ជាតិ
កម្មវិធី រត់៤សែនជំហាន ជាការរត់រយៈចម្ងាយចុងក្រោយរបស់ សាយ ដើម្បីកុមារកម្ពុជា
× ភ្នំពេញ៖ ក្រោយសម្រេចគោលដៅ នៃកម្មវិធី «រត់ជាមួយសាយ ៤សែនជំហាន ភ្នំពេញ-សៀមរាប»លោក សាយ ប្រកាសថា នេះជាកម្មវិធីចុងក្រោយនៃការរត់រយៈចម្ងាយរបស់លោក។
លោក អ៊ួន បឋម ដែលគ្រប់គ្នាស្គាល់ថា សាយ បានបង្កើតកម្មវិធីរត់រយៈចម្ងាយទី២ របស់ខ្លួន ដោយផ្ដើមចេញពីក្រុងភ្នំពេញទៅខេត្តសៀមរាប ដើម្បីប្រមូលថវិកាជួយកុមារ ដែលកំពុងសម្រាកព្យាបាលនៅមន្ទីរពេទ្យកុមារអង្គរ។ កម្មវិធីនេះ បានចាប់ផ្តើមនៅថ្ងៃទី២២ និងបញ្ចប់នៅថ្ងៃទី៣០ ខែតុលា ឆ្នាំ២០២២ ដោយប្រមូលបានថវិកាជាង ១៥០លានរៀល។
ទិដ្ឋភាពនៃកម្មវិធី «រត់ជាមួយសាយ ៤សែនជំហាន ភ្នំពេញ-សៀមរាប»។ រូបភាពពី៖ ហ្វេសប៊ុកផេក Sai
ក្រោយបញ្ចប់កម្មវិធី និងបានពិនិត្យសុខភាពរួចរាល់ នៅថ្ងៃទី៣១ ខែតុលា លោកសាយ បានប្រកាសនៅលើទំព័រហ្វេសប៊ុកផ្លូវការរបស់ខ្លួនដូច្នេះ៖«បន្ទាប់ពីពិនិត្យសុខភាពរួចរាល់ហើយ កម្មវិធីរត់ជាមួយសាយ ៤សែនជំហានគឺជាកម្មវិធីចុងក្រោយនៃការរត់រយៈចម្ងាយឆ្ងាយរបស់ខ្ញុំ ព្រោះសូម្បីតែពេទ្យក៏ណែនាំឱ្យខ្ញុំឈប់រត់ឆ្ងាយលើសពី ១០ គីឡូម៉ែត្រដែរ បើសិនមិនចង់វេទនានៅពេលក្រោយ។ សង្ឃឹមថាតាមរយៈសកម្មភាពរបស់ពួកយើង និងជំរុញទឹកចិត្តដល់យុវជនដទៃទៀត ដើម្បីបន្តវេនកិច្ចការងារជួយសង្គ្រោះដល់អាយុជីវិតកុមារកម្ពុជា។ Cambodia Children need YOU»។
ទន្ទឹមនឹងការប្រកាសខាងលើ ពលរដ្ឋ ដែលលេងបណ្តាញសង្គមហ្វេសប៊ុកជាច្រើនបញ្ចេញមតិ(comment)អំណរគុណ និងបង្ហាញពីមោទកភាពចំពោះ សាយ ដែលបានលះបង់ និងខំប្រឹង ដើម្បីកុមារកម្ពុជា ។
គួរបញ្ជាក់ផងដែរថា លោក អ៊ួន បឋម ក៏ធ្លាប់បានបង្កើត «យុទ្ធនាការរត់ដើម្បីសប្បុរសធម៌ជាមួយសាយ»អស់ជាង ៤០ថ្ងៃហើយ គិតត្រឹមថ្ងៃទី២០ ខែវិច្ឆិកា ឆ្នាំ២០២០។ ការខិតខំរបស់លោក ថវិកាមួយចំនួនធំ ត្រូវបានប្រជាជនយើង បរិច្ចាគទៅមន្ទីរពេទ្យ តាមរយៈកម្មវិធី 1$ Challenge ដោយទទួលបានថវិកាប្រហែល ៤០ម៉ឺនដុល្លារហើយ ឬ ១,៦ពាន់លានដុល្លារ។
ទិដ្ឋភាពនៃកម្មវិធី «រត់ជាមួយសាយ ៤សែនជំហាន ភ្នំពេញ-សៀមរាប»។ រូបភាពពី៖ ហ្វេសប៊ុកផេក Sai
ពលរដ្ឋចូលរួមកម្មវិធី «រត់ជាមួយសាយ ៤សែនជំហាន ភ្នំពេញ-សៀមរាប»។ រូបភាពពី៖ ហ្វេសប៊ុកផេក Sai
Tag:
សាយ
លោក អ៊ួន បឋម
រត់ជាមួយសាយ
© រក្សាសិទ្ធិដោយ thmeythmey.com