«ខ្ញុំសង្ឃឹមថាក្រុមនៅ CONCACAF អាចបង្កើតកម្មវិធីប្រកួតដូច Asian Cup, Copa America បន្ថែមទៀត មិនមែនគ្រាន់តែលេងមិត្តភាពនៅអាម៉េរិកនោះទេ។ ប្រកួតមិត្តភាពមិនផ្តល់ផលប្រយោជន៍ដល់ក្រុមនៅ CONCACAF នោះទេ»។ នេះជាការលើកឡើងរបស់ Ochoa ក្រោយក្រុមនៅ CONCACAF​ ធ្លាក់ចេញពី World Cup កាតា ត្រឹមវគ្គចែកពូលស្ទើរទាំងអស់។
  

 

World Cup ២០២២ ក្រុមពីតំបន់អាស៊ី អាហ្រ្វិក អាមេរិកខាងត្បូង និងអឺរ៉ុបមានយ៉ាងហោចណាស់ពីរក្រុមឆ្លងទៅវគ្គ១៦ក្រុមចុងក្រោយ លើកលែងក្រុម CONCACAF មានតែអាម៉េរិកមួយប៉ុណ្ណោះ ហើយត្រូវធ្លាក់ក្រោមថ្វីជើងហូឡង់នៅវគ្គ១/៨ផ្តាច់ព្រ័ត្រ។
 

ស្របពេលប្រទេសនៅតំបន់ CONCACAF ទាំងបី រួមមានអាម៉េរិក កាណា និងម៉ិកស៊ិក នឹងត្រូវដឹកនាំរួមគ្នាធ្វើម្ចាស់ផ្ទះកីឡាបាល់ទាត់ពិភពលោកឆ្នាំ២០២៦ អ្នកចាំទីដ៏មានបទពិសោធន៍របស់ម៉ិកស៊ិក Ochoa អំពាវនាវឱ្យក្រុមទាំងនេះមានផែនការសកម្មភាពប្រកួតក្នុងតំបន់ឱ្យបានច្រើន ពោលគឺដូចក្រុមនៅអឺរ៉ុប ដើម្បីទទួលបានឱកាសខ្ពស់ក្នុងការប្រកួតប្រជែងទល់ក្រុមពីទ្វីបផ្សេងៗ។
 

អ្នកចាំទីវ័យ៣៧ឆ្នាំរូបនេះ មិនចង់ឱ្យក្រុមនៅ CONCACAF ពឹងផ្អែកតែលើកីឡាករមួយចំនួនតូចដែលប្រកបអាជីពតាមក្លិបល្បីៗនៅអឺរ៉ុបនេះទេ ប៉ុន្តែត្រូវពង្រឹងកីឡាករដែលលេងក្នុងស្រុក ឬក្នុងតំបន់ឱ្យប្រសើរជាងមុនទើបមានប្រសិទ្ធភាព។
 

ការលើកឡើងរបស់ Ochoa ក៏ទទួលបានការគាំទ្រពីអ្នកចាំទីកូស្តារីកា Keylor Navas ផងដែរ ។ Navas អ្នកចាំទី Paris St Germain និងក្លិបល្បីៗនៅអឺរ៉ុបផ្សេងទៀតដូចជា Real Madrid ជាដើមនោះ សង្ឃឹមថាយុវជនពីតំបន់ CONCACAF ទាំងអស់អាចប្រកួតប្រជែងក្នុងកម្រិតខ្ពស់រៀងរាល់សប្តាហ៍ ដោយមិនមែនត្រឹមតែនៅក្នុងការប្រកួត World Cup ប៉ុណ្ណោះនោះទេ៕