រថយន្ត
អន្តរជាតិ
មានអ្នកទិញរថយន្តទំនើបពិសេសសម្រាប់ដឹកលោកស៊ី និងលោកពូទីន នាកិច្ចប្រជុំ APEC នៅថៃ
រូបថត the nation
×![]()
ដោយ: ធីតា
រថយន្តទំនើបពិសេសត្រូវបានត្រៀមសម្រាប់មេដឹកនាំចិន លោក ស៊ី ជិនភីង និងប្រធានាធិបតីរុស្ស៊ី វ្លាឌីមៀរ ពូទីន នាអំឡុងកិច្ចប្រជុំសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក (APEC) ឆ្នាំ២០២២ នៅប្រទេសថៃ។ នេះបើតាមការផ្សាយរបស់កាសែត The Nation។
ចុះផ្សាយនាថ្ងៃទី៣១ ខែតុលា នេះ The Nation បានដកស្រង់ប្រភពពីក្រុមហ៊ុនឧស្សាហកម្មមួយ ដែលបញ្ជាក់ពីការបញ្ជាទិញរថយន្តទំនើបពីសំណាក់ជនជាតិថៃ ក្រោមលក្ខខណ្ឌមិនបញ្ចេញអត្តសញ្ញាណ។
«ពួកគេ [អ្នកបញ្ជាទិញ] ចង់ទិញរថយន្តទាំងនោះ បើទោះបីជាមេដឹកនាំ [ចិន និងរុស្ស៊ី] ប្រើប្រាស់ ឬមិនប្រើប្រាស់ក៏ដោយ ឬមួយក៏មេដឹកនាំមកចូលរួមកិច្ចប្រជុំ ឬក៏មិនមកក៏ដោយ»។ នេះបើតាមប្រភពដែលដកស្រង់ដោយកាសែតដ៏ល្បីល្បាញជាភាសាអង់គ្លេសរបស់ថៃ។
មេដឹកនាំនៃប្រទេសមហាអំណាចមួយចំនួន គ្រោងប្រើប្រាស់រថយន្តដែលរៀបចំដោយរដ្ឋាភិបាលរបស់ខ្លួន ខណៈមេដឹកនាំខ្លះទៀត អាចបញ្ជូនតំណាងរបស់ខ្លួនទៅចូលរួមប្រជុំជំនួស។
BMW ក្លាយជាដៃគូដឹកជញ្ជូនផ្លូវការសម្រាប់កិច្ចប្រជុំ APEC 2022 នៅក្រុងបាងកក ប្រទេសថៃពីថ្ងៃទី១៨ ដល់ថ្ងៃទី១៩ ខែវិច្ឆិកា ខាងមុខ។ រថយន្តដែលត្រៀមសម្រាប់មេដឹកនាំទាំងនោះ ជាប្រភេទរថយន្តអគ្គិសនី BMW i7 electric sedans ដែលនាំចូលពីអាល្លឺម៉ង់។
យោងតាមកាសែត Bangkok Post រថយន្តដែលត្រៀមដឹកមេដឹកនាំពិភពលោក កំពុងត្រូវបានរក្សាទុកនៅចំណតរថយន្តនៃអគ្គនាយកដ្ឋានគយក្នុងសង្កាត់ Krong Toey នាទីក្រុងបាងកក។
រថយន្តទាំងនោះត្រូវបានជួលដោយរដ្ឋាភិបាលថៃ ហើយនឹងអាចប្រកាសដាក់លក់ ក្រោយកិច្ចប្រជុំ APEC ផងដែរ។ គ្រប់ម៉ូដែល BMW i7 ទាំងអស់ មានតម្លៃចាប់ពី ៧,៨លានបាត (ជាង២០ម៉ឺនដុល្លារអាម៉េរិក)៕
Tag:
APEC
© រក្សាសិទ្ធិដោយ thmeythmey.com
