បើតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ ការពង្រីកទំនាក់ទំនងទ្វេភាគីនេះ ក៏ស្របពេលដែលកម្ពុជា និងជប៉ុន រំឭកខួបអនុស្សាវរីយ៍លើកទី៧០ឆ្នាំ នៃការបង្កើតទំនាក់ទំនងការទូតដែរ។
 

កម្ពុជា និងជប៉ុន បង្កើតទំនាក់ទំនងជាដៃគូយុទ្ធសាស្ត្រ នៅឆ្នាំ២០១៣។ ដូច្នេះបើភាគីទាំងពីរ ពង្រីកទំនាក់ទំនងមែននោះ ជប៉ុន នឹងក្លាយប្រទេសទី៣ ដែលជាដៃគូយុទ្ធសាស្ត្រគ្រប់ជ្រុងជ្រោយ ជាមួយកម្ពុជា បន្ទាប់ពីឡាវ និងចិន។
 

កាលពីខែកញ្ញា ឆ្នាំ២០១៩ សម្ដេចនាយករដ្ឋមន្ត្រី ហ៊ុន សែន និងលោក ថងលូន ស៊ីស៊ូលីត នាយករដ្ឋមន្ត្រីឡាវ បានប្រកាសទំនាក់ទំនងជាដៃគូយុទ្ធសាស្ត្រគ្រប់ជ្រុងជ្រោយនេះ ដែលជាកម្រិតខ្ពស់បំផុតនៃទំនាក់ទំនងការទូតទ្វេភាគី។
 

 
 

ដោយឡែកកម្ពុជា និងចិន បានសម្រេចដំឡើងទំនាក់ទំនងការទូតឲ្យដល់កម្រិតខ្ពស់នេះ កាលពីខែធ្នូ ឆ្នាំ២០១០ ។ ការសម្រេចនេះ ធ្វើឡើងអំឡុងជំនួបវាងនាយករដ្ឋមន្ត្រីកម្ពុជា សម្ដេច ហ៊ុន សែន និងនាយករដ្ឋមន្ត្រីចិន វេន ជាប៉ាវ (Wen Jiabao) ។
 

ភាពជាដៃគូយុទ្ធសាស្ត្រគ្រប់ជ្រុងជ្រោយសុទ្ធតែផ្ដល់ប្រយោជន៍ដល់ភាគីទាំងសងខាង។  ជារួមភាគីទាំងពីរ នឹងជួយគាំទ្រគ្នាទៅវិញទៅមកលើវិស័យជាច្រើន ស្ទើរតែទាំងអស់ទាំងសេដ្ឋកិច្ច, នយោបាយ, សន្តិសុខ,ការទូត,ហិរញ្ញវត្ថុ, ពាណិជ្ជកម្ម, វប្បធម៌និងទំនាក់ទំនងរវាងប្រជាជននិងប្រជាជនផងដែរ។ ដែលទំនាក់ទំនងបង្កើតឡើង សំដៅសម្រេចឲ្យបានគោលដៅដែលបានដាក់ចេញ ក៏ដូចជាបង្កើនទំនាក់ទំនងសេដ្ឋកិច្ច ពង្រីកទំហំពាណិជ្ជកម្មរវាងភាគីទាំងពីរ និងការជួយគ្នាទៅវិញទៅមកលើឆាកអន្តរជាតិផ្សេង៕