ជម្លោះពាណិជ្ជកម្មពីរករណីជាមួយចិនត្រូវធ្លាក់ដល់ដៃ WTO។ ករណីទីមួយនោះគឺ ការចោទ​ចិន​លើ​ការរឹតបន្តឹងសិទ្ធិរបស់ក្រុមហ៊ុនសហភាពអឺរ៉ុប (EU) ក្នុងការប្រើ​ប្រាស់​តុលាការ​បរទេស​ដើម្បី​ការពារ​ប៉ាតង់បច្ចេកវិទ្យាខ្ពស់ និង ករណីទីពីរនោះគឺ ការហាមឃាត់ការនាំចូលរបស់​លីទុយអានី​ដោយ​មិន​មានការបកស្រាយច្បាស់លាស់។ 

 

EU អះអាងថា ករណីទាំងពីរនេះធ្វើឱ្យខូចខាតយ៉ាងខ្លាំងដល់អាជីវកម្មអឺរ៉ុប និងការរំខានដល់​ពាណិជ្ជកម្ម និងខ្សែច្រវាក់ផ្គត់ផ្គង់ក្នុង EU។ គណៈកម្មការអឺរ៉ុបបានស្នើសុំជាផ្លូវការ​ក្នុង​ការ​ប្រឹក្សា​ជាមួយចិននៅ WTO លើបញ្ហានេះ ដែលជាជំហានដំបូងក្នុងកា​រ​ដោះស្រាយ​បញ្ហា​ក្នុង​កម្រិត​អង្គការ​អន្តរជាតិ។ យ៉ាងណាមិញ ដំណាក់កាលប្រឹក្សាបែបនេះ មិនងាយនឹងដោះស្រាយ​បញ្ហា​បាន​នោះទេ។
 

ជុំវិញរឿងនេះ ក្រសួងពាណិជ្ជកម្មចិនបានលើកឡើងថា នឹងដោះស្រាយជម្លោះពាណិជ្ជកម្មរបស់ EU ស្របតាមនីតិវិធីដោះស្រាយវិវាទរបស់ WTO។

សំណើរបស់គណៈកម្មការខាងលើកើតឡើងស្របពេលដែល EU ត្រួតពិនិត្យជំហររបស់ខ្លួនចំពោះចិន ខណៈមើលឃើញថា ចិនជាដៃគូប្រកួតប្រជែងជាងដៃគូសហការ។ 
 

គួររំលឹកថា ទំនាក់ទំនងពាណិជ្ជកម្មរវាង EU និងចិនរឹតតែអាក្រក់ទៅក្នុងរយៈពេលប៉ុន្មានឆ្នាំចុង​ក្រោយនេះខណៈពេលដែលតុលាការចិនបានចេញដីការរារាំងក្រុមហ៊ុនអឺរ៉ុបពីការស្វែងរកសំណង​ទាក់​ទងកម្មសិទ្ធិបញ្ញាស្ដង់ដារនៅតុលាការអឺរ៉ុប និងតុលាការផ្សេងទៀតក្រៅពីតុលាការចិន។ បន្ថែមពីនេះ វត្តមានស្ថានទូតកោះតៃវ៉ាន់នៅលីទុយអានីក៏ជារឿងមួយទៀតដែលធ្វើឱ្យទំនាក់ទំនងទ្វេភាគី​កាន់​តែ​ពិបាកដោះស្រាយផងដែរ៕