តាមសេចក្តីថ្លែងការណ៍មួយរបស់ការិយាល័យប្រឆាំងអំពើពុករលួយម៉ាឡាវីចេញនៅថ្ងៃទី២៥ ខែវិច្ឆិកា លោកអនុប្រធានាធិបតី Saulos Klaus Chilima ត្រូវបានបញ្ជូនទៅតុលាការ ដែលលោករងបទចោទចំនួន ៣ ក្នុងនោះរួមទាំងការប្រព្រឹត្តអំពើពុករលួយផង។

 

យ៉ាងណាមិញអនុប្រធានាធិបតីម៉ាឡាវី មិនបានបញ្ជាក់អ្វីឡើយជុំវិញការចោទប្រកាន់នេះ ប៉ុន្តែលោកអះអាងថា វាអាស្រ័យលើនីតិវិធីតុលាការ។ 

 

«ខ្ញុំមិនមានយោបល់អ្វីឡើយ។ យើងនឹងអនុញ្ញាតឱ្យតុលាការដំណើរការនីតិវិធីរបស់ខ្លួន»។ លោក Chilima បានបញ្ជាក់បែបនេះទៅកាន់អ្នកសារព័ត៌មាន បន្ទាប់ពីត្រូវបានអនុញ្ញាតឱ្យនៅក្រៅឃុំ។ 

 

តាមសេចក្តីថ្លែងការណ៍របស់ការិយាល័យប្រឆាំងអំពើពុករលួយម៉ាឡាវី ដែលស្ថិតនៅតំបន់អាហ្វ្រិកមួយនេះ លោក Chilima បានទទួលសំណូក ដើម្បីជួយដល់ក្រុមហ៊ុន Xaviar Limited និង Malachitte FZ ដែលមានជាប់ពាក់ព័ន្ធនឹងលោក Zuneth Sattar អ្នកជំនួញជនជាតិអង់គ្លេស។ បើតាមអង្គភាពប្រឆាំងអំពើពុករលួយនេះ លោកអនុប្រធានាធិបតីម៉ាឡាវី បានទទួលលុយប្រមាណ ២៨ម៉ឺនដុល្លារ និងសម្ភារផ្សេងទៀត។ 

 

ការិយាល័យប្រឆាំងអំពើពុករលួយម៉ាឡាវី ក៏បានស៊ើបអង្កេតលើលោក Sattar និងមន្រ្តីម៉ាឡាវីផ្សេងទៀតផងដែរ ក្រោមបទចោទធ្វើឱ្យប៉ះពាល់ដល់ធនធានរបស់រដ្ឋ៕