មហាក្សត្រ Al-Sultan Abdullah បានលើកឡើងនៅថ្ងៃ ទី២២ ខែវិច្ឆិកាថា ទ្រង់​នឹង​សម្រេចចិត្តជ្រើសរើសនាយករដ្ឋមន្ត្រីថ្មីក្នុងចំណោមមេដឹកនាំគណបក្សដែលទទួលបានការគាំទ្រពីការបោះឆ្នោតថ្ងៃទី១៩ ខែវិច្ឆិកា។ មេដឹកនាំប្រឆាំង អាន់វ៉ា អ៊ីប្រាហ៊ីម  និងអតីតនាយករដ្ឋមន្ត្រី មូហ៊ីឌីន យ៉ាស៊ីន ដែលទទួលសំឡេងគាំទ្រលំដាប់ទី១ និងទី២ បានចូលគាល់ព្រះអង្គរួចហើយជុំវិញការបង្កើតរដ្ឋាភិបាលថ្មី ខណៈដែលបក្សទាំងពីរមិនបានទទួលការគាំទ្រគ្រប់គ្រាន់ដើម្បីបង្កើតរដ្ឋាភិបាលឡើយ​។

 

ស្ដេច Al-Sultan Abdullah ឡើងគ្រងរាជ្យក្នុងឆ្នាំ ២០១៩ ក្នុងព្រះជន្ម៥៩វស្សា និងជាសេ្ដចទី១៦ បន្ទាប់ពីម៉ាឡេស៊ីទទួលបានឯករាជ្យពីចក្រភពអង់គ្លេសក្នុងឆ្នាំ១៩៥៧។ ម៉ាឡេស៊ី មាន​ប្រព័ន្ធ​រាជា​ធិប​តេយ្យអាស្រ័យរដ្ឋធម្មនុញ្ញពិសេសដែលព្រះរាជាត្រូវបានជ្រើសរើសជាវេនពីគ្រួសាររាជវង្សនៃ​រដ្ឋ​ចំនួន៩ ហើយរយៈពេលសោយរាជ្យនីមួយៗគឺរយៈពេល​៥ឆ្នាំ។

 

យ៉ាងណាមិញ ព្រះរាជាមិនមែនតែងតែមានអំណាចក្នុងការជ្រើសរើសមេដឹកនាំប្រទេសនោះឡើយ។ ជាធម្មតា ការបោះឆ្នោត ជាមធ្យោបាយកំណត់នាយករដ្ឋមន្ត្រីក្រោមប្រព័ន្ធសភា។ ខណៈ​នយោបាយ​ម៉ាឡេស៊ីមិនមានស្ថិរភាពក្នុងរយៈពេល២ឆ្នាំចុងក្រោយនេះ ស្ដេច Al-Sultan Abdullah ដែលប្រតិបត្តិតាមរដ្ឋធម្មនុញ្ញខ្ជាប់ខ្ជួន ក៏ត្រូវដើរតួសម្របសម្រួល ដើម្បីទម្លាយការជាប់គាំងពេលនេះ។ 

 

ការប្រើសិទ្ធិអំណាចក្នុងការជ្រើតាំងមេដឹកនាំដោយព្រះមហាក្សត្រធ្លាប់កើតមានពីមុន។ ព្រះរាជា Al-Sultan Abdullah តែងតាំងនាយករដ្ឋមន្ត្រីចំនួនពីររូបកន្លងមក ប៉ុន្តែនេះជា​លើក​ទី​មួយ​ដែល​ព្រះរាជា​ជ្រើសតាំងនាយករដ្ឋមន្ត្រីដោយសារ​មិនមាន​សំឡេង​គាំទ្រ​គ្រប់​គ្រាន់​ក្នុង​សភា។ ស្ដេច Al-Sultan Abdullah បានជ្រើងតាំងនាយករដ្ឋមន្ត្រី មូហ៊ីឌីន ក្នុងខែកុម្ភៈឆ្នាំ ២០២០ ក្រោយពេលមហាធៀ មហាម៉ាត់ បានចុះចេញពីតំណែងនៅពេលនោះដោយសារតែ​ការបាក់​បែក​បក្ស​សម្ព័ន្ធ។ 

 

តិចជាងមួយឆ្នាំក្រោយសម្ព័ន្ធលោក មូហ៊ីឌីន ត្រូវបានបាក់បែក មហាក្សត្រអង្គនេះ បាន​ស្នើឱ្យ​សភា​សម្រេចជ្រើសរើសនាយករដ្ឋមន្ត្រីបន្ទាប់ទៀតគឺលោក Ismail Sabri Yaakob ដែលកាន់តំ​ណែង​រហូត​ដល់ការបោះឆ្នោតថ្មីៗនេះ។ 

 

ចំពោះជំហានបន្ទាប់  ព្រះរាជា Al-Sultan Abdullah បានកោះហៅសមាជិកសភា ៣០ នាក់ពីសម្ព័ន្ធ Barian National សម្រាប់កិច្ចប្រជុំមួយនៅថ្ងៃទី២៣ ខែវិច្ឆិកាដើម្បីកំណត់នាយករដ្ឋមន្ត្រីបន្ទាប់៕