បណ្ដាញ ALiSEA ជាវេទិកាថ្នាក់តំបន់ ដែលនឹងជួយពង្រឹងផ្នែកសន្តិសុខស្បៀង និងអាហារូបត្ថម្ភ រួមទាំងសុខសុវត្ថិភាពរបស់កសិករ និងអ្នកបរិភោគតាមរយៈការកាត់បន្ថយការប្រើប្រាស់ជី-ថ្នាំគីមី។ ជាពិសេសជួយដល់វិស័យកសិអេកូឡូស៊ីទាំងក្នុងស្រុក និងតំបន់។
ប្រព័ន្ធកសិកម្ម និងស្បៀងអាហារក្នុងតំបន់ កាន់តែមាននិរន្តរភាព សុវត្ថិភាព និងបរិយាប័ន្ន តាមរយៈការរួមបញ្ចូលសក្តានុពលនៃកសិអេកូឡូស៊ី។ នេះជាការលើកឡើងរបស់អ្នកជំនាញក្នុងវិស័យកសិកម្ម ។
លោក សុខ សុថា បានពន្យល់ថា រចនាសម្ព័ន្ធនៃបណ្ដាញ ALiSEA គឺមានការចូលរួមពីរដ្ឋាភិបាល សង្គមស៊ីវិល វិស័យឯកជន និងកសិករខ្នាតតូច ដើម្បីផលិត និងប្រើប្រាស់ចំណេះដឹងទៅបង្កើតដំណើរការនវានុវត្តន៍ ប្រកបដោយនិរន្តរ៍ភាព នៃការអនុវត្តគោលនយោបាយសេដ្ឋកិច្ច-កសិកម្មរបស់កម្ពុជា។
លោក សុខ សុថា នាយកCFAP និងជាក្រុមប្រឹក្សាភិបាលបណ្តាញ ALiSEA។ រូបថត៖ អ៊ូ សុខមាន
នាយកសហព័ន្ធកសិករកម្ពុជានៃអ្នកផលិតកសិកម្ម(CFAP) និងជាក្រុមប្រឹក្សាភិបាលបណ្តាញ ALiSEAរូបនេះ បានថ្លែងប្រាប់សារព័ត៌មានថ្មីៗថា ការអនុវត្តកសិអេកូឡូស៊ី គឺមានសារៈសំខាន់មែនទែនសម្រាប់កម្ពុជា ក្នុងការអភិវឌ្ឍវិស័យកសិកម្មឱ្យកាន់តែសក្កានុពលផ្នែកស្បៀងអាហារដែលមានសុវត្ថិភាពខ្ពស់ បើធៀបនឹងប្រទេសជិតខាង។
«ការអនុវត្តកសិកម្មបែបកសិអេកូឡូស៊ីនេះ អាចជួយដល់ក្រុមកសិករកម្ពុជាយើងបានច្រើន តាមរយៈការកាត់បន្ថយធាតុចូលពីបរទេស និងបង្កើតផលិតថ្មីសម្រាប់ទីផ្សារ»។ លោក សុថា បាននិយាយបែបនេះដោយបន្តរៀបរាប់ថា៖ «បើយើងអនុវត្តកសិកម្មដែលប្រើប្រាស់ជីនិងថ្នាំពុលគីមីដូចសព្វថ្ងៃនេះ គឺមិនអាចប្រកួតប្រជែងឈ្នះគេបានឡើយ ជាពិសេសប្រទេសវៀតណាម ពីព្រោះគេដើរមុនហើយបានឆ្ងាយហើយ ទាំងផ្នែកបច្ចេកទេស ទាំងហេដ្ឋារចនាសម្ព័ន្ធគាំទ្រដល់វិស័យកសិកម្ម រួមទាំងការលើកចិត្តនានាពីរដ្ឋាភិបាល»។
សម្រាប់នាយកសហព័ន្ធកសិករកម្ពុជានៃអ្នកផលិតកសិកម្មរូបនេះ ការអនុវត្តកសិកម្មបែបកសិអេកូឡូស៊ី គឺមាននិរន្តរភាពខ្ពស់ចំពោះវិស័យកសិកម្មកម្ពុជា ដោយសារតែកម្ពុជាជាប្រទេសមានក្រុមកសិករខ្នាតតូចច្រើន ហើយកសិករនីមួយៗគឺមានធនធានដែលបម្រើដល់ផ្នែកដាំដុះនៅកន្លែងស្រាប់ ដូចជា៖ ការផលិតជី កំប៉ុស្ត និងការផលិតថ្នាំពុលបណ្តេញសត្វល្អិតចង្រៃបែបធម្មជាតិ ជាដើម...។
បច្ចុប្បន្ន បណ្ដាញALiSEA នៅកម្ពុជាមានសមាជិកចំនួន ៦០ ស្ថាប័ន ដែលអនុវត្តការងារ និងវិធីសាស្រ្តផ្សេងៗទាក់ទងនឹងកសិអេកូឡូស៊ី ខណៈបណ្តាញនេះក្នុងថ្នាក់តំបន់(កម្ពុជា ឡាវ វៀតណាម និងមីយ៉ាន់ម៉ា) មានសមាជិកជាង ២០០ស្ថាប័ន។
បើតាមលោកស្រីLucie Reynaud ប្រធានសម្របសម្រួលគម្រោង ASSET នៃ អង្គការ GRET បណ្តាញALiSE ជាបណ្តាញបើកចំហរកៀរគររកសមាជិក ដែលធ្វើការងារទាក់ទងនឹងកសិអេកូឡូស៊ី ដើម្បីអភិវឌ្ឍវិស័យកសិកម្ម។ លោកស្រី បានបញ្ជាក់ថា បណ្ដាញ ALiSEA នេះបង្កើតឡើងក្នុងគោលដៅពង្រឹងការចែករំលែកចំណេះដឹង និងបទពិសោធក្នុងចំណោមអ្នកអនុវត្តការងារ និងគំនិតផ្តូចផ្ដើមទាក់ទងនឹងកសិអេកូឡូស៊ី, បង្កើនភាពអាចមើលឃើញ និងទំនុកចិត្តនៃចលនាកសិអេកូឡូស៊ីទៅដល់អ្នកធ្វើគោលនយោបាយ រួមទាំងការជំរុញអភិវឌ្ឍ និងការសម្របខ្លួនទៅនឹងការអនុវត្តកសិអេកូឡូស៊ីរវាងកសិករ។
លោកស្រីLucie Reynaud ប្រធានសម្របសម្រួលគម្រោង SSET នៃអង្គការ GRET។ រូបថត៖ អ៊ូ សុខមាន
លោកស្រីLucie Reynaud បន្តរៀបរាប់ប្រាប់សារព័ត៌មានថ្មីៗ ក្នុងមហាសន្និបាតថ្នាក់ជាតិនៃបណ្ដាញកសិអេកូឡូស៊ី (ALiSEA) នៅសណ្ឋាគារសាន់វ៉េ នាថ្ងៃទី២៣វិច្ឆិកា ដូច្នេះ៖« ការអនុវត្តបច្ចេកទេសកសិអេកូឡូស៊ី គឺផ្តោតសំខាន់លើការប្រើប្រាស់ធនធានមានស្រាប់ក្នុងតំបន់យកមកប្រើប្រាស់ឡើងវិញ និងកាត់បន្ថយការប្រើប្រាស់ជីថ្នាំពុលគីមីកសិកម្ម។ ពេលដែលយើងអនុវត្តកសិកម្មបែបនេះ វានឹងជួយពង្រឹងចម្រុះភាពនិងសត្វល្អិតមានប្រយោជន៍ក្នុងដីដែលថែរក្សាគ្នាទៅវិញទៅមក ដើម្បីកែលម្អគុណភាពដី បរិស្ថាន»។
ជាមួយគ្នានេះ លោកស្រីក៏បានលើកទឹកចិត្តដល់កសិករខ្នាតតូចទាំងអស់ ឱ្យអនុវត្តកសិកម្មបែបកសិអេកូឡូស៊ី ដើម្បីទទួលបានផលចំណេញ ជួយដល់បរិស្ថាន និងទទួលបានចំណែកទីផ្សារខ្ពស់ នៃការផលិតស្បៀងអាហារដែលមានសុវត្ថិភាពទាំងអ្នកផលិត និងទាំងអ្នកទទួលទាន៕