សេចក្តីអំពាវនាវ ធ្វើឡើងបន្ទាប់ពីក្រុមការងារលើកកម្ពស់គុណភាពសេវានៅតាមបុរី ក្នុងរាជធានីភ្នំពេញចំនួន៨ក្រុម បានចុះពង្រឹងគុណភាពសេវាទូរគមនាគមន៍តាមបុរី និងអគារសហកម្មសិទ្ធិរយៈពេលកន្លងមក ហើយទទួលបានព័ត៌មានជាក់លាក់ អំពីឧបសគ្គមួយចំនួនដែលធ្វើឲ្យមានការលំបាកក្នុងការតភ្ជាប់បណ្តាញ។

 

ក្រៅពីណែនាំឲ្យបញ្ឈប់ការទារលុយជាថ្នូរ ក្រសួងប្រៃសណីយ៍ និងទូរគមនាគមន៍ ក៏បានស្នើឲ្យម្ចាស់បុរី និងអគារសហកម្មសិទ្ធិ បញ្ឈប់ប្រតិបត្តិការផ្តល់សេវាអ៊ីនធឺណិតដោយខ្លួនឯង និងគ្មានអាជ្ញាបណ្ណពីនិយ័តករទូរគមនាគមន៍កម្ពុជា នៅក្នុងបុរី និងអគារសហកម្មសិទ្ធិ។

 

ក្នុងករណីម្ចាស់បុរី  និងអគារសហកម្មសិទ្ធិមួយចំនួន នៅតែបន្តសកម្មភាពបែបនេះ ក្រសួងនឹងចាត់វិធានការយ៉ាងម៉ឺងម៉ាត់ ស្របតាមច្បាប់ទូរគមនាគមន៍ និងលិខិតបទដ្ឋានគតិយុត្ត។ 

 

ជាមួយគ្នានេះ ប្រតិបត្តិករទូរគមនាគមន៍ និងសាធារណជន ដែលមានព័ត៌មានអំពីសកម្មភាពខាងលើក អាចទូរសព្ទរាយការណ៍ទៅលេខ Hotline ៦៧៨៩ ឬទៅកាន់អ៊ីម៉ែល [email protected] ៕