ភ្នំពេញ​៖ លោកនាយក​រដ្ឋមន្ត្រី​អូ​ស្ត្រា​លី Anthony Albanese អញ្ជើញ​ចូលរួម​សម្ពោធ​កម្មវិធី​តាំងពិព័រណ៍​ឌីជីថល​បែប​3D ឬ សង​ឡាញ (Walking Through a Songline) នៅ​រសៀល​ថ្ងៃទី​១៣ វិច្ឆិកា​នេះ នៅ Factory Phnom Penh ។ ពិព័រណ៍​សង​ឡាញ (Walking Through a Songline) ជា​ផ្នែក​មួយ​នៃ​ខួប​ទី​៧០​ឆ្នាំ នៃ​ទំនាក់ទំនង​ការទូត​រវាង​ប្រទេស​កម្ពុជា និង​អូស្ត្រាលី​។

ពិព័រណ៍​នេះ ជា​ផ្នែក​មួយ​នៃ​ការតាំងពិព័រណ៍​ឌីជីថល​ល្បី​ថ្នាក់​អន្តរជាតិ​របស់​សារមន្ទីរ​ជាតិ​អូស្ត្រាលី ឈ្មោះថា សង​ឡាញ​បងប្អូន​ស្រី ​៧​នាក់​(Songline: Tracking the Seven Sisters)​។ 

Songline ឬ Dreaming Track ជាការ​គូសវាស​ផែនទី​របស់​ប​បុព្វបុរស ដែលជា​បងប្អូន​ស្រី​ទាំង​៧​នាក់ បានធ្វើ​ដំណើរ​ឆ្លងកាត់​ប្រទេស​អូស្ត្រាលី បង្កើតបានជា​ទឹកដី និង​ប្រជាជន​។ ពិព័រណ៍​នេះ ប្រើប្រាស់​គំនូរ និង​រូបថត ជាង​៣០០​ផ្ទាំង ព្រមទាំង​ឧបករណ៍ ចម្រៀង របាំ និង​វីដេអូ ដើម្បី​និទាន​ពី​បង​ប្អូនស្រី​៧​នាក់ ដែល​បាន​បង្កើត​ទ្វីប​មួយ នៅពេល​ពួកគេ​ធ្វើដំណើរ​ពី​ខាងលិច​ទៅខាង​កើត​។



Songline: Tracking the Seven Sisters បង្ហាញ​ពី Songline ចំនួន​ប្រាំ របស់​ជនជាតិ​ដើមដំបូង​នៅ​វាល​ខ្សាច់​ខាងលិច និង​កណ្តាល ប្រទេស​អូ​ស្រា្ត​លី​។ អ្នកទស្សនា នឹងមាន​អារម្មណ៍​ដូច​នៅ​ជាមួយ​ជនជាតិដើម​ភាគតិច​អូស្ត្រាលី តាមរយៈ​បច្ចេកវិទ្យា​ថ្មី​នេះ​។​

​លោកនាយក​រដ្ឋមន្ត្រី​អូ​ស្រា​លី លោក Anthony Albanese  រួមជាមួយ លោក លី ធុច ទេស​រដ្ឋ​ម​ន្រី្ត និង​ជា​អនុប្រធាន​ទី​១ នៃ​អាជ្ញាធរ​មីន​កម្ពុជា និង​ព្រះអង្គម្ចាស់​ក្ស​ត្រី នរោត្តម អា​រុណរ​ស្មី លោក Mathew Trinca នាយក​សារមន្ទីរ​ជាតិ​អូស្ត្រាលី ព្រមទាំង Pablo Chiho Kang ឯកអគ្គរាជទូត​អូស្ត្រាលី ជាម​នុស្ស​៥​នាក់​ដំបូង ដែល​បាន​ចូល​ទស្សនា និង​ទទួល​បទពិសោធន៍ នៃ​ការតាំងពិព័រណ៍​បែប​ឌីជីដល (3D) នេះ​។ 

​នាឱកាស​នេះ លោកនាយក​រដ្ឋមន្ត្រី​អូស្ត្រាលី បាន​លើកឡើងថា​៖« ការតាំងពិព័រណ៍​នេះ គឺជា​ផ្នែក​មួយ នៃ​បេសកកម្ម របស់​សារមន្ទីរ​ជាតិ​អូស្ត្រាលី ដើម្បី​ប្រាប់​ពី​ដំណើររឿង​របស់​ប្រជាជន​អូស្ត្រាលី​ទាំងអស់​។  គំនិត​នៅក្នុង​ការតាំងពិព័រណ៍​នេះ គឺជា​ចំណុចកណ្តាល​នៃ​ទិដ្ឋភាព​ពិភពលោក​នៃ​ប្រជាជន​ដើម​ប្រទេស​អូស្ត្រាលី​»​។​

Walking Through a Songline ត្រូវបាន​ផលិត​ដោយសារ​មន្ទីរ​ជាតិ​អូស្ត្រាលី ក្នុង​ភាពជា​ដៃគូ​ជាមួយ Mosster Studio​។ សាធារណជន​អាច​ចូល​ទស្សនា​ដោយ​ឥតគិតថ្លៃ ចាប់ពី​ទី​១៤ ខែវិច្ឆិកា​នេះ ដល់​ថ្ងៃទី​១១ ខែធ្នូ ឆ្នាំ​២០២២ នៅ​ហ្វេ​ក​ធឺ​រី​ភ្នំពេញ​( Factory PhnomPenh)៕