លោក នួន ផារ័ត្ន៖ វិស័យអាទិភាព៥ស្ថិតក្នុងផែនការយុទ្ធសាស្ត្រទីក្រុងឆ្លាតរបស់ភ្នំពេញ

ជាតិ

លោក នួន ផារ័ត្ន៖ វិស័យអាទិភាព៥ស្ថិតក្នុងផែនការយុទ្ធសាស្ត្រទីក្រុងឆ្លាតរបស់ភ្នំពេញ

02, Nov 2022 , 3:09 pm

រូបភាព

ដោយ: វិច្ឆិកា

ភ្នំពេញ៖ លោក នួន ផារ័ត្ន អភិបាលរងរាជធានីភ្នំពេញ បានធ្វើបទបង្ហាញអំពីគោលនយោបាយគ្រប់គ្រង និងផែនការអភិវឌ្ឍរាជធានីភ្នំពេញ ដល់សហគមន៍ធុរកិច្ចបារាំង នាល្ងាចថ្ងៃទី១ ខែវិច្ឆិកានេះ។ បទបង្ហាញនោះ បានប្រព្រឹត្តទៅនៅក្នុងកម្មវិធី «Pop-up៖ ទីក្រុងប្រកបដោយចីរភាព» ដែលរៀបចំឡើងដោយ សភាពាណិជ្ជកម្ម និងឧស្សាហកម្មបារាំង-កម្ពុជា (La Chambre de Commerce et d’Industrie France Cambodge – CCIFC) នៅវិទ្យាស្ថានភាសាបារាំង។

កម្មវិធីដែលប្រមូលផ្ដុំដោយក្រុមហ៊ុនបារាំង ដែលកំពុងធ្វើប្រតិបត្តិការនៅប្រទេសកម្ពុជា បានផ្តល់ពេលវេលាឱ្យលោកអភិបាលរង ធ្វើបច្ចុប្បន្នភាពអំពីផែនការទូទៅ នៃការអភិវឌ្ឍរាជធានីភ្នំពេញ ស្របតាមសូចនាករ នៃគោលដៅអភិវឌ្ឍន៍ប្រកបដោយចីរភាពទី១១របស់អង្គការសហប្រជាជាតិ។

ទន្ទឹមគ្នានេះ ដោយសារតែលោកអភិបាលរង កំពុងទទួលបន្ទុកលើកិច្ចការទីក្រុងឆ្លាត (Smart Cities) លោកក៏បានបង្ហាញអំពីសកម្មភាពការងារមួយចំនួន របស់អាជ្ញាធររាជធានី ដែលកំពុងគ្រប់គ្រងដោយប្រព័ន្ធបច្ចេកវិទ្យាផងដែរ។

គួររម្លឹកថា នៅឆ្នាំ២០១៨ រដ្ឋាភិបាលកម្ពុជា បានសម្រេចបញ្ចូលរាជធានីភ្នំពេញ ក្រុងបាត់ដំបង និងក្រុងសៀមរាប ទៅក្នុងបណ្ដាញទីក្រុងឆ្លាតអាស៊ាន (ASEAN Smart Cities Network) ដែលមានវត្តមានសរុប២៦ទីក្រុង។ គោលដៅចាំបាច់មួយនៃការបង្កើតបណ្ដាញទីក្រុងឆ្លាត គឺការផ្លាស់ប្ដូរពិសោធន៍ និងការប្រើប្រាស់ប្រព័ន្ធបច្ចេកវិទ្យា ដើម្បីដោះស្រាយបញ្ហាប្រឈមនានាក្នុងទីក្រុង ដែលចេះតែមានកំណើនប្រជាសាស្ត្រផង និងការពង្រីកផ្ទៃដីផង។ បន្ទាប់ពីបានចូលជាសមាជិក នៃបណ្ដាញទីក្រុងឆ្លាតរបស់អាស៊ាន រាជធានីភ្នំពេញបានទទួលកិច្ចសហការ និងការគាំទ្រផ្នែកហិរញ្ញវត្ថុពីសមាគមអន្តរជាតិ នៃអភិបាលក្រុងប្រើប្រាស់ភាសាបារាំង (AIMF) ដើម្បីអនុវត្តគម្រោងមួយចំនួនដែរ។

លោក នួន ផារ័ត្ន បានពន្យល់ប្រាប់ធុរជនបារាំងយ៉ាងដូច្នេះ៖ «នៅក្នុងផែនការយុទ្ធសាស្ត្រនៃទីក្រុងឆ្លាត និងប្រកបដោយចីរភាពរបស់រាជធានីភ្នំពេញ យើងបានកំណត់វិស័យងាទិភាពចំនួន៥រួមមាន៖ ការប្រើប្រាស់ដីធ្លី, សុវត្ថិភាពនិងសន្តិសុខ, ចរាចរណ៍ក្នុងទីក្រុង, បរិស្ថានរស់នៅឆ្លាតវៃ និងអភិបាលកិច្ចឌីជីថល។»។

លោកបានបន្តទៀតថា៖« យើងមានគម្រោងអនុវត្តការងារជាក់ស្ដែងមួយចំនួន ក្នុងវិស័យខាងលើនេះ ដោយប្រើប្រាស់បច្ចេកវិទ្យាព័ត៌មានដូចជា៖ គម្រោងប្រើប្រាស់ប្រព័ន្ធ Digital-Twin ដើម្បីការរៀបចំក្រុង, គម្រោងការបំពាក់កាម៉េរាសុវត្ថិភាពចំនួន ១ ៦៩៨គ្រឿង ព្រមទាំងមណ្ឌលបញ្ជាពីសាលារាជធានី និងប្រព័ន្ធបញ្ជាអំពូលបំភ្លឺផ្លូវសាធារណៈពីចម្ងាយ, ការសាង់សង់ចំណតរថយន្តក្រុងឆ្លាត និងការបំពាក់ប្រព័ន្ធជូនដំណឹងជាមុនដើម្បីទប់ទល់នឹងគ្រោះមហន្តរាយដែលបង្កដោយគ្រោះធម្មជាតិ។ យើងក៏បានសាងសង់មណ្ឌលបញ្ជាប្រព័ន្ធចរាចរណ៍ក្នុងរាជធានីរួចហើយដែរ ជាមួយនឹងការបំពាក់ភ្លើងចរាចរណ៍ឆ្លាតវៃចំនួន ១១៥ទីតាំង»។

សម្រាប់លោក នួន ផារ័ត្ន ការរីកលូតលាស់យ៉ាងលឿនរបស់រាជធានីភ្នំពេញ ដូចជាកំណើនប្រជាជន កំណើនយានយន្ត កំណើនសំណង់គេហដ្ឋាន បានបង្កើតឱ្យមានបញ្ហាប្រឈមមួយចំនួន ដូចនៅតាមទីក្រុងនានាក្នុងពិភពលោកដែរ។ លោកបន្តថា ហេតុដូច្នេះហើយ បានជាសាលារាជធានីភ្នំពេញ បានធ្វើការកែសម្រួលផែនការរៀបចំក្រុង ២០១៥-២០៣៥ ដើម្បីកំណត់តំបន់អភិវឌ្ឍន៍ឱ្យបានច្បាស់លាស់ដូចជា៖ ផែនការដឹកជញ្ជូន ការកសាងប្រព័ន្ធលូ ប្រព័ន្ធចរាចរណ៍ តំបន់រស់នៅ តំបន់ឧស្សាហកម្ម តំបន់បេតិកភណ្ឌ ទីធ្លាបៃតង ជាដើម។

ទិន្នន័យខ្លះៗទាក់ទងនឹងរាជធានីក្នុងពេលបច្ចុប្បន្ន៖

ប្រជាជនរស់នៅជិត ៣លាននាក់ (ឆ្នាំ២០១២ មានតែ ១,៨៥ លាននាក់)

១៤ ខណ្ឌ គ្របដណ្ដប់លើផ្ទៃដីជិត ៧០០ គីឡូម៉ែត្រការ៉េ

រថយន្តឯកជនជិត ៥០០ ០០០ គ្រឿង (ឆ្នាំ ២០១២ មានតែ ២៧០ ០០០គ្រឿង)

ទោចក្រយានមានជិត ២លានគ្រឿង (ឆ្នាំ ២០១២ មានប្រហែល ១លានគ្រឿង)

ទីក្រុងរណបចំនួន ៦ និងបុរីជាង ២០០ និងអគារដែលមានកំពស់ខ្ពស់ជាង២០ជាន់ មាន ២២៥ ៕