អ្នកនាំពាក្យវិមានក្រេមឡាំងលោក Dmitry Peskov លើកឡើងថា ទីក្រុងមូស្កូបានរៀបចំ សម្រាប់ការឆ្លើយតបនឹងការប្រកាសកំណត់តម្លៃប្រេងរុស្ស៊ីនៅថ្ងៃទី២ ខែធ្នូ ដោយក្រុមប្រទេស G7 សហភាពអឺរ៉ុប (EU) និងអូស្ត្រាលី។​ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មានរដ្ឋរុស្ស៊ី។

 

«ពួកយើងមិនយល់ព្រមនឹងការកំណត់តម្លៃនេះឡើយ»។ ទីភ្នាក់ងារព័ត៌មាន RIA ស្រង់សម្តីលោក Peskov បែបនេះនៅថ្ងៃទី៣ ខែធ្នូ។ លោក Peskov បន្តថា រុស្ស៊ីនឹងធ្វើការវិភាគយ៉ាងឆាប់រហ័សអំពីកិច្ចព្រមព្រៀងរបស់លោកខាងលិច ហើយឆ្លើយតបលើរឿងមួយនេះ។ 

 

រុស្ស៊ីបាននិយាយម្តងហើយម្តងទៀតថា ខ្លួននឹងមិនផ្គត់ផ្គង់ប្រេងដល់ប្រទេសដែលអនុវត្តគោលការណ៍​កំណត់​តម្លៃនោះទេ ដែលនេះជាជំហរនេះត្រូវបញ្ជាក់ជាថ្មីដោយអគ្គរដ្ឋទូតរុស្ស៊ីប្រចាំអង្គការអន្តរជាតិនៅទីក្រុងវីយែន លោក Mikhail Ulyanov នៅថ្ងៃទី៣ ខែធ្នូ។ លោក Ulyanov សង្កត់ធ្ងន់ថា ចាប់ពីថ្ងៃ​នេះត​ទៅ​អឺរ៉ុប​នឹង​រស់​នៅ​ដោយគ្មានប្រេងរុស្ស៊ី។

 

គួរបញ្ជាក់ថា ការកំណត់តម្លៃប្រេងរុស្ស៊ីដោយក្រុម G7 EU និងអូស្ត្រាលី នឹងអនុញ្ញាតឱ្យប្រទេសក្រៅ EU អាច​បន្តនាំចូលប្រេងឆៅរបស់រុស្សី ប៉ុន្តែនឹងហាមប្រាមក្រុមហ៊ុនដឹកជញ្ជូនធានារ៉ាប់រ​ងពីការ​ដឹក​ជញ្ជូន​ប្រេង​ឆៅរ​បស់​រុស្ស៊ីជុំវិញពិភពលោកលុះត្រាតែវាត្រូវបានលក់ក្នុងតម្លៃតិចជាង៦០ដុល្លារក្នុងមួយធុង។ វិធា​នការបែបនេះ​ធ្វើ​ឱ្យ​មានភាពស្មុគស្មាញដល់ការដឹកជញ្ជូន ប្រេងឆៅរបស់រុស្ស៊ីដែលមានតម្លៃលើស​ពីការកំណត់​សូម្បី​តែ​ទៅ​កាន់​ប្រទេសដែលមិនមែនជាផ្នែកនៃកិច្ចព្រមព្រៀងក៏ដោយ។

 

រដ្ឋមន្រ្តីក្រសួងរតនាគារអាម៉េរិកលោកស្រី Janet Yellen បាននិយាយថា ការកំណត់​តម្លៃ​អតិបរមា​នេះ​នឹង​ផ្តល់​អត្ថប្រយោជន៍ជាពិសេសដល់ប្រទេសដែលមានចំណូលទាប និងមធ្យម ដែលបានទទួលរង​ផល​ប៉ះ​ពាល់​នៃ​តម្លៃ​ថាមពល និងអាហារខ្ពស់៕