កីឡាជាតិ
ជាតិ
ស៊ីហ្គេម២០២៣
លោក Keisuke Honda រើសបុគ្គលិកហាត់ការនៅក្លិបសូលទីឡូអង្គរ ដោយសម្ភាសផ្ទាល់ ក្រុមបាល់ទាត់ សូលទីឡូអង្គរ រូបពី Cambodian League 2
× លោក Keisuke Honda អ្នកចាត់ការទូទៅក្រុមជម្រើសជាតិកម្ពុជា បានប្រកាសរើសអ្នកហាត់ការផ្នែកលក់សម្រាប់ក្លិបនិងជាប្រធានក្លិបបាល់ទាត់សូលទីឡូអង្គរ។ តាមរយៈការប្រកាសរើសបុគ្គលិក លោក Honda ដែលជាម្ចាស់ក្លិបសូលទីឡូអង្គរ នឹងសម្ភាសផ្ទាល់នៅជុំទី២ ក្រោយបេក្ខជនឆ្លងផុតជុំទី១។
ក្លិបសូលទីឡូអង្គរ កំពុងរើសអ្នកហាត់ការផ្នែកលក់ ដោយផ្ដល់ជូននូវប្រាក់ខែចន្លោះពី ៥០ដុល្លារ ទៅ១៥០ដុល្លារ។ នៅក្នុងក្ដីប្រកាសនោះ លោក Keisuke Honda នឹងសម្ភាសបេក្ខជនដោយផ្ទាល់ ប្រសិនជាពួកគេ បានជាប់ជុំទី១ ជាមួយផ្នែកធនធានមនុស្ស របស់ក្លិបមានទីតាំងនៅសៀមរាបមួយនេះ។
អ្នកចាត់ការទូទៅសញ្ជាតិជប៉ុន បានសរសេរបង្ហោះលើហ្វេសប៊ុកដោយភ្ញាប់ជាមួយព័ត៌មានពីការរើសបុគ្គលិកផងដែរដើម្បីស្វែងរកអ្នកមានសមត្ថភាព ដែលអាចរួមដំណើរជាមួយក្លិបទៅកាន់កម្រិតល្អជាងនេះទៀត។ ប្រធានក្លិបរូបនេះ បានសរសេរដូច្នេះ៖«យើង កំពុងស្វែងរកអ្នក ដឹកនាំក្លិបរបស់យើង ទៅរកកម្រិតបន្ទាប់ទៀត។»។
ដោយឡែក ចំពោះតម្រូវការនៃតួនាទីនេះ បេក្ខជន ត្រូវមានសញ្ញាប័ត្រផ្នែកទីផ្សារ, ជំនួញ, ឬក៏សញ្ញាប័ត្រជំនាញណាមួយប្រហាក់ហែល។ បេក្ខជន ក៏ត្រូវមានប័ណ្ណបើកបរ ហើយក៏ត្រូវមានជំនាញភាសាបរទេសផងដែរ។ ចំពោះបុគ្គលិកលក្ខណៈ បេក្ខជន ត្រូវមានសមត្ថភាពអាចធ្វើការជាក្រុម ឬម្នាក់ឯក ជាពិសេសគឺការប្ដេជ្ញាចិត្តខ្ពស់ក្នុងការងារ។
គួរបញ្ជាក់ផងដែរថា ក្លិបសូលទីឡូអង្គរ ជាក្លិប មានទីតាំងនៅខេត្តសៀមរាប និងកំពុងប្រកបអាជីពក្នុងលីគ២ កម្ពុជា។ ក្លិបនេះ មានប្រធាន ពីររូម រួមមាន លោក Keisuke Honda និងលោក ប៊ុន វណ្ណេត៕
Tag:
បាល់ទាត់
Soltilo Angkor
Keisuke Honda
© រក្សាសិទ្ធិដោយ thmeythmey.com