បើតាមទំព័រហ្វេសប៊ុកដដែល ប្រមុខរដ្ឋាភិបាលកម្ពុជា បានប្រាប់ទៅប្រធានាធិបតីហ្វីលីពីនថា  ក្រុមហ៊ុនហ្វីលីពីន អាចដាក់ទុនវិនិយោគទាំងស្រុងលើការសង់រោងម៉ាស៊ីនកិនស្រូវ , ឡសម្ងួត ​និងឃ្លាំងស្តុក សម្រាប់ប្រមូលទិញស្រូវ ដើម្បី​សម្ងួត និងកិននាំចេញ ទៅ​ហ្វីលីពីន។  មិនតែប៉ុណ្ណោះ ក្រុមហ៊ុនហ្វីលីពីន ក៏អាចឱ្យកសិករកម្ពុជា ដាំដុះប្រភេទស្រូវ ដែលជាតម្រូវការរបស់ប្រជាជនហ្វីលីពីនផងដែរ។ 
 

បន្ថែមពីលទ្ធផលដែលផ្សាយនៅទំព័រហ្វេសប៊ុករបស់សម្តេច ហ៊ុន សែន ​ក្រសួងការបរទេសកម្ពុជា ក៏បានចេញសេចក្តីព័ត៌មានអំពីលទ្ធផលនៃជំនួបទ្វេភាគីនេះដែរ។ បើតាមក្រសួងការបរទេស នៅក្នុងជំនួបនេះ ថ្នាក់ដឹកនាំប្រទេសទាំងពីរ បានបង្ហាញបំណងដូចគា្នក្នុងការបង្កើនកិច្ចសហប្រតិបត្តិការទ្វេភាគី ពិសេសគឺក្នុងវិស័យការពារជាតិ, កសិកម្ម, ពាណិជ្ជកម្ម, ទេសចរណ៍, ព័ត៌មានវិទ្យា, ឡូជីស្ទីកផងដែរ។  ថ្នាក់ដឹកនាំទាំងពីរ ក៏មិនភ្លេចលើកឡើងពីការពេញចិត្តចំពោះការវិវត្តដ៏ល្អនៃចំណងការទូត ៦៥ឆ្នាំកន្លងមក រវាងកម្ពុជា និងហ្វីលីពីនផងដែរ។  

 

សូមជម្រាបថា នៅក្នុងរយៈពេល១០ខែ ឆ្នាំ២០២២នេះ កម្ពុជាសម្រេចបានការនាំចេញអង្ករគ្រប់ប្រភេទ ទៅកាន់ទីផ្សារអន្តរជាតិ ចំនួន ៥០៩ ២៤៩តោន  គិតឡើង១០ភាគរយ បើធៀបនឹងរយៈពេលដូចគ្នា ឆ្នាំ២០២១។ ទឹកប្រាក់សរុបពីការនាំចេញអង្ករចេញនេះ មានចំនួន ៣២៣.៩០ លានដុល្លារ​អាម៉េរិក។ ប្រទេសចិន និងបណ្តាប្រទេសនៅតំបន់អឺរុប ជាទីផ្សារនាំចេញអង្ករធំជាងគេរបស់កម្ពុជា ខណៈប្រទេសសមាជិកអាស៊ានចំនួន ៤ បាននាំចូលអង្ករពីកម្ពុជាក្នុងបរិមាណជាង ៤.៨ម៉ឺនតោនផងដែរ ក្នុងរយៈពេល១០ខែឆ្នាំ២០២២នេះ៕

​