ប្រមុខការពារជាតិចិន Wei Fenghe និងប្រមុខការពារជាតិអាម៉េរិក Lloyd Austin នឹងចូលរួមក្នុងកិច្ចប្រជុំរដ្ឋមន្ត្រីការពារជាតិអាស៊ាន-បូក នៅសៀមរាបនៅសប្ដាហ៍ក្រោយ។ វត្តមានរដ្ឋមន្រ្តីការពារជាតិមហាអំណាចទាំង២ ក្នុងពេលតែមួយនេះ អាចជាឱកាសសម្រាប់ជំនួបទ្វេភាគី។
 

ជុំវិញរឿងនេះ អ្នកនាំពាក្យក្រសួងការពារជាតិចិន ក៏បញ្ជាក់ដែថា ប៉េកាំងបើកទ្វារចំហសម្រាប់ជំនួបនេះ​។ ក្នុងសេចក្ដីថ្លែងការណ៍នៅថ្ងៃទី២០ ខែវិច្ឆិកា លោក Tan Kefei អះអាងថា ចិនមាន​អាកប្បកិរិយា​សកម្ម និងបើកចំហសម្រាប់ការផ្លាស់ប្តូរជាមួយអាម៉េរិក។ បើតាមអ្នកនាំពាក្យរូបនេះថា ភាគី​ទាំងពីរ​កំពុងសម្របសម្រួលទាក់ទងនឹងការ ផ្លាស់ប្តូរណាមួយនៅវេទិកាខាងលើដែលនឹងធ្វើឡើងនៅថ្ងៃទី២៣ ខែវិច្ឆិកានៅកម្ពុជា។ 

 

បើកើតមានមែន កិច្ចប្រជុំមួយនេះនឹងតំណាងឱ្យការផ្លាស់ប្តូរ​យោធាកម្រិតខ្ពស់ជា​លើកដំបូង​រវាង​ប្រទេសទាំងពីរចាប់តាំងពីចិនបានបញ្ឈប់ការសន្ទនាជាទៀងទាត់នៅក្នុងខែសីហាក្នុងការឆ្លើយតបចំពោះដំណើរទស្សនកិច្ចរបស់ប្រធានសភាតំណាងអាម៉េរិកលោកស្រី ណាន់ស៊ី ផេឡូស៊ី ទៅ​កាន់​កោះ​តៃវ៉ាន់។ 

 

នៅឥណ្ឌូណេស៊ីកាលពីសប្តាហ៍មុននៅខាងក្រៅកិច្ចប្រជុំកំពូលក្រុមប្រទេសសេដ្ឋកិច្ចរីកចម្រើនទាំង ២០ ប្រធានាធិបតីចិន ស៊ី ជិនភីង និងប្រធានាធិបតីអាម៉េរិកលោក ចូ​ បៃឌិន បានជួប​ប្រជុំ​ទល់​មុខ​គ្នា​ជាលើកដំបូង។ ទំនាក់ទំនង​រវាង​ប្រទេស​ដែលមាន​សេដ្ឋកិច្ច​ធំជាងគេ​ទាំង​ពីរ​របស់​ពិភពលោក​កាន់តែ​យ៉ាប់យ៉ឺន​ក្នុង​រយៈពេល​ប៉ុន្មាន​ឆ្នាំ​ចុងក្រោយ​នេះ​ ចំពេល​មាន​បញ្ហា​ដូចជា​ពាណិជ្ជកម្ម សិទ្ធិមនុស្ស និង​តៃវ៉ាន់ថែមទៀត៕