ជាតិ
សេដ្ឋកិច្ច
សមាគមហិរញ្ញវត្ថុ៣ ប្រាប់ពលរដ្ឋឱ្យប្រយ័ត្នចំពោះក្រុមហ៊ុនPAYEER លើការជួញដូររូបិយវត្ថុគ្រីបតូ
× រាល់ការធ្វើប្រតិបត្តិការលើរូបិយវត្ថុគ្រីបតូ (Crypto) គឺមិនមានការទទួលស្គាល់ជាផ្លូវការនៅកម្ពុជាឡើយ ។ នេះបើតាមសមាគមហិរញ្ញវត្ថុ៣ ដែលប្រាប់សាធារណជនឱ្យប្រយ័ត្នចំពោះក្រុមហ៊ុនPAYEER លើការជួញដូររូបិយវត្ថុប្រភេទគ្រីបតូនេះ។
សមាគមធនាគារនៅកម្ពុជា(ABC) ,សមាគមមីក្រូហិរញ្ញវត្ថុកម្ពុជា(CMA) និងសមាគមសហព័ន្ធហិរញ្ញវត្ថុ និងបច្ចេកវិទ្យានៃកម្ពុជា (CAFT) បានបញ្ជាក់ក្នុងសេចក្តីថ្លែងការណ៍រួមថា ក្រុមហ៊ុន PAYEER បានលួចឈ្មោះគ្រឹះស្ថានធនាគារ និងហិរញ្ញវត្ថុ ដែលជាសមាជិករបស់សមាគមទាំង៣ទៅប្រើប្រាស់ និងផ្សព្វផ្សាយពីកិច្ចសហការជាមួយគ្រឹះស្ថានធនាគារ និងហិរញ្ញវត្ថុនៅកម្ពុជាមួយចំនួន ក្នុងការទូទាត់ ការដាក់ប្រាក់ និងដកប្រាក់លើការវិនិយោគ និងការជួញដូរលើរូបិយវត្ថុគ្រីបតូនេះ។
សមាគមទាំង៣ខាងលើ បានប្រកាសនៅថ្ងៃទី១២ វិច្ឆិកា ឆ្នាំ២០២២ ថា រាល់ការផ្សព្វផ្សាយ ឬប្រតិបត្តិការទូទាត់របស់ក្រុមហ៊ុន PAYEER គឺមិនមានការទាក់ទងនឹងសមាគមឡើយ។ លើសពីនេះ គ្រប់ប្រតិបត្តិការរបស់ក្រុមហ៊ុនលើការជួញដូររូបិយវត្ថុប្រភេទគ្រីបតូ នៅកម្ពុជា ក៏គ្មានការទទួលស្គាល់ជាផ្លូវការ ដែរ។
«សមាគម ព្រមទាំងសមាជិកទាំងអស់ សូមបដិសេធចំពោះការផ្សព្វផ្សាយនេះ និងប្រកាសមិនជាប់ពាក់ព័ន្ធទៅនឹងក្រុមហ៊ុន PAYEER ឬមានកិច្ចសហប្រតិបត្តិការលើការទូទាត់ ឬការជួញដូរលើប្រភេទរូបិយវត្ថុគ្រីបតូ ឡើយ»។ នេះបើយោងតាមសេចក្តីថ្លែងការណ៍របស់សមាគមABC, CMA និង CAFT។
ជាមួយគ្នានេះ សមាគមក៏ប្រាប់សាធារណជនឱ្យប្រុងប្រយ័ត្នខ្ពស់រាល់ប្រតិបត្តិការ និងសកម្មភាពជួញដូរលើរូបិយវត្ថុគ្រីបតូ ដែល មាន Bitcoin, Ethereum និង កាបូប Crypto...ជាដើម ដើម្បីចៀសវាងធ្លាក់ក្នុងការបោកបញ្ឆោតអូសទាញវិនិយោគ ឬ ជួញដូរឧបករណ៍ហិរញ្ញវត្ថុនេះ ដែលមិនមានសុវត្ថិភាព និងអាចនឹងនាំឱ្យមានការខាតបង់៕
© រក្សាសិទ្ធិដោយ thmeythmey.com