កីឡាករនាគមាសខេត្តបន្ទាយមានជ័យ ឃុន បូរ៉ា មុននឹងមកដល់វគ្គផ្តាច់ព្រ័ត្រនេះគេបានផ្តួលកីឡាករ វ៉ាន់ វឿន ឱ្យសន្លប់ក្នុងទឹកទី៣ ចំណែកកីឡាកររាហ៊ូមាស ឈុត សេរីវ៉ាន់ថង ប្រកួតចុងក្រោយគេបានផ្តួលកីឡាករ សូត្រ វាសនា ឱ្យសន្លប់ក្នុងទឹកទី២។ សម្រាប់ បូរ៉ា និងវ៉ាន់ថង អ្នកទាំងពីរធ្លាប់ជួបគ្នា៤លើក ដោយបូរ៉ា ឈ្នះ២ ស្មើ១ និងចាញ់១។

 

ជាមួយគ្នានេះដែរនាគមាសខេត្តបន្ទាយមានជ័យ ឃុន បូរ៉ា មិនហ៊ានដាក់ក្តីរំពឹងខ្ពស់ពេកនោះទេសម្រាប់វគ្គផ្តាច់ព្រ័ត្រនេះ ទោះបីធ្លាប់ឈ្នះ វ៉ាន់ថង ពីរលើករួចមកហើយក្តីនាពេលកន្លងទៅ តែយ៉ាងណា បូរ៉ា នៅតែសង្ឃឹម ៥០លើ៥០ ព្រោះរូបគេបានហ្វឹកហាត់ពេញលេញបនញទាប់ពីសម្រាករយៈពេល៣សប្តាហ៍មកនេះ។

 

ឃុន បូរ៉ា និយាយថា៖«ការជួបកីឡាករ ឈុត សេរីវ៉ាន់ថង លើកនេះខ្ញុំមិនហ៊ានរំពឹងខ្ពស់ទេ អាច៥០លើ៥០ ព្រោះបច្ចុប្បន្ន វ៉ាន់ថង ល្អច្រើនស្នៀតគាត់ចេញលឿន កណ្តាប់ដៃធ្ងន់ ពិសេសកម្លាំងគាត់ខ្លាំង ទាំងអស់នេះខ្ញុំមិនអាចធ្វេសប្រហែសបានទេ ប៉ុន្តែខ្ញុំនៅតែសង្ឃឹមព្រោះបីសប្តាហ៍មកនេះខ្ញុំបានហ្វឹកហាត់បានពេញលេញល្អ និងថែរក្សាកម្លាំងបានល្អ»។ កីឡាករនាគមាសខេត្តបន្ទាយមានជ័យ ប្រាប់សារព័ត៌មានថ្មីៗដូច្នេះ។

 

ក្រៅពីគូដណ្តើមខ្សែក្រវាត់នេះ ក៏មានកីឡាករ សូត្រ វាសនា ត្រូវប្រជែងដំណែងលេខ៣ ជាមួយកីឡាករ វ៉ាន់ វឿន ដែលអ្នកទាំងពីរត្រូវបានបរាជ័យនៅវគ្គពាក់កណ្តាលផ្តាច់ព្រ័ត្រ ដោយ សូត្រ វាសនា ចាញ់ ឈុត សេរីវ៉ាន់ថង និង វ៉ាន់ វឿន ចាញ់ ឃុន បូរ៉ា។

 

គួរបញ្ជាក់ថា ការប្រកួតវគ្គផ្តាច់ព្រ័ត្រពានរង្វាន់ខ្សែក្រវាត់«សម្តេច ទៀ បាញ់» លេខមួយ ទទួលបានខ្សែក្រវាត់ ដែលមានតម្លៃស្មើផ្ទះវីឡាភ្លោះមួយខ្នង និងប្រាក់រង្វាន់៦០០០០០០៛(ប្រាំមួយលានរៀល) ចំណែកលេខពីរទទួលបានដីឡូតិ៍ទំហំ១០x២០ម៉ែត្រ ប្រាក់អម ៥០០០០០០៛(ប្រាំលានរៀល) ខណៈលេខបីដីឡូតិ៍ទំហំ ៥x២០ម៉ែត្រ ប្រាក់អម៤០០០០០០៛(បួនលានរៀល) និងលេខបួនដីឡូតិ៍ទំហំ ៥x២០ម៉ែត្រ ៣០០០០០០៛(បីលានរៀល)៕