamondong និងបវរកញ្ញាវៀតណាម Doan Thien An ជាប់ក្នុងចំណោម Top 20។

សម្រាប់ Doan Thien An ក្រៅពីស្ថិតក្នុងចំណោម Top 20 បវរកញ្ញាវៀតណាមរូបនេះ ឈ្នះពានពិសេសដល់ទៅ២តែម្នាក់ឯងក្នុងនោះ មាន Country’s Power of the Year និង Best National Costumes រួមជាមួយបវរកញ្ញាថៃ Engfa Waraha, បវរកញ្ញាប៉េរូ Janet Leyva និងបវរកញ្ញាចក្រភពអង់គ្លេស Sofia Mayers។

សម្រាប់រង្វាន់ផ្សេងទៀត បវរកញ្ញាម៉ូរីស Yuvna Rinishta ឈ្នះ Miss Popular Vote, បវរកញ្ញាឆេក Mariana Beckova ឈ្នះ Miss Social Media, បវរកញ្ញាម៉ិកស៊ិក Laysha Salazar ឈ្នះ Best in Evening Gown រីឯអ្នកស្រី Pham Kim Dung នាយិការៀបចំ Miss Grand Vietnam បានពាន Golden Grand Award ខណៈ Eriko Inoda ពីជប៉ុន និង Vicente Gonzalez បាន Silver Grand Award។

Miss Grand International ជាព្រឹត្តិការណ៍ប្រកួតបវរកញ្ញាអន្តរជាតិប្រចាំឆ្នាំ ដែលផ្តួចផ្តើមដោយអ្នកជំនួញល្បីឈ្មោះជនជាតិថៃ លោក Nawat Itsaragrisil តាំងពីឆ្នាំ២០២៣មក។ កម្ពុជាចាប់ផ្តើមចូលរួមប្រកួតប្រជែងនៅឆ្នាំ២០១៤ តែខកខាននៅឆ្នាំ២០១៦ និងឆ្នាំ២០១៩។

នៅឆ្នាំ២០១៦ កញ្ញា ហេង ចន្ថា បានខកខានរួមជាមួយបវរកញ្ញា Rose Paul របស់ហៃទី និង Zeenus Lama របស់ណេប៉ាល់ ដោយសារតែការមិនទទួលបានទិដ្ឋាការទៅកាន់ទឹកដីសហរដ្ឋអាមេរិក។ រីឯនៅឆ្នាំ២០១៩ កញ្ញា ដេត ស្រីនាឌ បានប្រកាសពីការដកខ្លួន ដោយសារតែការព្រួយបារម្ភបញ្ហាអសនិ្តសុខនៅប្រទេសវ៉េណេស៊ុយអេឡា។

សម្រាប់ការប្រកួតប្រជែងកន្លងមក បវរកញ្ញា នូ ទឹមស្រីនាថ (ឆ្នាំ២០១៤), បវរកញ្ញា សេង ប៉ូលវិថាវី (ឆ្នាំ២០១៥), បវរកញ្ញា ខ្លឹម ស្រីគា (ឆ្នាំ២០១៧), បវរកញ្ញា ឌី លីកា (ឆ្នាំ២០១៨), បវរកញ្ញា លីវ ជីលី (ឆ្នាំ២០២០) និងបវរកញ្ញា ប៉ូគឹមថេង សុតធីតា (ឆ្នាំ២០២១)។

ពេជ្រ វត្តីសារ៉ាវឌ្ឍី និង ប៉ូគឹមថេង សុតធីតា បានជាប់ Top 10 រីឯ លីវ ជីលី បានជាប់ Top 20។ ក្រៅពីនេះ បវរកញ្ញាដែលតំណាងកម្ពុជាក៏បានឈ្នះពានឯកត្តជនមួយចំនួនផងដែរ ដោយ នូ ទឹកស្រីនាថ និង ប៉ូគឹមថេង សុតធីតា បានពាន Miss Popular Vote។

ក្រៅពីឈ្នះពាន Grand Pageant’s Choice តាមរយៈការបោះឆ្នោតដូច ខ្លឹម ស្រីគា និង ឌី លីកា កញ្ញា ជីវ ជីលី ក៏បានឈ្នះពាន Country’s Choice of the Year ផងដែរ នាការប្រកួតកាលពីឆ្នាំ២០២០ នៅប្រទេសថៃ។

ម្ចាស់មកុដ Miss Grand International ដំបូង បានលើបវរកញ្ញាព័រតូរីកូ Janelee Chaparro (ឆ្នាំ២០១៣) បន្ទាប់មក បវរកញ្ញាគុយបា Lees Garcia (ឆ្នាំ២០១៤), បវរកញ្ញាអូស្ត្រាលី Claire Elizabeth Parker (ឆ្នាំ២០១៥), បវរកញ្ញាឥណ្ឌូណេស៊ី Ariska Putri Pertiwi (ឆ្នាំ២០១៦), បវរកញ្ញាប៉េរូ Maria Jose Lora (ឆ្នាំ២០១៧), បវរកញ្ញាប៉ារ៉ាហ្គាយ Clara Sosa (ឆ្នាំ២០១៨), បវរកញ្ញាវេណេស៊ុយអេឡា Valentina Figuera (ឆ្នាំ២០១៩), បវរកញ្ញាអាម៉េរិក Abena Appiah (ឆ្នាំ២០២០), បវរកញ្ញាវៀតណាម Nguyen Thuch Thuy Tien (ឆ្នាំ២០២១) និងចុងក្រោយបវរកញ្ញាប្រេស៊ីល Isabella Menin (ឆ្នាំ២០២២)៕