កម្រងរូបភាពប្រមាណ ១០០០សន្លឹកនេះ ត្រូវបានលោក Jean-Marie Le Guay អតីតអនុប្រធានអង្គការគ្រួសារថ្មី ប្រមូលទុកនៅចុងសតវត្សទី១៩ ដើមសតវត្សទី២០ ក្នុងបំណងចងក្រងទុកដើម្បីដាក់តាំងពិព័រណ៍សម្រាប់កុមារកម្ពុជា។ រូបភាព និងសៀវភៅទាំងនេះ ឆ្លុះបញ្ចាំងពីសកម្មភាពនៃរាជវង្សានុវង្ស ទិដ្ឋភាពសាសនា ប្រាសាទបុរាណ ​និងបង្ហាញពីជីវភាពប្រចាំថ្ងៃរបស់ប្រជាជនកម្ពុជាផងដែរ។

លោក Benoît Duchâteau-Arminjon ប្រធានអង្គការគ្រួសាថ្មី បានថ្លែងពីគោលបំណងនៃការផ្តល់រូបថតដូច្នេះ៖«ការផ្តល់រូបភាពដល់សារមន្ទីរ ស.ស.រ នេះ គឺដើម្បីផ្តល់លទ្ធភាពឱ្យប្រជាជនខ្មែរ អាចមើលឃើញរូបភាពសង្គមខ្មែរនៅសម័យបុរាណ។ លោកសង្ឃឹមថា នឹងមានអ្នកផ្សេងយករូបបុរាណមកឱ្យសារម​ន្ទីរជាផលប្រយោជន៍សង្គម»។

ទន្ទឹមនោះ លោកស្រី ជា សិរី ឧបការីទេសាភិបាល និងជាអគ្គនាយកបច្ចេកទេសធនាគារជាតិនៃកម្ពុជា ក៏បានថ្លែងអំណរគុណដល់លោកប្រធានអង្គការគ្រួសារថ្មី ក្នុងការផ្តល់កម្រងរូបភាពបុរាណដល់សារមន្ទីរ ស.ស.រ ក្នុងការថែរក្សា និងបង្ហាញទៅកាន់កូនចៅខ្មែរជំនាន់ក្រោយ។

ជាមួយគ្នានេះដែរ លោក ប្លែស គីលីយ៉ង សហប្រធានសារមន្ទីរ ស.ស.រ ក៏បានបង្ហាញភាពរីករាយជាខ្លាំង ដ្បិតការផ្តល់នេះបង្ហាញពីទំនុកចិត្តរបស់ប្រធានអង្គការគ្រួសារថ្មីចំពោះសារមន្ទីរ។ «ខ្ញុំមានអារម្មណ៍សប្បាយចិត្ត ព្រោះតួនាទីរបស់សារមន្ទីរ គឺប្រមូលផ្តុំ អភិរក្ស បកស្រាយ និងដាក់តាំង នូវបេតិកភណ្ឌ ដើម្បីចែករំលែកចំណេះដឹងជូនសាធារណជន។ ការផ្តល់ឱ្យរបស់អង្គការគ្រួសារថ្មី បង្ហាញពីការជួយពង្រីកសមុច្ច័យ ជាពិសេសបង្ហាញពីការជឿទុកចិត្តចំពោះសារមន្ទីរ ក្នុងការអភិរក្ស​និងបង្ហាញនូវវត្ថុមួយចំនួន»។ លោក ប្លែស គីលីយ៉ង សហប្រធានសារមន្ទីរ ស.ស.រ បានលើកឡើងដូច្នេះ៕