ជាមួយនឹងការដាក់ក្តីរំពឹងខ្ពស់នេះដែរកីឡាករ ម៉េត សុភត្រា បានបន្តប្រឹងប្រែងហ្វឹកហាត់ខ្លាំងដើម្បីជាការត្រៀមខ្លួនឱ្យបានមុតមាំសម្រាប់ព្រឹត្តិការណ៍ប្រវត្តិសាស្រ្តនៅកម្ពុជានេះ។ ទោះបីឈ្នះមេដាយមាស កាលពីស៊ីហ្គេមលើកទី៣១ ក្តីតែកីឡាករម្ចាស់មេដាយមាសលើប្រភេទវិញ្ញាសាសម្តែងកាំបិតធំការពារខ្លួនបុរស២នាក់ នៅតែប្រកាន់គោលជំហរយកមេដាយមាសនៅស៊ីហ្គេម២០២៣ ម្តងទៀតឱ្យបាន ប្រាប់មកកាន់សារព័ត៌មានថ្មីៗ នៅថ្ងៃទី១៧ ខែវិច្ឆិកា។

 

កីឡាករ ម៉េត សុភត្រា និយាយថា៖«ខ្ញុំសង្ឃឹមមេដាយមាស ព្រោះខ្ញុំនឹងដៃគូបានសម្លឹងមើលឃើញថាការហ្វឹកហាត់កម្រិតបច្ចេកទេស កម្លាំងកាយសម្បទា និងមានទំនុកចិត្តខ្ពស់ក្នុងការប្រកួត ហើយនៅកម្ពុជាយើងស៊ាំជាមួយអាកាសធាតុ ហើយផ្តោតអារម្មណ៍ខ្លាំងលើការប្រកួតពិសេសលោកគ្រូគាត់ដាក់វិធានការហ្វឹកហាត់បានហ្មត់ចត់»។ 

 

ទោះបីដាក់ក្តីរំពឹងខ្ពស់ក្នុងការប្រជែងមេដាយក៏ពិតមែនប៉ុន្តែកីឡាករជម្រើសជាតិកម្ពុជា លើប្រភេទកីឡាវ៉ូវីណាមរូបនេះ មិនហ៊ានមើលស្រាលគូប្រកួតដែលមកពីបណ្តាប្រទេសផ្សេងទៀតដែរ ដោយរូបគេកំពុងយកចិត្តទុកដាក់ខ្ពស់អំពីកម្រិតសមត្ថភាព និងតាក់ទិចនៃការប្រកួតនៅលើវិញ្ញាសាដែលត្រូវលេង។

 

សុភត្រា បន្តថា៖«ពេលនេះយើងកំពុងសម្លឹងមើលពីចំនុចខ្វះខាត និងបច្ចេកទេសមួយចំនួនដែលមិនទាន់មានភាពល្អគ្រប់គ្រាន់ ហើយគ្រូបង្វឹកលោកបានផ្តល់អនុសាសន៍ និងកែតម្រូវបានច្រើនសម្រាប់ឱ្យយើងបំពេញភាពខ្វះចន្លោះមុនស៊ីហ្គេម២០២៣»។

 

គួរបញ្ជាក់ថា កីឡករ ម៉េត សុភត្រា កំពុងហ្វឹកហាត់លើវិញ្ញាសា៧ មានដូចជា ស្នៀតគៀបករបុរស៤នាក់, ស្នៀតការពារខ្លួននារី១ បុរស៣នាក់ មានអាវុធ, មេគុនកាំបិតធំបុរស២នាក់, មេគុនកាំបិតខ្លីបុរស២នាក់, មេគុនការពារខ្លួន២នាក់គ្មានអាវុធ, ស្នៀតការពារខ្លួននារី៣នាក់ និងបុរស៣នាក់ និងស្នៀតការពារខ្លួននារី១ និងបុរស១នាក់៕