វិបត្តិមីយ៉ាន់ម៉ា នៅតែបញ្ហាដ៏ក្តៅសម្រាប់អាស៊ាន និងមិនទាន់មានច្រកចេញនៅឡើយ។ ការប៉ះទង្គិចក្នុងប្រទេស ក៏មានជាញឹកញាប់ផង។ ជុំវិញបញ្ហាមីយ៉ាន់ម៉ានេះ ក្រសួងការបរទេស និងសហប្រតិបត្តិការអន្តរជាតិកម្ពុជា នៅថ្ងៃទី១៧ ខែវិច្ឆិកា បានបញ្ចេញរបាយការណ៍របស់ប្រេសិតពិសេសអាស៊ាន ដែលបានដាក់ទៅកាន់កិច្ចប្រជុំកំពូលអាស៊ានលើក៤០ និង៤១។ 

 

របាយការណ៍កម្រាស់ ១៩ទំព័រនេះ បានបញ្ជាក់ពីកិច្ចខិតខំរបស់ប្រេសិតពិសេសអាស៊ាន ក្នុងការជួយសម្របសម្រួលបញ្ហានៅមីយ៉ាន់ម៉ា ក៏ដូចជាជួបភាគីពាក់ព័ន្ធទាំងអស់។ 

 

«ជំនួបជាមួយភាគីពាក់ព័ន្ធទាំងអស់ គឺជាកិច្ចការអាទិភាពមួយរបស់ប្រេសិតពិសេសអាស៊ាន»។ របាយការណ៍ចេញដោយក្រសួងការបរទេសកម្ពុជា បានសង្កត់ធ្ងន់បែបនេះ ដោយបន្តថា ប្រេសិតពិសេសអាស៊ាន និងជារដ្ឋមន្រ្តីការបរទេសកម្ពុជា លោក ប្រាក់ សុខុន ក្នុងដំណើរទស្សនកិច្ចនៅមីយ៉ាន់ម៉ា បានជួបជាមួយអង្គការប្រដាប់អាវុធជនជាតិភាគតិចចំនួន ៧ និងបក្សនយោបាយចំនួន ៨។ 

 

បើតាមរបាយការណ៍ខាងលើ ប្រេសិតពិសេសអាស៊ាន ក៏បានទាមទារជួបពិភាក្សាជាមួយអង្គការប្រដាប់អាវុធ ដែលកំពុងប្រយុទ្ធជាមួយយោធាមីយ៉ាន់ម៉ា និងបក្សនយោបាយចំនួន ៤ ដែលស្ថិតក្រោមការត្រួតពិនិត្យរបស់គណៈកម្មការរៀបចំការបោះឆ្នោតសហភាព (UEC) ផង។ លោកប្រាក់ សុខុន ក៏បានស្នើជួបជាមួយលោកស្រី អ៊ុងសាន ស៊ូជី និងលោក Win Myint ដែរ ប៉ុន្តែយោធាមីយ៉ាន់ម៉ា អះអាងថា ខ្លួននឹងពិចារណាលើបញ្ហានេះ នៅពេលបញ្ចប់នីវិវិធីច្បាប់។ 

 

 

មិនតែប៉ុណ្ណោះ របាយការណ៍ខាងលើ បានលើកឡើងពីកិច្ចខិតខំ ក្នុងការផ្តល់ជំនួយទៅមីយ៉ាន់ម៉ា សម្រាប់គ្រប់ភាគីទាំងអស់។ ក្រោមកិច្ចខិតខំនេះ ប្រេសិតពិសេសអាស៊ាន បានប្រមែប្រមូលវ៉ាក់សាំង ៣លានដូស រួមទាំងសម្ភារវេជ្ជសាស្រ្តផ្សេងទៀត សម្រាប់ផ្តល់ឱ្យមីយ៉ាន់ម៉ា ដើម្បីជួយសង្រ្គោះប្រជាជន ក្នុងពេលមានវិបត្តិជំងឺឆ្លងសកល៕