ប៉ុន្មានថ្ងៃខាងមុខនេះ អាចនឹងមានជំនួបតាមទូរសព្ទរវាងសម្តេចនាយករដ្ឋមន្ត្រី ហ៊ុន សែន និងលោក វ៉ូឡូឌីមៀ ហ្សលេនស្គី (Volodymyr Zelenskyy)។ សម្តេច ហ៊ុន សែន បានបញ្ជាក់បែបនេះ តាមទំព័រហ្វេសប៊ុកផ្លូវការ។

 

សម្តេច ហ៊ុន សែន បានសរសេរនៅថ្ងៃទី២៧ ខែតុលា នេះ ថា៖ «ប្រសិនគ្មានការប្រែប្រួល និងការសម្របសម្រួលពេលវេលាតាមផ្លូវការទូតដែលកំពុងធ្វើនោះទេខ្ញុំនឹងជួបប្រធានាធិបតីអ៊ុយក្រែនតាមទូរសព្ទនៅប៉ុន្មានថ្ងៃខាងមុខនេះ»។

 

ការបញ្ជាក់របស់ប្រមុខរដ្ឋាភិបាល ធ្វើឡើងមួយថ្ងៃបន្ទាប់ពីសម្តេចបានបញ្ចប់បេសកកម្មជួយពលរដ្ឋរងគ្រោះដោយជំនន់ទឹកភ្លៀងវគ្គទីមួយតាមបណ្តាខេត្តជុំវិញបឹងទន្លេសាប។

 

សម្តេចបានលើកឡើងពីការងារដ៏មមាញឹករបស់សម្តេច ដូចជាការពិនិត្យសម្រេច និងការចុះហត្ថលេខាលើឯកសារផ្សេងៗ ការងារទាក់ទងនឹងការប្រជុំអាស៊ានក្នុងឋានៈជាប្រធានប្តូរវេនឆ្នាំ២០២២ រួម ជាមួយនឹងការត្រៀមចូលរួមប្រជុំ G20 និងការចូលរួមប្រជុំAPEC ជាដើម។

 

គម្រោងជំនួបតាមទូរសព្ទជាមួយសមភាគីអ៊ុយក្រែន ក៏ស្ថិតក្នុងកាលវិភាគដ៏មមាញឹករបស់សម្តេច ហ៊ុន សែន ផងដែរ៕