ក្រុមម្ចាស់ផ្ទះព្រះខ័នរាជស្វាយរៀង ត្រូវទទួលភ្ញៀវវិសាខា នៅម៉ោង៦ និង៣០នាទីល្ងាចនាកីឡដ្ឋានខេត្តស្វាយរៀង។ ព្រះខ័នរាជស្វាយរៀង ហាក់ធ្វើមិនសូវបានល្អសម្រាប់៣ប្រកួតចុងក្រោយរបស់គេ ដោយចាញ់២ ឈ្នះ១ ស្របពេលវិសាខា ៣ប្រកួតចុងក្រោយ ឈ្នះ២ និងចាញ់១។ សម្រាប់ក្រុមទាំងពីរ ប្រវត្តិជួបគ្នា៨លើក ព្រះខ័នរាជស្វាយរៀង ឈ្នះ៣ ស្មើ២ និងចាញ់៣ ក្នុងនោះប្រកួតចុងក្រោយ ព្រះខ័នរាជស្វាយរៀង ចាញ់វិសាខា ១-០។

 

 

ជំនួបដ៏សំខាន់នេះដែរលោក Conor Nestor គ្រូបង្គោលព្រះខ័នរាជស្វាយរៀង មិនមានការព្រួយបារម្ភអ្វីច្រើននោះទេទោះបីការប្រកួតដ៏តឹងតែងមួយនេះគ្មានវត្តមានកីឡាករឆ្នើមមួយចំនួនក៏ដោយ។ អ្វីដែលសំខាន់សម្រាប់ការប្រកួតចុងក្រោយនេះគ្រូសញ្ជាតិអៀរឡង់ ផ្តោតសំខាន់លើការប្រកួត ដោយជំរុញកូនក្រុមប្រឹងប្រែងឱ្យអស់ពីសមត្ថភាពដើម្បីទទួលបានលទ្ធផលល្អ។

 

លោក Conor Nestor បញ្ជាក់ថា៖«យើងបាត់បង់ខ្សែបម្រើកណ្តាល  Takashi Odawara និងខ្សែការពារកណ្តាល Clyde O’ Connell ដោយសារបញ្ហារបួស ស្របពេលយើងមានការប្រកួតដ៏តឹងតែងបំផុត ប៉ុន្តែ! យើងនឹងធ្វើឱ្យអស់ពីសមត្ថភាពដើម្បីឈ្នះ»។

 

ក្នុងពេលជាមួយគ្នានោះដែរក្រុមភ្ញៀវបឹងកេត ក៏នឹងត្រូវទៅសួរសុខទុក្ខម្ចាស់ផ្ទះភ្នំពេញក្រោន លើកចុងក្រោយសប្តាហ៍ទី២៧ សម្រាប់រដូវកាល២០២២ នេះផងដែរនាកីឡដ្ឋាន ស្មាត អ.អេស.អិន។ បឹងកេត ជាក្រុម១ ក្នុងចំណោមក្រុមដែលស្ថិតក្នុងតំបន់ Top4 វគ្គ៤ក្រុមចុងក្រោយ ដែលអស់ឱកាសក្នុងការប្រជែងពានខេមបូឌានព្រីមៀរលីគ។

 

សម្រាប់ក្រុមបឹងកេត មិនទាន់ស្គាល់ពាក្យឈ្នះឡើយនៅ៣ប្រកួតចុងក្រោយរបស់គេ។ នេះជាឱកាសល្អសម្រាប់ភ្នំពេញក្រោនដែលកំពុងធ្វើបានល្អនៅប៉ុន្មានប្រកួតចុងក្រោយ ក្នុងការដណ្តើមជ័យជម្នះពីបឹងកេត ដើម្បីគ្រងតំណែងជើងឯកលីគកំពូលកម្ពុជារដូវកាលនេះ។
 

៣ប្រកួតចុងក្រោយរបស់ភ្នំពេញក្រោមពុំដែលចាញ់ឡើយ។ ជំនួប១០ប្រកួតចុងក្រោយ ភ្នំពេញក្រោន ឈ្នះបឹងកេត ៤ ស្មើ៤ និងចាញ់២។

គិតត្រឹមសប្តាហ៍ទី២៦ ភ្នំពេញក្រោន ឈរលេខ១ មាន៤៩ពិន្ទុ ស្មើវិសាខា លេខ២ និងលេខ៣ព្រះខ័នរាជស្វាយរៀង ចំណែកបឹងកេតដែលអស់ឱកាសទៅហើយ ឈរលេខ៤ មាន៣៩ពិន្ទុ។ កីឡាករដែលស៊ុតបញ្ចូលទីបានច្រើនជាងគេគឺខ្សែប្រយុទ្ធក្រុមព្រះខ័នរាជស្វាយរៀង Marcus Haber មាន២៥គ្រាប់ នាំមុខខ្សែប្រយុទ្ធកងយោធពលខេមរភូមិន្ទ Takumu Nishihara មាន២១គ្រាប់ និងខ្សែប្រយុទ្ធភ្នំពេញក្រោន Fareed Sadat មាន១៧គ្រាប់៕