ជាតិ
ពីនេះ ពីនោះ
ព័ត៍មានសុខភាព
សុខភាព
×![]()
ដោយ: សារព័ត៌មានថ្មីៗ
មនុស្សគ្រប់រូប មិនថាប្រុស ឬស្រីទេ តែងតែប្រាថ្នាចង់បានធ្មេញដ៏ស និងស្រស់ស្អាតជានិច្ច ដើម្បីបង្កើនសម្រស់របស់ខ្លួន។ ទោះបីជាយើងទាំងអស់គ្នាសុទ្ធតែចង់បានស្នាមញញឹមដ៏ស្រស់ស្អាតក៏ដោយ ក៏ការព្យាបាលដើម្បីអោយបានដូចបំណងពិតជាមានតម្លៃថ្លៃណាស់ ប៉ុន្តែ អ្វីដែលល្អវិញនោះគឺយើងមានវិធីព្យាបាលដោយខ្លួនឯងមួយចំនួន ដែលវាមិនត្រឹមតែងាយស្រួលទេ តែក៏មិនបាច់ចំណាយអ្វីច្រើនដែរ។
សម្បកចេក
ចេកជាផ្លែឈើដ៏ល្អមួយព្រោះវាផ្ទុកទៅដោយជីវជាតិយ៉ាងច្រើន ប៉ុន្តែ តើអ្នកមានដឹងទេថា សំបកផ្លែចេក គឺជាប្រភពដ៏អស្ចារ្យមួយដែលអាចធ្វើអោយធ្មេញសស្អាតដែរទេ? ដូច្នេះ អ្នកគួរតែកុំអាលចោលសំបកចេកអី ពេលគិតថាចង់ធ្វើអោយធ្មេញសស្អាត។ ចូរយកផ្នែកខាងក្នុងរបស់សំបកវាទៅដុសលើធ្មេញ អោយបានពីរដងក្នុងមួយថ្ងៃជារៀងរាល់ថ្ងៃ។ ជាតិរ៉ែដែលមានក្នុងផ្លែចេកដូចជាប៉ូតាស្យូម ម៉ង់ហ្គាណេស និងម៉ាញ៉េស្យូមអាចត្រូវបានបឺតស្រូបចូលទៅក្នុងធ្មេញ ដើម្បីជួយរក្សាភាពសស្អាតរបស់ធ្មេញអោយមានសុខភាពល្អបំផុត។ ចំពោះសំបកក្រូចវិញ ក៏ជាប្រភពដ៏អស្ចារ្យក្នុងការធ្វើអោយធ្មេញសដែរ។
ផ្លែបឺរី និងស្ត្របឺរី
តើអ្នកមានដឹងទេថា ផ្លែស្ត្របឺរីពណ៌ក្រហមស្រស់អាចជួយធ្វើអោយធ្មេញទៅជាសដែរទេ? ឥឡូវនេះអ្នកបានដឹងហើយ ដូច្នេះ ចូរចាប់ផ្តើមប្រើប្រាស់វាទៅ។ អ្វីដែលអ្នកគួរតែធ្វើនោះគឺ យកផ្លែស្ត្របឺរីមួយ ឬពីរផ្លែមកកិនចូលគ្នាអោយម៉ត់ ហើយលាបលើធ្មេញរយៈពេលពីរទៅបីនាទី។ ក្រោយមកលាងវាអោយបានស្អាតល្អ ឬដុសធ្មេញសម្អាតក៏បានដែរ។ ស្ត្របឺរីសម្បូរទៅដោយអង់ស៊ីមបន្សាបមួយប្រភេទឈ្មោះថា Malic Acid ដែលជួយធ្វើអោយធ្មេញស ហើយជាតិសរសៃរបស់ផ្លែមួយនេះក៏ដើរតួនាទីជាអ្នកបោសស្អាតបាក់តេរីពីក្នុងមាត់ និងធ្មេញបានដែរ។
ការ៉ុត
ការ៉ុត គ្រាន់តែលាងវាអោយស្អាត គឺអាចញ៉ាំទាំងឆៅបានតែម្តង។ ការ៉ុតឆៅមានប្រយោជន៍ខ្លាំងណាស់ក្នុងការបោសសម្អាតកំណកនានាចេញពីធ្មេញ និងដើរតួនាទីជាអ្នកសម្អាតបែបធម្មជាតិទៀតផង។ ជាមួយគ្នានេះដែរ ការយកការ៉ុតឆៅទៅត្រដុសលើធ្មេញនឹងជួយធ្វើអោយធ្មេញមានភាពសស្អាត និងភ្លឺរលោងបាន។ វាក៏ជួយសម្លាប់បាក់តេរីផងដែរ ខណៈពេលដែលផ្តល់អោយធ្មេញ និងអញ្ជាញមានសុខភាពល្អ។ ក្រៅពីការ៉ុត ផ្លែប៉ោមក៏ត្រូវបានគេយល់ថាជាប្រភពដ៏សំខាន់មួយក្នុងការជួយអោយធ្មេញសស្អាតបានដែរ ជាពិសេស ផ្លែប៉ោមអាចជួយបង្ការកុំអោយកើតជំងឺអញ្ចាញធ្មេញ ការរលាកអញ្ចាញធ្មេញ និងសម្លាប់បាក់តេរីបង្កក្លិនស្អុយក្នុងមាត់។
ឈប់ជក់បារី
ប្រាកដណាស់ ការជក់បារីពិតជាគ្មានផលល្អអ្វីដល់សុខភាពឡើយ ប៉ុន្តែ ការផ្តាច់បារីពិតជាមានប្រយោជន៍ច្រើន។ ការជក់បារីនឹងធ្វើអោយធ្មេញទៅជាលឿង ព្រមទាំងមានជំងឺច្រើនទៀតផង។ ដូច្នេះ ប្រសិនជាអ្នកចង់បានធ្មេញភ្លឺរលោង និងសស្អាតវិញ អ្នកគួរតែផ្តាច់បារីហើយ។
ប្រើបំពង់បឺត
ការផឹកទឹកដែលក្តៅពេក ឬត្រជាក់ពេកមិនមែនជារឿងល្អសម្រាប់សុខភាពធ្មេញឡើយ។ ដូច្នេះ បើអាចធ្វើបាន ចូរព្យាយាមផឹកទឹកតែ ឬកាហ្វេដោយប្រើបំពង់បឺតវិញ ព្រោះវានឹងកាត់បន្ថយការប៉ះពាល់ដោយផ្ទាល់ទៅលើធ្មេញ និងភេសជ្ជៈដែលក្តៅៗបាន៕
ត្រួតពិនិត្យដោយ៖ www.health.com.kh
© រក្សាសិទ្ធិដោយ thmeythmey.com
