ជាតិ
សេដ្ឋកិច្ច
ចិនផ្តល់ជំនួយជាង២៧លានដុល្លារ ដើម្បីជួយកែលម្អជីវភាពពលរដ្ឋកម្ពុជា លោក លី ខឺឈាង នាយករដ្ឋមន្ត្រីនៃប្រទេសចិន ជួបពិភាក្សាការងារទ្វេភាគីជាមួយ សម្តេច ហ៊ុន សែន មុននឹងចូលរួមកិច្ចប្រជុំកំពូលអាស៊ានលើកទី៤០-៤១ ប្រព្រឹត្តទៅនៅរាជធានីភ្នំពេញ ចាប់ពីថ្ងៃទី១១ ដល់ថ្ងៃទី១៣ ខែវិច្ឆិកា ឆ្នាំ២០២២
× ភ្នំពេញ៖ ប្រទេសចិនសម្រេចផ្តល់ជំនួយ ២០០លានយ័ន(ប្រមាណ២៧លានដុល្លារអាម៉េរិក) ដើម្បីជួយកែលម្អជីវភាពប្រជាពលរដ្ឋកម្ពុជា។ ជំនួយនេះត្រូវបានលើកឡើងក្នុងជំនួបទ្វេភាគីរវាង លោក លី ខឺឈាង នាយករដ្ឋមន្ត្រីនៃសាធារណរដ្ឋប្រជាមានិតចិន ជាមួយ សម្តេច ហ៊ុន សែន នៅវិមានសន្តិភាព នាថ្ងៃទី៩វិច្ឆិកា។
ទោះបីជាយ៉ាងណាក៏ដោយ ចិននឹងបន្តជួយកម្ពុជា ឱ្យមានវឌ្ឍនភាពបន្ថែមទៀត ក្នុងនោះចិននឹងផ្តល់ជំនួយបន្ថែមដល់កម្ពុជា ទៅលើវិស័យ។ លោក លី ខឺឈាង បានអះអាងបែបនេះនៅចំពោះមុខសម្តច ហ៊ុន សែន។ ក្នុងនោះ ចិនប្រកាសផ្តល់ជំនួយជាង២៧លានដុល្លារ ដើម្បីជួយកែលម្អជីវភាពប្រជាពលរដ្ឋកម្ពុជា។
លើសពីនេះ ចិនបន្តជួយដល់ការស្តារឡើងវិញនូវបេតិកភណ្ឌកម្ពុជា, បង្កើនចំនួននិស្សិតកម្ពុជាទៅបន្តការសិក្សានៅប្រទេសចិន, ជួយដល់សកម្មភាពដោះមីន ជាពិសេសចិន គឺជួយដល់ការរៀបចំការប្រកួតស៊ីហ្គេមនៅឆ្នាំ២០២៣។ នេះជាការរៀបរាប់របស់លោក លី ខឺឈាង ដោយបន្ថែមថា ចិន នឹងជួយការស្ថាបនាស្ពានឆ្លងទន្លេមេគង្គ, ផ្លូវដែកតភ្ជាប់កម្ពុជា-ថៃ-ឡាវនិងប្រទេសចិន ព្រមទាំងជួយកម្ពុជាក្នុងវិស័យកសិកម្ម ដោយធ្វើយ៉ាងណាឱ្យផលិតផលកសិផលរបស់កម្ពុជាមានគុណភាពអាចនាំចេញទៅប្រទេសចិនស្របតាមកូតាដែលប្រគល់ជូន ក៏ដូចជាមានគុណភាពសម្រាប់នាំចេញទៅប្រទេសក្រៅ ផងដែរ។
លោក លី ខឺឈាង បានថ្លែងថា៖ «ទំនាក់ទំនងរវាងកម្ពុជា និងចិន ជាទំនាក់ទំនងស៊ីជម្រៅលើគ្រប់វិស័យ។ ខ្ញុំ មានសេចក្តីរីករាយចំពោះទំនាក់ទំនងនេះ ជាពិសេសបានឃើញកម្ពុជា មានការអភិវឌ្ឍយ៉ាងឆាប់រហ័សបែបនេះ»។
ជុំវិញនៃជំនួយខាងលើនេះ សម្តេច ហ៊ុន សែន បានថ្លែងអំណរគុណ និង បញ្ជាក់នៅចំពោះមុខលោក លី ខឺឈាង ថា៖ «ជំនួយទាំងនេះ នឹងជួយកម្ពុជាឱ្យមានវឌ្ឍនភាពកាន់តែខ្លាំងឡើង ថែមទៀត»។ លើសពីនេះសម្តេច ក៏ដឹងគុណដល់ភាគីចិន ដែលកន្លងមកធ្វើជាបង្អែកផ្តល់វ៉ាក់សាំងឱ្យកម្ពុជា បានឆ្លងផុតអំពីការរីករាលដាលជំងឺកូវីដ-១៩ និងបើកប្រទេសឡើងវិញ ផងដែរ។
Tag:
សម្តេច ហ៊ុន សែន
អាស៊ាន
© រក្សាសិទ្ធិដោយ thmeythmey.com