ថ្វីដ្បិតពិធីបើកជោគជ័យមួយចំនួនធំក៏ពិត គណៈកម្មាធិការជាតិរៀបចំការប្រកួតព្រឹត្តិការណ៍កីឡាជាតិលើកទី៣ និងកីឡាប៉ារ៉ាហ្គេមលើកទី១ នៅតែត្រូវកែលម្អភាពខ្វះចន្លោះមួយចំនួនបន្ថែមទៀតសម្រាប់ក្នុងពិធីបិទ នៅថ្ងៃទី៣០​ ខែវិច្ឆិកា ខាងមុខនេះឱ្យមានភាពរលូន។

 

លោក វ៉ាត់ ចំរើន អគ្គលេខាធិការគណៈកម្មាធិការជាតិ CAMSOC បានបញ្ជាក់ថា កិច្ចប្រជុំបានពិភាក្សាយ៉ាងយកចិត្តទុកដាក់ទៅលើបញ្ហាខ្វះខាតដែលមានការចូលរួមពីគណៈកម្មការចម្រុះ មានសាលារដ្ឋបាលរាជធានីភ្នំពេញ ផ្នែកសន្តិសុខសណ្តាប់ធ្នាប់ ក្រសួងអប់រំយុវជន និងកីឡា និងអគ្គនាយកដ្ឋាន នៃអគ្គនាយកដ្ឋានកីឡាជាតិ។ បើតាមមន្រ្តីដដែល គោលដៅសំខាន់ជាងគេគឺសុវត្ថិភាពរបស់ប្រជាពលរដ្ឋ និងទឹកពិសា។

 

ចំពោះអ្វីដែលពិសេសនៅក្នុងពិធីបិទព្រឹត្តិការណ៍កីឡាជាតិលើកទី៣ និងកីឡាប៉ារ៉ាហ្គេមលើកទី១ លោក អគ្គលេខាធិការ បានស្រាយបញ្ជាក់ថា នឹងធ្វើឱ្យទិដ្ឋភាពទាំងមូលក្នុងពហុកីឡដ្ឋានជាតិមានភាពអស្ចារ្យ ដែលជាក្តីសង្ឃឹមមួយសម្រាប់បន្តទៅថ្ងៃអនាគត។

 

លោក វ៉ាត់ ចំរើន និយាយថា៖«នៅក្នុងពិធីបិទនេះគឺយើងបានត្រៀមតារាចម្រៀងល្បីៗប្រចាំព្រះរាជាណាចក្រកម្ពុជារបស់យើង និងរៀបចំឱ្យមានការសម្តែងមួយចំនួនទៀត ដែលផ្តល់ក្តីសង្ឃឹមទៅអនាគតសម្រាប់ប្រទេសជាតិរបស់យើងឱ្យមានភាពត្រចះត្រចង់»។

 

គួរបញ្ជាក់ថា ពិធីបិទព្រឹត្តិការណ៍កីឡាជាតិលើកទី៣ និងកីឡាប៉ារ៉ាឡាំពិក(ជនមានពិការភាព)លើកទី១ នឹងធ្វើនៅថ្ងៃទី៣០ ខែវិច្ឆិកា ឆ្នាំ២០២២ នាពហុកីឡ្ឋានជាតិមរតកតេជោ ក្រោមវត្តមានសម្តេចនាយករដ្ឋមន្រ្តី ហ៊ុន សែន និងប្រជាពលរដ្ឋជាង៤ម៉ឺននាក់៕