នាកម្មវិធីកិច្ចសម្ភាសន៍ Piers Morgan Uncensored កាលពីពេលថ្មីៗនេះដែលបានចាក់ផ្សាយនៅថ្ងៃទី១៧ ខែវិច្ឆិកា ខ្សែប្រយុទ្ធវ័យ ៣៧ឆ្នាំមានក្តីស្រមៃចង់ឈ្នះ World Cup ដែលទំនងជាការបង្ហាញខ្លួនលើកចុងក្រោយ។ ទន្ទឹមនឹងនេះខ្សែប្រយុទ្ធក្រុម Manchester United ក៏បានប្រាប់ឱ្យដឹងថារូបគេនឹងបញ្ចប់អាជីពកីឡាករបាល់ទាត់នៅវ័យ ៤០ឆ្នាំ។ 
 

ស្របពេលដែល Ronaldo ត្រៀមខ្លួននៅ World Cup ដែលជាការបង្ហាញខ្លួនជាលើកទី៥ ឱ្យព័រទុយហ្កាល់ នឹងអាចជាលើកចុងក្រោយសម្រាប់រូបគេ ខ្សែប្រយុទ្ធចាស់វស្សារូបនេះគ្រោងចូលនិវត្តន៍នៅវ័យ ៤០ឆ្នាំ ដែលគេចាត់ទុកថាជាវ័យដ៏សក្តិសម។
 

«ខ្ញុំចង់លេង​ ២ ឬ ៣ឆ្នាំទៀតយ៉ាងយូរ ខ្ញុំចង់បញ្ចប់អាជីពនៅត្រឹមវ័យ ៤០ឆ្នាំ ព្រោះវ័យនេះនឹងជាវ័យដ៏ល្អ ប៉ុន្តែខ្ញុំមិនដឹងឡើយថា ពេលខ្លះអ្វីដែលបានគ្រោងទុក មិនដូចការគិត។ ជីវិតមានភាពបត់បែន ហើយជីវិតគឺត្រូវមានការប្រឹងប្រែង។»។ Ronaldo និយាយក្នុងកម្មវិធីដែលរូបគេបានទម្លាយអារម្មណ៍រិះគន់លើ Man United បែបនេះ។

ស្របពេលគ្នានេះ ប្រធានក្រុមព័រទុយហ្កាល់ក៏បានលើកឡើងអំពីខ្សែប្រយុទ្ធ Lionel Messi ដែលជាគូប្រជែងរយៈពេលជាង ១៦ឆ្នាំរបស់ខ្លួនផងដែរ។ Ronaldo ថា Messi ជាមនុស្សម្នាក់ដ៏ ជាគូប្រជែងដ៏កំពូល។ 
 

Ronaldo ក៏និយាយពីក្តីរំពឹងបន្ថែមទៀតថា ព័រទុយហ្កាល់នឹងអាចឆ្លងផុតវគ្គចែកពូល H ដែលត្រូវជួបហ្គាណា, អ៊ុយរូហ្កាយ និងកូរ៉េខាងត្បូង ដើម្បីទៅវគ្គបន្ទាប់។ ក្រោយប្រកួតប្រជែងគ្នាជាច្រើនឆ្នាំទាំងនៅទឹកដីអេស្ប៉ាញ Ronaldo វ័យ ៣៧ឆ្នាំថាចង់លេងទល់ Messi នៅវគ្គផ្តាច់ព្រ័ត្រ World Cup 2022 នៅកាតាតែម្តង។
 

​«វាគឺល្អពេកហើយ ខ្ញុំចង់ប្រកួតជាមួយគេម្តងទៀត ព្រោះគេជាកីឡាករដ៏អស្ចារ្យ ប្រៀបបានវេទមន្ត ជាមនុស្សម្នាក់ដ៏កំពូល ដែលយើងបានចែករំលែកគ្នាជាង ១៦ឆ្នាំមកហើយ។ រូបគេដូចជាមិត្តរួមក្រុមម្នាក់អ៊ីចឹង ខ្ញុំមានទំនាក់ទំនងល្អជាមួយគេ បើទោះបីមិនមែនជាមិត្តភក្កិដូចមនុស្សដទៃក្តី។»។ នេះជាសម្តី Ronaldo ដែលបានលើកឡើង៕