ដូចដែលលោក Sepp Blatter បានលើកឡើងប្រទេសកាតាដែលត្រូវរៀបចំការប្រកួត ​World Cup គឺតែងត្រូវបានយាយីពីការរិះគន់នានា អំពីបញ្ហាចម្រូងចម្រាស និងការចោទប្រកាន់ពីអំពើពុករលួយ កត្តាសិទ្ធិមនុស្សជាដើម តាំងពីពេលប្រកាសលើកដំបូងពី FIFA កាលឆ្នាំ ២០១០ មក។
 

លោក Blatter ដែលធ្លាប់ដឹកនាំតំណែងកំពូល FIFA រយៈពេល​ ១៧ឆ្នាំ ក៏ជាបុគ្គលម្នាក់ត្រូវបានជាប់ពាក់ព័ន្ធនឹងការចោទប្រកាន់ពីបញ្ហាអំពើពុករលួយអំឡុងពេលលោកកាន់តំណែង។ អតីតប្រធាន FIFA រូបនេះទើបតែបញ្ចប់ការជុំនំជម្រះក្តីរួចរាល់នៅតុលាការប្រទេសស្វីសកាលពីខែមិថុនា កន្លងទៅផងដែរ។
 

មូលហេតុដែលលោក Blatter បានលើកថាការរៀបចំ World Cup នៅកាតាជាកំហុសក៏ព្រោះតែកាតាជាប្រទេសមួយដែលតូច ក្នុងការរៀបចំព្រឹត្តិការណ៍ពានរង្វាន់បាល់ទាត់ពិភពលោកដ៏ធំ បើធៀបទៅប្រទេសដែលធ្លាប់ធ្វើម្ចាស់ផ្ទះពីមុនៗមក។
 

«វាគឺជាប្រទេសមួយដ៏តូច​ បាល់ទាត់ និង ​World Cup គឺធំខ្លាំងសម្រាប់ប្រទេសនេះ ហើយចាប់តាំងពីពេលប្រកាសមកដល់ពេលនេះ ការគិតគូពីបរិបទសង្គមនិងបញ្ហាសិទ្ធិមនុស្សតែត្រូវបានគេយកមកពិចារណា។ នេះជាកំហុសមួយដ៏ធំ នឹងជាជម្រើសដ៏អាក្រក់បំផុត។»។ លោក Blatter បាននិយាយប្រាប់កាសែតស្វីស ​Tages Anzeiger បែបនេះ។
 

កាតាជាប្រទេសស្ថិតនៅក្នុងតំបន់មជ្ឈឹមបូពា៍ដំបូងគេដែលរៀបចំព្រឹត្តិការណ៍ ​World Cup ហើយក៏ជាប្រទេសអារ៉ាប់ដំបូងគេផងដែរ។ បើតាមលោក Blatter ដដែល កាលពីឆ្នាំ ២០១២​ FIFA ធ្លាប់បានធ្វើវិសោធនកម្មលើលក្ខណៈវិនិច្ឆ័យដែលខ្លួនបានជ្រើសរើសប្រទេសកាតាឡើងវិញ​ ដោយសារព្រួយបារម្ភអំពីលក្ខខណ្ឌការងារសាងសង់សំណងសម្រាប់ការរៀបព្រឹត្តិការណ៍នេះ។
 

មិនត្រឹមតែប៉ុណ្ណោះ World Cup 2022 ដែលចាប់ផ្តើមនៅថ្ងៃទី២០ ខែវិច្ឆិកា ខាងមុខនេះ អតីតប្រធាន​ ​FIFA ដដែលនេះបានប្រាប់ឱ្យដឹងថាលោកក៏នឹងទស្សនាការប្រកួតនេះ ពីផ្ទះរបស់លោកក្នុងទីក្រុង​ Zurich ផងដែរ៕

 

 

 

​