ថ្លែងក្នុងសន្និសីទកាសែតជាមួយប្រធានាធិបតីអ៊ុយក្រែនលោក វ៉ូឡូឌីមៀ ហ្សេលេនស្គី នាយករដ្ឋ​មន្ត្រី​អង់គ្លេស Sunak​ ថ្លែងថា លោកនៅទីនោះដើម្បីបញ្ជាក់ថា ចក្រភពអង់គ្លេសនឹងបន្តឈរ​ជាមួយ​អ៊ុយក្រែនរហូតដល់ប្រទេសមួយនេះអាចស្វែងរកសន្តិភាព និងសុវត្ថិភាពដែលចាំបាច់ និងសម​ទទួល​បាន។ 

 

លោក Sunak​ បញ្ជាក់ថា កញ្ចប់ជំនួយការពារដែនអាកាសសម្រាប់អ៊ុយក្រែនដែលមានតម្លៃ៦០លាន​ដុល្លាររួមបញ្ជូលកាំភ្លើងយន្តហោះចម្បាំង ប្រព័ន្ធរ៉ាដា និងឧបករណ៍ប្រឆាំងនឹងដ្រូន។ ជំនួយ​នេះ​ផ្ដល់​ឱ្យ​អ៊ុយក្រែនខណៈដែលរុស្ស៊ីបានវាយប្រហារប្រព័ន្ធផ្គត់ផ្គង់ថាមពលជិតពាក់កណ្ដាលប្រទេសរបស់អ៊ុយក្រែនដែលធ្វើឱ្យប្រជាជនរាប់លាននាក់គ្មានប្រព័ន្ធអគ្គិសនីប្រើប្រាស់ ស្របពេលសីតុណ្ហភាពរដូវរងារ​កំពុងចុះខ្លាំងដល់សូន្យអង្សារ។

 

«នៅប៉ុន្មានឆ្នាំទៅមុខទៀតយើងនឹងប្រាប់ចៅៗរបស់យើងអំពីរឿងរបស់អ្នកថា តើមនុស្សដែលមាន​មោទកភាព និងអធិបតេយ្យភាពបានក្រោកឈរឡើងចំពោះ​មុខការវាយ​លុក​ដ៏​គួរ​ឱ្យភ័យ​ខ្លាច​ដោយ​របៀបណា? របៀបដែលអ្នកបានប្រយុទ្ធ របៀបដែលអ្នកលះបង់ និងរបៀបដែលអ្នកបានយកឈ្នះ»។ មេដឹកនាំអង់គ្លេសបានសង្កត់ធ្ងន់បែបនេះ។ 

 

ក្នុងសន្និសីទកាសែតរួមគ្នា លោក ហ្សេលេស្គី ក៏ថ្លែងអំណរគុណចំពោះទស្សនកិច្ចប្រកបដោយអត្ថន័យ និងប្រយោជន៍សម្រាប់ប្រទេសទាំងពីរ។ មេដឹកនាំអ៊ុយក្រែនរូបនេះលើកឡើងថា ភាគីទាំងពីរបាន​ជជែកពីលទ្ធភាពនៃការការពារសន្តិសុខថាមពលអឺរ៉ុប និងអ៊ុយក្រែន ព្រមទាំងសមត្ថភាព​ក្នុង​ការ​ការ​ពារដែនអាកាសក៏ដូចជាកិច្ចសហប្រតិបត្តិការការពារជាតិជាទូទៅ។ 

 

នៅលើបណ្ដាញសង្គម Twitter ប្រធានាធិបតី ហ្សេលេនស្គី ក៏សរសេរបន្ថែមថា ការមានមិត្តដូចអង់គ្លេសនៅឈរជាមួយបែបនេះ អ៊ុយក្រែនមានភាពជឿជាក់អាចនឹងយកជ័យជម្នះ៕