ជាតិ
នយោបាយជាតិ
ស្ថាបនិក និងថ្នាក់ដឹកនាំគណបក្សប្រជាធិបតេយ្យមូលដ្ឋាន។ រូបភាព៖ ហ្វេសប៊ុកគណបក្សប្រជាធិបតេ្យមូលដ្ឋាន
×![]()
ភ្នំពេញ៖ គណបក្សប្រជាធិបតេយ្យមូលដ្ឋាន (គបម) បានចេញសេចក្ដីថ្លែងការណ៍ ស្វាគមន៍ដែលលោក យ៉ង សាំងកុមារ ទទួលបានឋានៈតួនាទី ជារដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការក្រសួងកសិកម្ម នៅថ្ងៃទី២៩ វិច្ឆិកានេះ។ គបម អះអាងថា ឋានៈតួនាទីនេះ ស័ក្ដិសមនឹងសមត្ថភាពរបស់លោកបណ្ឌិត យ៉ង សាំងកុមារ។
នៅយប់ថ្ងៃទី២៩ វិច្ឆិកានេះ គណបក្សប្រជាធិបតេយ្យមូលដ្ឋាន (គបម) បានចេញសេចក្ដីថ្លែងការណ៍ទាក់ទងនឹងតំណែងដែលលោក យ៉ង សាំងកុមារ ទទួលបាន ក្រោយចូលរួមជីវភាពជាមួយគណបក្សប្រជាជនកម្ពុជា។ ក្នុងសេចក្ដីថ្លែងការណ៍នេះ គណបក្សប្រជាធិបតេយ្យមូលដ្ឋាន លើកឡើងដូច្នេះ៖ «ស្វាគមន៍ដែលលោកបណ្ឌិត យ៉ង សាំងកុមារ ទទួលបានឋានៈតួនាទី ស័ក្ដិសមនឹងសមត្ថភាពរបស់លោក»។
ទន្ទឹមនឹងនេះ គបម សង្ឃឹមថា រដ្ឋាភិបាល នឹងផ្ដល់អំណាច ធនធាន និងសិទ្ធិគ្រប់គ្រាន់ជូនលោក យ៉ង សាំងកុមារ ក្នុងការបេសកកម្មជួយកសិករខ្មែរ។ បើតាមសេចក្ដីថ្លែងការណ៍ខាងលើ គបម នឹងរៀបចំកិច្ចប្រជុំផ្ទៃក្នុង ដើម្បីរកអ្នកមកជំនួសតួនាទីរបស់លោក យ៉ង សាំងកុមារ។
សូមបញ្ជាក់ថា លោក យ៉ង សាំងកុមារ ស្ថាបនិកគណបក្សប្រជាធិបតេយ្យមូលដ្ឋាន ត្រូវបានតែងតាំងជារដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បន្ទាប់ពីលោកប្រកាសចូលរួមជាមួយគណបក្សប្រជាជនកម្ពុជា។ ជាមួយគ្នានេះ បណ្ឌិតកសិកម្មរូបនេះ ក៏បានជួបជាមួយសម្ដេច ហ៊ុន សែន កាលពីថ្ងៃទី២៨ វិច្ឆិកាផងដែរ៕
Tag:
នយោបាយ
កសិកម្ម
យ៉ង សាំងកុមារ
© រក្សាសិទ្ធិដោយ thmeythmey.com
