សង្គ្រាមនៅអ៊ុយក្រែនបានធ្វើឱ្យទាហានខ្ទង់ម៉ឺនបានស្លាប់ និងរងរបួសទាំងភាគីរុស្ស៊ី និងអ៊ុយក្រែន។ នេះបើយោងតាមរបាយការណ៍អាម៉េរិក។ ជនជាតិរុស្សីរាប់សែននាក់ត្រូវបានបញ្ជូនទៅប្រយុទ្ធនៅ​អ៊ុយក្រែន។ ទាហានកំណែនជាច្រើនម៉ឺននាក់ក្នុងចំណោមយោធាបម្រុងជាង៣០ម៉ឺននាក់ដែលត្រូវ​បានកេណ្ឌក្នុងខែកញ្ញា ក៏ត្រូវបានបញ្ជូនទៅអ៊ុយក្រែនដែរ។

 

លោក ពូទីន  នៅថ្ងៃទី២៥ ខែវិច្ឆិក ក៏បានជួបជាមួយម្ដាយរបស់ទាហានពលីជីវិតក្នុងសង្គ្រាមចំនួន១៧ នាក់នៅឯនិវេសនដ្ឋាន Novo-Ogaryovo របស់លោកនៅខាងក្រៅទីក្រុងមូស្គូ​ដើម្បី​ប្រារព្ធ​ទិវា​មាតា​រុស្ស៊ី​។ លោក ពូទីន បានលើកឡើងថា​ លោកយល់ពីការព្រួយបារម្ភរបស់​ម្តាយទាហានដែលពលី និង​ការ​ឈឺ​ចាប់របស់ពួកគេដែលបានបាត់បង់កូនប្រុសក្នុងសង្ក្រាមនៅអ៊ុយក្រែន។

«ខ្ញុំ​ចង់​ឱ្យ​អ្នក​ដឹង​ថា ខ្ញុំ​ផ្ទាល់ និង​ថ្នាក់​ដឹកនាំ​ប្រទេស​ទាំង​មូល យើង​ចែករំលែក​ការ​ឈឺ​ចាប់​របស់​អ្នក»។​ មេដឹកនាំរុស្ស៊ីបានថ្លែងបែបនេះ រួចបញ្ជាក់ថា គ្មានអ្វីអាចជំនួសការបាត់បង់កូនប្រុសនោះទេ ជាពិសេស​សម្រាប់ម្តាយគ្រប់រូប។

ស្រ្តីជាម្តាយដែលទៅពីផ្នែកផ្សេងៗ ហើយជួបមេដឹកនាំរុស្ស៊ី បានសម្តែងអំណរគុណចំពោះ​ការ​ដឹកនាំ​របស់លោក ពូទីន និងបានជូនពរលោកឱ្យមានសុខភាពល្អ។ នេះបើតាមទីភ្នាក់ងារព័ត៌មាន Reuters ។ យ៉ាងណាមិញ សាច់ញាតិរបស់ទាហានផ្សេងទៀតដែលបានស្លាប់ក្នុងសង្រ្គាមដែរ និយាយថា វិមានក្រឹមឡាំងមិនបានអើពើការអង្វររបស់ពួកគេសម្រាប់កិច្ចប្រជុំមួយផ្សេងឡើយ ហើយអះអាងថា ជំនួបខាងលើ ត្រូវបានរៀបចំយ៉ាងប្រុងប្រយ័ត្ន។

 

​អំពីការខាតបង់​របស់ខ្លួន​ក្នុង​សង្គ្រាម ​កាលពី​ថ្ងៃទី២១ ខែកញ្ញា ​រដ្ឋមន្ត្រី​ការពារជាតិ​រុស្ស៊ី លោក Sergei Shoigu និយាយថា ទាហាន​រុស្ស៊ី​ចំនួន៥,៩៣៧នាក់​ត្រូវបានស្លាប់។ ចំនួននេះគឺទាបជាងការប៉ាន់​ស្មានរបស់អន្តរជាតិ។ អាម៉េរិកបានប៉ាន់ប្រមាណកាលពីថ្ងៃទី៩ ខែវិច្ឆិកាថា ទាហានរុស្ស៊ី និង​អ៊ុយក្រែន​ជាង១០ម៉ឺននាក់ ត្រូវបានស្លាប់ ឬរងរបួស៕