ជំនួបទ្វេភាគីរវាងនាយករដ្ឋមន្ត្រីសិង្ហបុរី លី សៀនឡុង និង ប្រធានាធិបតីឥណ្ឌូណេស៊ី ចូកូ វីដូដូ បានធ្វើឡើងភ្លាមៗបន្ទាប់ពីលោក លី មកដល់ទីក្រុងភ្នំពេញថ្ងៃទី១០ ខែវិច្ឆិកា។ កិច្ចប្រជុំរវាងមេដឹកនាំទាំងពីរពិភាក្សាពីបញ្ហាមីយ៉ាន់ម៉ា។
 

បើតាមការិយាល័យនាយករដ្ឋមន្ត្រីសិង្ហបុរី លោក លី និងលោក ចូកូវី បានធ្វើការយ៉ាងជិតស្និទ្ធជាមួយគ្នាជាលក្ខណៈទ្វេភាគី រួមទាំងក្នុងសមាគមអាស៊ានអស់រយៈពេលជាច្រើនឆ្នាំមកហើយ ហើយបានកសាងទំនាក់ទំនងផ្ទាល់ខ្លួនដ៏ល្អមួយទៀតផង។ 
 

«មេដឹកនាំទាំងពីរពិភាក្សាគ្នាបានយ៉ាងល្អលើទំនាក់ទំនងទ្វេភាគី។ មេដឹកនាំទាំងពីរបានអះអាងសារជាថ្មីអំពីអាទិភាពរួមគ្នារបស់សិង្ហបុរី និងឥណ្ឌូណេស៊ី ក្នុងការលើកកម្ពស់ការស្ដារសេដ្ឋកិច្ច ការអភិវឌ្ឍធនធានមនុស្ស និងវឌ្ឍនភាពដែលធ្វើឡើងនៅក្នុងគំនិតផ្ដួចផ្ដើមប្រកប​ដោយនិរន្តរភាព»។ ការិយាល័យនាយករដ្ឋមន្ត្រីសិង្ហបុរីលើកឡើងបែបនេះ។
 

ក្រៅពីកិច្ចពិភាក្សាអំពីការអភិវឌ្ឍក្នុងតំបន់ មេដឹកនាំទាំងពីរក៏បានគិតគូរពីជំហានបន្ទាប់របស់អាស៊ាន ឆ្លើយតបទៅនឹងការវិវដ្ដស្ថានភាពនៅមីយ៉ាន់ម៉ា។ លោក លី ក៏បានបង្ហាញពីជំហរគាំទ្ររបស់សិង្ហបុរី ចំពោះឥណ្ឌូណេស៊ីដែលនឹងធ្វើជាប្រធានអាស៊ាននាឆ្នាំ ២០២៣ ឱ្យបានទៅដល់គោលដៅរំពឹងទុក។
 

ក្រៅពី​ការពិភាក្សា​អំពី​ស្ថានការណ៍​នៅ​មី​យ៉ាន់​ម៉ាក្នុងកិច្ចប្រជុំកំពូលអាស៊ាន បណ្ដាប្រទេសអាស៊ីអាគ្នេយ៍ក៏មាន​កិច្ចប្រជុំ​ពាក់ព័ន្ធ​ជាមួយ​ដៃគូ​ដទៃដូចជាអាម៉េរិក ចិន ឥណ្ឌា ជប៉ុន កូរ៉េខាងត្បូង អូស្ត្រាលី និង​កាណាដា​៕