ដាណឺម៉ាកជាក្រុមក្នុងចំណោមក្រុមដែលឈ្នះកៅអីដោយស្វ័យប្រវត្តិពីការប្រកួតជម្រុះក្នុងពូលតាមតំបន់នៃទ្វីបអឺរ៉ុបសម្រាប់ការធ្វើដំណើរទៅកាន់ ​World Cup 2022 នៅប្រទេសកាតា។​ 

ដាណឺម៉ាកដែលមិនសូវទទួលបានការចាប់អារម្មណ៍ បង្ហាញខ្លួនដ៏គួរឱ្យភ្ញាក់ផ្អើលនៅព្រឹត្តិការណ៍ UEFA Euro កាល​​ពី១៨ខែមុន ដែលពួកគេបានឈានជើងដល់វគ្គពាក់កណ្តាលផ្តាច់ព្រ័ត្រ។

World Cup នៅកាតា ដាណឺម៉ាកស្ថិតក្នុងពូល D ដោយត្រូវលេងទល់ក្រុមទុយនីស៊ីនៅជំនួបបើកឆាកក្នុងពូល នាកីឡដ្ឋាន Education City ក្នុងទីក្រុង Al Rayyan នៅថ្ងៃទី២២ បន្ទាប់មកជួបបារាំង និងអូស្រ្តាលី។ 
 

ខណៈកំពុងហ្វឹកហាត់ជាមួយក្រុមនៅក្នុងប្រទេសកាតាខ្សែបម្រើវ័យ ២២ឆ្នាំ Damsgaard សមាជិកដ៏សំខាន់ប្រចាំក្រុមដាណឺម៉ាកបានបង្ហាញ អារម្មណ៍ចំពោះការប្រកួតថា ដាណឺម៉ាកគ្មានក្រុមណាចង់ប៉ះឡើងនៅ World Cup។
 

«ខ្ញុំមិនគិតថានឹងមានមនុស្សជាច្រើនអាចប៉ាន់ស្មានចំពោះសមត្ថភាពយើងឡើយ ខ្ញុំក៏មិនគិតថាយើងស្ថិតនៅក្នុងចំណោមក្រុមកំពូលៗសម្រាប់ការប្រកួតនេះដែរ ប៉ុន្តែយើងគឺជាក្រុមមួយដ៏ល្អដែលមិនអាចមើលរំលង និងយើងអាចប្រជែងជាមួយគ្រប់គ្នា។ ពិតណាស់យើងមិនមែនជាក្រុមដែលគេពេញចិត្ត តែខ្ញុំគិតថាគ្មាននរណាម្នាក់ចង់ជួបយើងឡើយ ជាពិសេសក្រុមខ្លាំងៗគ្មាននរណាចង់លេងទល់យើងឡើយ។»។ Damsgaard បាននិយាយប្រាប់អ្នកកាសែតបែបនេះ។
 

លើសពីនេះ Damsgaard ខ្សែបម្រើក្រុម Brentford FC នៃលីគកំពូលអង់គ្លេស ក៏បានអះអាងបន្ថែមថាពេលដាណឺម៉ាកប៉ះទុយនីស៊ីក្រុមរបស់គេនឹងធ្វើគ្រប់យ៉ាងនិងមិនផ្តល់ឱកាសដល់ក្រុមគូប្រកួតឡើយ។ 
 

ក្រោយនិយាយទាក់ទង់នឹងការប្រកួតរួច កីឡាករវ័យទើប ២២ឆ្នាំនេះ ក៏បានបង្ហាញពីផលវិបាកនៃការត្រៀមខ្លួនសម្រាប់ World Cup ​2022 នេះ ខណៈគេជាកីឡាករលេងនៅអង់គ្លេសដែលមានការប្រកួតច្រើន៕