ការប្រកួតរបស់ក្រុមនិស្សិតមកពីសកលវិទ្យាល័យពិតជាមានជំនាញក្នុងការកាត់បាល់ បញ្ចូនបាល់និងការពារបានយ៉ាងល្អ។ កីឡាករនៃក្រុមនីមួយៗ ព្យាយាមទប់គ្នាទៅវិញទៅមក ដើម្បីដណ្តើមបាល់ និងរកទីតាំងល្អក្នុងការស៊ុតបញ្ជូលបាល់។ ចំណែកក្រុមវិទ្យាល័យវិញ មើលទៅក៏គួរឲ្យរំភើបដូចគ្នាដែរ ពួកគេបានដណ្តើមបាល់ និងការពារបាល់ចេញពីការប្រយុទ្ធរបស់ដៃគូ បានយ៉ាងល្អ ហើយអាចបោះបាល់ចូល   កន្រ្តកក្នុងរយៈចម្ងាយឆ្ងាយបានយ៉ាងងាយស្រួលដើម្បីទទួលបានពិន្ទុបន្ថែម។ ពេលខ្លះការស៊ុតបាល់មួយគ្រាប់ៗ និង ពិន្ទុប្រកៀកប្រកិតគ្នារវាងគូប្រកួតនីមួយៗ បានធ្វើឲ្យបេះដូងអ្នកទស្សនាញាប់ញ័រគ្រប់ៗគ្នានឹងពោរពេញទៅដោយការស្រែកហូរពីសំណាក់អ្នកគាំទ្រកងរំពងពេញទីលាន ធ្វើឱ្យបរិយាកាសនៃការប្រកួតពិតជាមានភាពរំភើបរីករាយមែនទែន។  

 

ការប្រកួតរបស់ក្រុមមហាជននារី ក៏មិនអន់ជាងបុរសដែរ ដែលពួកគាត់ បានព្យាយាមបញ្ចេញអស់កម្លាំងកាយចិត្តក្នុងការប្រកួតដើម្បីបន្តឈានទៅរកជ័យជម្នះនៅវគ្គបន្ត ដែលធ្វើឲ្យអ្នកទស្សនាបានទះដៃអបអរសាទរកងរំពងពេញពហុកីឡដ្ឋាន ទន្ទឹមនឹងការប្រកួតរបស់មហាជនបុរស មានភាពប្រជែងគ្នាខ្លាំងក្លា ចលនានៃការលេងពោរពេញទៅដោយភាពរហ័សរហួននឹង សាមគ្គី និងភាពឆ្លាតវៃក្នុងការគ្រប់គ្រងការប្រកួតនេះ​។ ការ​ប្រកួត​ប្រជែងដ៏​ខ្លាំងក្លា ​មិនថាក្រុមណានោះទេ គ្រប់ការប្រកួតគ្រប់វិញ្ញាសាតែងតែផ្ទុះសំឡេងហ៊ោកញ្ជ្រៀវជានិច្ចរាល់គ្រាប់បាល់ដែលបានស៊ុតបញ្ចូល។ 

 

ជាលទ្ធផលនៃការប្រកួតជម្រុះនេះ មានតែ ៨ ក្រុមប៉ុណ្ណោះនៃវិញ្ញាសា ដែលអាចឡើងទៅវគ្គបន្ត ក្នុងវគ្គ ៨ក្រុមចុងក្រោយនៃវិញ្ញាសានីមួយៗ ហើយការប្រកួតនិង បន្តទៅ វគ្គពាក់​កណ្តាល​ផ្តាច់​ព្រ័ត្រ ​ នឹងវគ្គផ្តាច់ព្រ័ត្រ ​ដណ្តើមយក​ជើងឯក និង​​ជើងឯករង ។ ចំណែកក្រុមដែល​ចាញ់​ទាំង​ពីរ​នៃវគ្គពាក់កណ្តាលផ្តាច់ព្រ័ត្រ នឹងត្រូវប្រកួត​គ្នា​យក​ចំណាត់​ថ្នាក់​លេខ​៣ផងដែរនៃវិញ្ញាសានីមួយៗ។

 

ការប្រកួតពាក់កណ្តាលផ្តាច់ព្រ័ត្រ និងវគ្គផ្តាច់ព្រ័ត្រ នឹងធ្វើឡើងនៅថ្ងៃទី២៩ តុលា ឆ្នាំ២០២២ ចាប់ពីវេលាម៉ោង ៨ព្រឹក នៅពហុកីឡដ្ឋានជាតិអូឡាំពិក។

 

         សូមមើលតារាងជើងខ្លាំង៨ក្រុមនៃវិញ្ញាសានីមួយៗ បន្ទាប់ពីការប្រកួតវគ្គជម្រុះក្នុងពូល

 

ជើងឯកលើវិញ្ញាសាទាំង ៤កម្រិត (ឧត្តមសិក្សា មធ្យមសិក្សា មហាជនបុរស មហាជននារី) នឹងទទួលបាន៖

ចំណាត់ថ្នាក់លេខ ១ ទទួលបានប្រាក់រង្វាន់ ១.៥០០.០០០ រៀល អមដោយមេដាយកិត្តិយស និងពានផងដែរ

ចំណាត់ថ្នាក់លេខ ២ ទទួលបានប្រាក់រង្វាន់ ១.០០០.០០០ រៀល អមដោយមេដាយកិត្តិយស

ចំណាត់ថ្នាក់លេខ ៣ ទទួលបានប្រាក់រង្វាន់ ៦០០.០០០ រៀល អមដោយមេដាយកិត្តិយស

 

ការប្រកួត “ពានរង្វាន់បាល់បោះ TNAOT ៣x៣” ទទួលបានកិច្ចសហការផ្នែកបច្ចេកទេសពីសហព័ន្ធកីឡាបាល់បោះកម្ពុជា (CBF) និងទទួលបានការគាំទ្រយ៉ាងពេញទំហឹងពីអគ្គនាយកដ្ឋានកីឡា នៃក្រសួងអប់រំ យុវជន និងកីឡា។ ទន្ទឹមនេះដែរ ក៏មានការចូលរួមគាំទ្រពីបណ្តាក្រុមហ៊ុនធំៗចំនួន ក្នុងការចូលរួមឧបត្ថម្ភគាំទ្រដល់ការរៀបចំព្រឹត្តិការណ៍ប្រកួតនេះអោយប្រព្រឹត្តឡើង។ ក្នុងនោះមានដូចជា មន្ទីរពហុព្យាបាល ហុង អិន, ក្រុមហ៊ុន Lanton Cloud ជាក្រុមហ៊ុនបុត្រសម្ព័ន្ធមួយរបស់ក្រុមហ៊ុន ឡានម៉ីអ៊ែរឡាញ ,ក្រុមហ៊ុន GoodToGo, Oakwood Premier Phnom Penh  ក្រុមហ៊ុនរៀបចំកម្មវិធី Miss Ann មន្ទីរព្យាបាលភ្នែកហូសេង ក្លឹបហាត់ប្រាណ ណូបែល  និងភោជនីយដ្ឋានអាហារជប៉ុន ធានអ៊ី។ 

 

ក្រៅពីការចាប់អាម្មណ៍មកទស្សនាដោយផ្ទាល់ពីអ្នកគាំទ្រ​ពិសេស យុវវ័យ និងអ្នកស្នេហាកីឡាបាល់បោះជាច្រើននាក់ ក៏មានការអញ្ជើញដោយផ្ទាល់ពី លោកជា សុធារ៉ា អភិបាលខណ្ឌរងនៃគណៈអភិបាលខណ្ឌ៧មករា លោក Austin អគ្គលេខាធិការនៃសហព័ន្ធបាល់បោះកម្ពុជា និងលោកតាំង ពីងជាំង TONY អគ្គនាយកគ្រប់គ្រងទូទៅនៃសារព័ត៌មានត្នោត និងអ្នកសារព័ត៌មានជាច្រើនរូបទៀត៕

 

 (អត្ថបទពាណិជ្ជកម្ម)