ព្រឹត្តិការណ៍កីឡាជាតិលើកទី៣ ជាការដកពិសោធចុងក្រោយនៃកីឡារាំកម្ពុជា ក្នុងដំណើរឆ្ពោះទៅព្រឹត្តិការណ៍កីឡាស៊ីហ្គេមលើកទី៣២ ដែលប្រទេសកម្ពុជាទទួលរៀបចំធ្វើម្ចាស់ផ្ទះ។ សម្រាប់កីឡារាំកម្ពុជា បានត្រៀមលក្ខណៈបានរួចរាល់ក្នុងការប្រជែងមេដាយនៅឆ្នាំ២០២៣ ខាងមុខ។

 

លោក ស៊ូវ តុង គ្រូបង្វឹកក្រុមជម្រើសជាតិកីឡារាំកម្ពុជា មើលឃើញកម្រិតសមត្ថភាព កីឡាករ-កីឡាការិនីជម្រើសជាតិកម្ពុជា នៅមិនអាចប្រៀបជាមួយប្រទេសផ្សេងៗបានទេ ដោយកីឡារាំកម្ពុជាទើបនឹងបង្កើត និងការហ្វឹកហាត់ទើបបានរយៈពេល៧ឆ្នាំចុងក្រោយនេះ។ យ៉ាងណា លោកតុងនៅតែហ៊ាននិយាយថា ប្រសិនបើប្រៀបធៀបអាយុស្រករគ្នាកម្ពុជាគឺមិនចាញ់ប្រទេសក្នុងតំបន់អាស៊ានឡើយ។

 

«និយាយពីប្រទេសក្នុងតំបន់អាស៊ាន កីឡាករ-កីឡាការិនីកីឡារាំដែលមានអាយុស្របាលគ្នាយើងអត់ចាញ់គេទេ ដោយឡែក គេមានអាយុច្រើនជាង គេហាត់បានយូរឆ្នាំជាងគេចូលកម្រិតអាជីព អ៊ីចឹងយើងមិនអាចទាន់គេទេ គេមានប្រវត្តិរាប់សិបឆ្នាំហើយ រីឯយើងមិនទាន់បាន១០ឆ្នាំទេ»។ នេះជាការបញ្ជាក់បន្ថែមរបស់លោក ស៊ូវ តុង៕