លោក បៃឌិន ក៏បានកោតសរសើរកម្ពុជា ចំពោះការដឹកនាំអាស៊ាន ក្នុងឋានៈជាប្រធាន នៅក្នុងកាលៈទេសៈដ៏លំបាកនេះ។ មេដឹកនាំប្រទេសមហាអំណាចរូបនេះ ក៏សរសើរកកម្ពុជាចំពោះការគាំទ្រ ដំណោះស្រាយរបស់អង្គការសហប្រជាជាតិ លើសង្គ្រាមរវាង រុស្ស៊ី និងអ៊ុយក្រែនផងដែរ។ នេះបើតាមសេចក្តីប្រកាសព័ត៌មានរបស់ សេត វិមាន ដែលបានបន្តបញ្ជាក់ទៀតថា ក្នុងជំនួបនេះ  ថ្នាក់ដឹកនាំកម្ពុជា និងអាម៉េរិក ក៏បានពិភាក្សាគ្នា ជុំវិញវិបត្តិនៅមីយ៉ាន់ម៉ា និងការឆ្លើយតបរបស់អាស៊ានក្រោមក្របខណ្ឌនៃអង្គការតំបន់ ដែលមានតួនាយ៉ាងសំខាន់ក្នុងការនាំយកលទ្ធិប្រជាធិបតេយ្យ និងស្ថិរភាពមីយ៉ាន់ម៉ា ព្រមទាំងការគាំទ្រឱ្យអនុវត្តនូវកិច្ចព្រមព្រៀង ៥ចំណុច ។

 

ក្រៅពីកោតសរសើរកម្ពុជា លោកប្រធានាធិបតីអាម៉េរិក ក៏បានលើកឡើងពីកង្វល់របស់ខ្លួន ទាក់ទងនឹងស្ថានការណ៍នៅមូលដ្ឋានទ័ពជើងទឹករាម និងបានគូសបញ្ជាក់ពីសារៈសំខាន់នៃការបង្ហាញតម្លាភាពពេញលេញ អំពីសកម្មភាពរបស់កងទ័ពចិននៅទីនោះ។ នេះបើតាមសេចក្តីប្រកាសព័ត៌មានរបស់សេតវិមាន។ 

 

សេចក្តីប្រកាសព័ត៌មានដដែល បានឱ្យដឹងទៀតថា ក្រៅពីក្តីបារម្ភជុំវិញការសាងសង់មូលដ្ឋានទ័ពរាមនេះ លោក ចូ បៃឌិន ក៏បានជំរុញឱ្យ សម្តេច ហ៊ុន សែន នាយករដ្ឋមន្ត្រីកម្ពុជា បើកឡើងវិញ នូលំហនយោបាយ និងពលរដ្ឋ នៅមុនការបោះថ្នាក់ជាតិឆ្នាំ២០២៣ខាងមុខនេះ។ ភ្ជាប់នឹងរឿងនេះដែរ មេដឹកនាំប្រទេសមហាអំណាចនេះ ក៏បានអំពាវនាវឱ្យមានការដោះលែងកញ្ញា សេង ធារី  ពលរដ្ឋខ្មែរ-អាម៉េរិក និងសកម្មជននយោបាយផ្សេងទៀត ដែលកំពុងជាប់ឃុំ។

 

ពាក់ព័ន្ធនឹងបញ្ហាទាំងនេះ សេតវិមាន មិនបានបញ្ជាក់ថាកម្ពុជា បានឆ្លើយតបយ៉ាងណាឡើយ ខណៈទំព័រហ្វេសប៊ុក សម្តេច ហ៊ុន សែន ដែលបានចុះផ្សាយពីលទ្ធផលនៃជំនួបទ្វេភាគីនេះដែរនោះ ក៏មិនបានលើកឡើងពីបញ្ហាទាំងនេះទេ។

 

ទំព័រហ្វេសប៊ុក សម្តេច ហ៊ុន សែន បានបញ្ជាក់ តែការលើកឡើងពីការជជែកគ្នារបស់ សម្តេច ហ៊ុន សែន និងលោក ចូ បៃឌិត អំពីវិបត្តិនៅមីយ៉ាន់ម៉ា និងការប្រកាសជំហរបស់អាស៊ាន នៅក្នុងសង្គ្រាមរុស្ស៊ី-អ៊ុយក្រែន។ លោកប្រធានាធិបតីអាម៉េរិក បានកោតសរសើរវិធានការរបស់កម្ពុជា ក្នុងឋានៈជាប្រធានអាស៊ាន ក្នុងការប្រឹងប្រែងដោះស្រាយបញ្ហានៅមីយ៉ាន់ម៉ា។ នេះបើតាមទំព័រហ្វេសប៊ុក សម្តេច ហ៊ុន សែន។

 

សម្រាប់សម្តេច ហ៊ុន សែន វិញ បានអរគុណលោក ចូ បៃឌិត ដែលបានធ្វើដំណើមកចូលរួមក្នុងកិច្ចប្រជុំកំពូលអាស៊ាន-អាម៉េរិក និងកិច្ចប្រជុំពាក់ព័ន្ធ នៅរាជធានីភ្នំពេញ។ សម្រាប់ប្រមុខរដ្ឋាភិបាលកម្ពុជា វត្តមានរបស់ប្រធានាធិបតីអាម៉េរិកនៅកម្ពុជា នាពេលនេះ សបញ្ជាក់ឲ្យឃើញនូវការយកចិត្តទុកដាក់ របស់អាម៉េរិកចំពោះអាស៊ាន។ សម្ដេច ហ៊ុន សែន ក៏ អរគុណអាម៉េរិក ដែលបានបញ្ជូនវត្ថុបុរាណត្រឡប់មកកម្ពុជាវិញផងដែរ ដោយសម្តេច បានគូសបញ្ជាក់ថា ហរដ្ឋអាមេរិក ជាប្រទេសនាំមុខលំដាប់លេខ១ ក្នុងការបញ្ជូនវត្ថុបុរាណត្រឡប់មកកម្ពុជាវិញ៕