តាមរយៈរបាយការណ៍កម្រាស់ជិត២០០ទំព័រ ដែលត្រូវបានផ្សព្វផ្សាយនៅថ្ងៃទី២៩ ខែវិច្ឆិកា​ ឆ្នាំ២០២២ ក្រសួងការពារជាតិអាម៉េរិក ប្រាប់ទៅសភាដូច្នេះថា៖«កងទ័ពចិននៅមូលដ្ឋានសមុទ្ររាម ប្រទេសកម្ពុជា នឹងក្លាយជាមូលដ្ឋានកងទ័ពក្រៅប្រទេសដំបូងរបស់ចិន ក្នុងតំបន់ឥណ្ឌូ-ប៉ាស៊ីហ្វិក»។ 
 

ភាគីចិនបកស្រាយនាពេលថ្មីៗនេះថា ចិន ពិតជាបានជួយកម្ពុជាក្នុងការអភិឌ្ឍមូលដ្ឋានទ័ពរាមមែន តែមិនដាក់ទ័ពឲ្យឈរជើងនៅទីនោះឡើយ។ ក្នុងសន្និសីទសារព័ត៌មាន នាពាក់កណ្តាលខែវិច្ឆិកា ឆ្នាំ២០២២នេះ អ្នកស្រី ម៉ៅ នីង (Mao Ning) អ្នកនាំពាក្យក្រសួងការពារជាតិចិន ថ្លែងទៅកាន់អ្នកកាសែតដូច្នេះថា៖«ការអភិវឌ្ឍមូលដ្ឋានទ័ពរាម ដែលមានការជួយពីចិន គឺជាសកម្មភាពធម្មតានៃការផ្តល់ជំនួយដល់កម្ពុជា។ គោលបំណង គឺពង្រឹងសមត្ថភាពទ័ពជើងទឹកកម្ពុជា ក្នុងការការពារបូរណភាពដែនសមុទ្ររបស់កម្ពុជាខ្លួន​ឯង»។
 

ក្រសួងការពារជាតិអាម៉េរិក លើកឡើងក្នុងរបាយការណ៍ថា បើចិន អាចប្រើប្រាស់ជំនួយនេះទៅជាវត្តមានកងទ័ពនៅមូលដ្ឋានរាម គឺបង្ហាញថា យុទ្ធសាស្រ្តកងទ័ពចិននៅក្រៅប្រទេស ត្រូវបានធ្វើពិពិធកម្ម ដោយបូករួមទាំងកិច្ចខិតខំក្នុងការកសាងសមត្ថភាពកងទ័ពផងដែរ។ 
 

សម្តេច ទៀ បាញ់ ឧបនាយករដ្ឋមន្រ្តី-រដ្ឋមន្រ្តីក្រសួងការពារជាតិកម្ពុជា ក្នុងសន្និសីទកាសែត កាលពីថ្ងៃទី២៣ ខែវិច្ឆិកា ឆ្នាំ២០២២ ស្តីពីលទ្ធផលនៃកិច្ចប្រជុំរដ្ឋមន្រ្តីការពារជាតិអាស៊ាន នៅខេត្តសៀមរាប បានប្រកាសជាថ្មីថា នៅកម្ពុជា គ្មានទ័ពបរទេសឡើយ ហើយរដ្ឋធម្មនុញ្ញកម្ពុជា ក៏ពុំអនុញ្ញាតឲ្យមានទ័ពបរទេសដែរ។ សម្តេច អះអាងដូចលើកមុនៗថា ការអភិវឌ្ឍនៅមូលដ្ឋានទ័ពរាម មិនបង្កការគំរាមកំហែងដល់សន្តិសុខរបស់អ្នកដទៃនោះទេ។ 

 

ប្រមុខការពារជាតិកម្ពុជា មានប្រសាសន៍ដូច្នេះថា៖«សូម [អាម៉េរិក] គាត់ កុំកង្វល់អីរឿងមូលដ្ឋានហ្នឹង សូមកង្វល់រឿងផ្សេងជាងទៅចុះ។ កន្លែងនេះ គឺតូចមួយទេ។ វា​ប៉ុនផែនេសាទអីទេ មិនមែនទៅធ្វើស្អីធំដុំទេ។ ហើយកិច្ចការងារនេះ ត្រូវដំណើរការអភិវឌ្ឍនៅកម្ពុជា»៕