លោក ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន បានថ្លែងថា កម្ពុជា មាននឹងមានផ្លូវដែកល្បឿនលឿននាពេលខាងមុខទៅកាន់ខេត្តព្រះសីហនុ និងខេត្តបន្ទាយមានជ័យ។ រីឯភ្នំពេញវិញ ក្រសួងក៏បានសិក្សាលទ្ធភាពបង្កើតផ្លូវរថភ្លើងលើអាកាស និងក្រោមដីផងដែរ។ 

 

លោក ស៊ុន ចាន់ថុល បានថ្លែងដូច្នេះ៖ «បច្ចុប្បន្ន រថភ្លើងអាចបើកក្នុងល្បឿន៨០គីឡូម៉ែត្រក្នុងមួយម៉ោង។ កន្លែងខ្លះ អាចបាន៥០ និង៣០គីឡូម៉ែត្រក្នុងមួយម៉ោង។ យឺតណាស់ អ៊ីចឹងយើងលើកផ្លូវដែកនេះ ឱ្យក្លាយជាផ្លូវដែកដូចឡាវ ដែលអាចរត់១៦០គីឡូម៉ែត្រក្នុងមួយម៉ោង»។ 

 

រដ្ឋមន្រ្តីរូបនេះ បានអះអាងថា ក្រសួងសាធារណការ បានសិក្សាប្រព័ន្ធរថភ្លើងលើអាកាសរួចរាល់ និងរថភ្លើងក្រោមដី។ ក្រសួងចាំតែអ្នកវិនិយោគប៉ុណ្ណោះ ដើម្បីធ្វើគម្រោងផ្លូវរថភ្លើងលើអាកាស និងក្រោមដីនេះ។ គ្រោងផ្លូវដែកទាំង២នេះ អាចកាត់បន្ថយការកកស្ទះចរាចរណ៍ក្នុងរាជធានីភ្នំពេញ៕